ତାଲା ବନ୍ଦ ବେଳେ ଫସଲ ଅମଳ କରିପାରିବେ ଚାଷୀ: କେନ୍ଦ୍ର ସରକାର

ନୂଆଦିଲ୍ଲୀ: ମହାମାରୀ କରୋନା ଭୂତାଣୁ ଯୋଗୁଁ ସାରା ଦେଶକୁ ୨୧ ଦିନ ଯାଏଁ କେନ୍ଦ୍ର ସରକାର ଲକ ଡାଉନ ଘୋଷଣା କରିଛନ୍ତି । ଏହାଦ୍ୱାରା ଲୋକେ ଘରୁ ବାହାରି ପାରୁନାହାନ୍ତି । ଫଳରେ ଚାଷୀର ଫସଲ କାମ ମଧ୍ୟ ବାଧା ପାଉଛି । ଚାଷୀମାନ ଫସଲ କାମ କରିପାରୁ ନାହାନ୍ତି । ଏଥିଯୋଗୁଁ ଫଲ ନଷ୍ଟ ହେବାରେ ଲାଗିଛି । ତେବେ ଏଣିକି ଚାଷୀ ମାନେ ତାଲା ବନ୍ଦ ବେଳେ ଫସଲ ସହ ଜଡିତ ସବୁ କାମ କରିପାରିବେ । ଏନେଇ ଆଜି କେନ୍ଦ୍ର ସରକାର ଏକ ବଡ ଘୋଷଣା କରିଛନ୍ତି ।
ଚାଷୀମାନେ ଫସଲ ଅମଳ ଠାରୁ ଆରମ୍ଭ କରି କୃଷି କାର୍ଯ୍ୟ ପାଇଁ ରାସ୍ତାରେ ଟ୍ରାକ୍ଟର ମଧ୍ୟ ନେଇପାରିବେ ବୋଲି ସରକାର ମଂଜୁରୀ ଦେଇଛନ୍ତି । କେବଳ ସେତିକି ନୁହେଁ ତାଲା ବନ୍ଦ ସମୟରେ ମଣ୍ଡି ଓ କ୍ରୟ ଏଜେନ୍ସିକୁ ମଧ୍ୟ ସରକାର କଟକଣା ମୁକ୍ତ କରିଛନ୍ତି । ଅମଳ ସମୟରେ ଯେପରି କିଛି ବାଧା ସୃଷ୍ଟି ନହୁଏ ତାକୁ ଦୃଷ୍ଟିରେ ରଖି କେନ୍ଦ୍ର ସରକାର ଏଭଳି ପଦକ୍ଷେପ ନେଇଛନ୍ତି ।