ନୂଆଦିଲ୍ଲୀ: କଫି ଏବଂ ଚା’ କେବଳ ଏକ ସାଧାରଣ ଉତ୍ସାହବର୍ଦ୍ଧକ ପାନୀୟ ନୁହେଁ, ବରଂ ଏହା ଆପଣଙ୍କୁ ମୁଣ୍ଡ ଏବଂ ବେକ କର୍କଟ ଭଳି ମାରାତ୍ମକ ରୋଗରୁ ମଧ୍ୟ ରକ୍ଷା କରିପାରେ । ଆମେରିକାନ କ୍ୟାନ୍ସର ସୋସାଇଟିର ପ୍ରସିଦ୍ଧ ପତ୍ରିକା ‘କ୍ୟାନ୍ସର’ରେ ପ୍ରକାଶିତ ଏକ ସଦ୍ୟତମ ଗବେଷଣା ରିପୋର୍ଟରୁ ଏଭଳି କିଛି ଆଶାଜନକ ତଥ୍ୟ ସାମ୍ନାକୁ ଆସିଛି ।
ଆନ୍ତର୍ଜାତୀୟ ହେଡ୍ ଆଣ୍ଡ ନେକ୍ କ୍ୟାନ୍ସର ଏପିଡେମିଓଲୋଜି କନସୋର୍ଟିୟମ୍ ପକ୍ଷରୁ ୧୪ଟି ଭିନ୍ନ ଭିନ୍ନ ଗବେଷଣାର ତଥ୍ୟକୁ ନେଇ ଏକ ବଡ଼ ଧରଣର ବିଶ୍ଳେଷଣ କରାଯାଇଥିଲା । ଏଥିରେ ପ୍ରାୟ ୯,୫୦୦ କର୍କଟ ରୋଗୀ ଏବଂ ୧୫,୭୦୦ ସୁସ୍ଥ ଲୋକଙ୍କ ତଥ୍ୟ ସାମିଲ ଥିଲା। ଏହି ଅଧ୍ୟୟନରୁ ଜଣାପଡ଼ିଛି ଯେ ନିୟମିତ କଫି ଏବଂ ଚା’ ପିଉଥିବା ବ୍ୟକ୍ତିଙ୍କ ଠାରେ ପାଟି, ଗଳା ଏବଂ ସ୍ୱରପେଟିକା (Larynx) କର୍କଟ ହେବାର ଆଶଙ୍କା ଯଥେଷ୍ଟ କମ୍ ରହିଥାଏ ।
ଯେଉଁମାନେ ଦିନକୁ ୪ କପରୁ ଅଧିକ କ୍ୟାଫିନ୍ ଯୁକ୍ତ କଫି ପିଅନ୍ତି, ସେମାନଙ୍କ କ୍ଷେତ୍ରରେ କଫି ପିଉନଥିବା ଲୋକଙ୍କ ତୁଳନାରେ ମୁଣ୍ଡ ଓ ବେକ କର୍କଟ ହେବାର ଆଶଙ୍କା ୧୭ ପ୍ରତିଶତ କମ୍ ଥାଏ। ସେହିପରି ନିୟମିତ କଫି ପିଇବା ଦ୍ୱାରା ପାଟି କର୍କଟ ଆଶଙ୍କା ୩୦ ପ୍ରତିଶତ ଏବଂ ଗଳା କର୍କଟର ଆଶଙ୍କା ୨୨ ପ୍ରତିଶତ ହ୍ରାସ ପାଇଥାଏ ବୋଲି ଗବେଷକମାନେ ଦାବି କରିଛନ୍ତି । ଯେଉଁମାନେ ଦିନକୁ ୩-୪ କପ୍ କଫି ପିଅନ୍ତି, ସେମାନଙ୍କ ଠାରେ ହାଇପୋଫାରିଞ୍ଜିଆଲ୍ କର୍କଟ ହେବାର ଆଶଙ୍କା ସର୍ବାଧିକ ୪୧ ପ୍ରତିଶତ କମିଯାଏ। ଆଶ୍ଚର୍ଯ୍ୟର କଥା ହେଉଛି, ବିନା କ୍ୟାଫିନ୍ ଥିବା କଫି ପିଇଲେ ମଧ୍ୟ ପାଟି କର୍କଟର ବିପଦ ୨୫ ପ୍ରତିଶତ କମ୍ ରହିଥାଏ, ଯାହା ପ୍ରମାଣ କରୁଛି ଯେ କେବଳ କ୍ୟାଫିନ୍ ନୁହେଁ, ବରଂ ଅନ୍ୟ ଉପାଦାନ ଗୁଡ଼ିକ ମଧ୍ୟ ସୁରକ୍ଷା ପ୍ରଦାନ କରୁଛନ୍ତି ।
ଗବେଷଣା ଅନୁଯାୟୀ, ଦିନକୁ ମାତ୍ର ଗୋଟିଏ କପ୍ କିମ୍ବା ତା’ଠାରୁ କମ୍ ଚା’ ପିଉଥିବା ଲୋକଙ୍କ କ୍ଷେତ୍ରରେ କର୍କଟ ଆଶଙ୍କା ୯ ପ୍ରତିଶତ କମ୍ ରହିଥାଏ । କିନ୍ତୁ ଅଧିକ ମାତ୍ରାରେ ଚା’ ପିଇବା ଶରୀର ପାଇଁ କ୍ଷତିକାରକ ହୋଇପାରେ । ଦିନକୁ ଏକ କପରୁ ଅଧିକ ଚା’ ପିଉଥିବା ବ୍ୟକ୍ତିଙ୍କ ଠାରେ ସ୍ୱରପେଟିକା କର୍କଟ ହେବାର ଆଶଙ୍କା ୩୮ ପ୍ରତିଶତ ବୃଦ୍ଧି ପାଇଥାଏ ବୋଲି ବୈଜ୍ଞାନିକମାନେ ସତର୍କ କରିଛନ୍ତି ।
ଅଧ୍ୟୟନର ବରିଷ୍ଠ ଲେଖିକା ତଥା ଉଟାହ ସ୍କୁଲ୍ ଅଫ୍ ମେଡିସିନର ପ୍ରଫେସର ଡକ୍ଟର ୟୁଆନ୍-ଚିନ୍ ଆମି ଲି’ଙ୍କ ମତରେ, କଫି ଏବଂ ଚା’ରେ ଥିବା ପଲିଫେନଲ୍ସ ଭଳି ଉପାଦାନ କର୍କଟ ପ୍ରତିରୋଧକ ଭାବେ କାମ କରୁଥାଇପାରେ । ତେବେ ଏହି ପାନୀୟ ଏବଂ କର୍କଟ ରୋଗ ମଧ୍ୟରେ ଥିବା ଜଟିଳ ସମ୍ପର୍କକୁ ସମ୍ପୂର୍ଣ୍ଣ ରୂପେ ବୁଝିବା ପାଇଁ ଆହୁରି ଅଧିକ ଗବେଷଣାର ଆବଶ୍ୟକତା ରହିଛି । ସେ ପର୍ଯ୍ୟନ୍ତ ଏହାକୁ ସନ୍ତୁଳିତ ମାତ୍ରାରେ ପିଇବା ହିଁ ସ୍ୱାସ୍ଥ୍ୟ ପାଇଁ ସବୁଠାରୁ ନିରାପଦ ।
