ବାରିପଦା: ମୟୂରଭଞ୍ଜ ଜିଲ୍ଲାରେ ୩ କୋଟିରୁ ଅଧିକ ମୂଲ୍ୟର ମନରେଗା କାର୍ଯ୍ୟରେ ଅନିୟମିତତା ନେଇ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ୩ ଜଣ ଯନ୍ତ୍ରୀଙ୍କୁ ନୋଟିସ ଜାରି କରିଛି।
୨୦୧୯-୨୦ ଆର୍ଥିକ ବର୍ଷ ପାଇଁ ଯଶୀପୁର ବ୍ଲକର ପୋଡ଼ାଗଡ଼ା, ବରେହିପାଣି, ଅଷ୍ଟକୁମାର, ଗୁରୁଗାଡିଆ ଓ ଧଲାବାଣୀ ପଞ୍ଚାୟତରେ ମନରେଗା ଅଧୀନରେ ବିଭିନ୍ନ ଉନ୍ନୟନ ମୂଳକ ପ୍ରକଳ୍ପ ପାଇଁ ସରକାର ୩ କୋଟି ୨୧ ଲକ୍ଷ ଟଙ୍କା ମଞ୍ଜୁର କରିଥିଲେ।
କାମ ନକରି ପାଣ୍ଠିର ଏକ ଗୁରୁତ୍ୱପୂର୍ଣ୍ଣ ଅଂଶର ଅପବ୍ୟବହାର ହୋଇଥିବା ଅଭିଯୋଗ ହୋଇଥିଲା। ଏହାର ଜବାବରେ ତତ୍କାଳୀନ ଯଶିପୁର ବିଡିଓ ଅନୁପମା ଘୋଷ ଜିଲ୍ଲା ପ୍ରଶାସନକୁ ଖବର ଦେଇ ତଦନ୍ତ ଆରମ୍ଭ କରିଥିଲେ।
ତଦନ୍ତ ରିପୋର୍ଟ ଆଧାରରେ ୨୫ ଜଣଙ୍କ ବିରୋଧରେ ଯଶିପୁର ଥାନାରେ ଅଭିଯୋଗ ହୋଇଥିଲା। ଏହି ଅଭିଯୋଗରେ ୩ ଜଣ ସରପଞ୍ଚ ଓ ଜଣେ ପିଇଓଙ୍କୁ ଗିରଫ କରାଯାଇଛି।
ଗିରଫ ବ୍ୟକ୍ତିମାନଙ୍କୁ ପଚରାଉଚରା କରିବାରୁ ଦୁର୍ନୀତିର ସମ୍ପୂର୍ଣ୍ଣ ପରିମାଣ ଜଣାପଡ଼ିଥିଲା। ଫଳରେ ପ୍ରଶାସନ ପକ୍ଷରୁ ୫ଟି ପଞ୍ଚାୟତର ସରପଞ୍ଚ ଓ ପିଇଓଙ୍କୁ ବହିଷ୍କାର କରାଯାଇଛି। ଏହି ଅନିୟମିତତାରେ ସମ୍ପୃକ୍ତ ଥିବା ଅଭିଯୋଗରେ ଜଣେ ସହକାରୀ ଯନ୍ତ୍ରୀ, ଦୁଇ ଜଣ କନିଷ୍ଠ ଯନ୍ତ୍ରୀ ଏବଂ ଅନ୍ୟ ଜଣେ ଅଧିକାରୀଙ୍କୁ ନିଲମ୍ବିତ କରାଯାଇଛି।
ପରେ ଏହି ମାମଲାକୁ ଭିଜିଲାନ୍ସ ବିଭାଗକୁ ହସ୍ତାନ୍ତର କରାଯାଇଥିଲା। ତେବେ ଏହି ଘଟଣାରେ ସଂପୃକ୍ତ ଅଧିକାରୀମାନେ ଫେରାର ହୋଇଯାଇଛନ୍ତି। ସରପଞ୍ଚଙ୍କ ଖୁଲାସାକୁ ଭିତ୍ତି କରି ଇଡି ଏହି ମାମଲାର ଶୁଣାଣି କରିଥିଲା।
ନିଲମ୍ବିତ ଅଧିକାରୀମାନେ ନିଜ ନିଜ ପଦକୁ ଫେରିବା ପରେ ଇଡି ସେମାନଙ୍କୁ ନୋଟିସ୍ ଜାରି କରିଛି। ଏଥିରେ ତତ୍କାଳୀନ ସହକାରୀ ଯନ୍ତ୍ରୀ ରାଜେନ୍ଦ୍ର କୁମାର ପାତ୍ର, କନିଷ୍ଠ ଯନ୍ତ୍ରୀ ଦିବ୍ୟଲୋଚନ ନାୟକ ଓ ସମୀର କବି ସାମିଲ ଥିଲେ। ଇଞ୍ଜିନିୟରମାନଙ୍କୁ ମାର୍ଚ୍ଚ ୨୦ ରେ ଇଡି ନିକଟରେ ହାଜର ହେବାକୁ ନିର୍ଦ୍ଦେଶ ଦିଆଯାଇଛି।