ଟେଲିଭିଜନ୍ ଯୁଗରୁ ସାଟେଲାଇଟ୍ ଇଣ୍ଟରନେଟ୍: ଷ୍ଟାରଲିଙ୍କର ଏଣ୍ଟ୍ରି ବଦଳାଇବ ଭାରତର ଡିଜିଟାଲ୍ ଚିତ୍ର
ନୂଆଦିଲ୍ଲୀ: ଭାରତର ଡିଜିଟାଲ୍ ଯାତ୍ରାରେ ଏବେ ଏକ ନୂଆ ଏବଂ ବୈପ୍ଳବିକ ପରିବର୍ତ୍ତନ ଆସିବାକୁ ଯାଉଛି। ଡିଟିଏଚ୍ କେବୁଲ୍ ଟିଭି ଏବଂ ଫାଇବର ଅପ୍ଟିକ୍ସ ଇଣ୍ଟରନେଟର ଯୁଗ ପରେ ଏବେ ଦେଶରେ ସାଟେଲାଇଟ୍ ଇଣ୍ଟରନେଟର ସମୟ ଆସିଯାଇଛି। ବିଶ୍ୱର ଅନ୍ୟତମ ଧନୀ ବ୍ୟକ୍ତି ତଥା ଟେକ୍ ମହାରଥୀ ଏଲନ୍ ମସ୍କଙ୍କ କମ୍ପାନୀ ‘ଷ୍ଟାରଲିଙ୍କ୍’ ଭାରତୀୟ ବଜାରରେ ବିଧିବଦ୍ଧ ଭାବେ ପ୍ରବେଶ କରିବାକୁ ଯାଉଛି, ଯାହାକି ଦେଶର ଦୂରସଞ୍ଚାର ତଥା ଟେଲିକମ୍ କ୍ଷେତ୍ରରେ ଏକ ବଡ଼ ଧରଣର ବିପ୍ଳବ ଆଣିବ ।
ବହୁ ଦିନର କଳ୍ପନାଜଳ୍ପନା ପରେ ଶେଷରେ ଭାରତୀୟ ଟେଲିକମ୍ ଦିଗ୍ଗଜ ‘ରିଲାଏନ୍ସ ଜିଓ’ ଏବଂ ‘ଭାରତୀ ଏୟାରଟେଲ୍’ ଏଲନ୍ ମସ୍କଙ୍କ ଷ୍ଟାରଲିଙ୍କ୍ ସହିତ ହାତ ମିଳାଇଛନ୍ତି। ସ୍ପେସ୍-ଏକ୍ସର ସାଟେଲାଇଟ୍ ନେଟୱାର୍କକୁ ବ୍ୟବହାର କରି ଏହି ଦେଶୀୟ କମ୍ପାନୀଗୁଡ଼ିକ ଏବେ ଭାରତର ଦୁର୍ଗମ ତଥା ଅପହଞ୍ଚ ଇଲାକାରେ ମଧ୍ୟ ହାଇସ୍ପିଡ୍ ଇଣ୍ଟରନେଟ୍ ଯୋଗାଇଦେବେ । ପୂର୍ବରୁ ଛାତ ଉପରେ ଆଣ୍ଟିନା ଏବଂ ଛତା ମାଧ୍ୟମରେ ଯେପରି ଟିଭି ଚ୍ୟାନେଲ୍ ପ୍ରସାରଣ ହେଉଥିଲା, ଠିକ୍ ସେହିପରି ଏବେ ଲୋ-ଆର୍ଥ ଅର୍ବିଟ୍ ସାଟେଲାଇଟ୍ ମାଧ୍ୟମରେ ମହାକାଶରୁ ସିଧାସଳଖ ଆପଣଙ୍କ ଘରକୁ ବ୍ରଡବ୍ୟାଣ୍ଡ ଇଣ୍ଟରନେଟ୍ ଆସିବ। ଏହି କୌଶଳ ବ୍ୟବହାର କଲେ ଭୂମି ଉପରେ ଟାୱାର କିମ୍ବା ତାର ବିଛାଇବାର ଆବଶ୍ୟକତା ରହିବ ନାହିଁ ।
ଭାରତୀୟ ବଜାରରେ ଏବେ ଇଉଟେଲସାଟ୍ ୱାନ୍ୱେବ୍ ଏବଂ ଜିଓ ସାଟେଲାଇଟ୍ କମ୍ୟୁନିକେସନ୍ସ ଭଳି ସଂସ୍ଥାମାନେ ସାଟେଲାଇଟ୍ ଇଣ୍ଟରନେଟ୍ କ୍ଷେତ୍ରରେ ଅନୁମତି ପାଇସାରିଛନ୍ତି। ତେବେ ଷ୍ଟାରଲିଙ୍କ୍ ପାଖରେ ବିଶ୍ୱବ୍ୟାପୀ ପ୍ରାୟ ୭,୦୦୦ ରୁ ଊର୍ଦ୍ଧ୍ୱ ଉନ୍ନତମାନର ସାଟେଲାଇଟ୍ ରହିଥିବାରୁ ଏହା ପ୍ରତିଯୋଗିତାରେ ବହୁ ଆଗରେ ରହିଛି। ଆଶ୍ଚର୍ଯ୍ୟର କଥା ହେଉଛି, ପୂର୍ବରୁ ସାଟେଲାଇଟ୍ ଇଣ୍ଟରନେଟ୍ କମ୍ପାନୀଗୁଡ଼ିକ ନିଲାମୀ ମାଧ୍ୟମରେ ସ୍ପେକ୍ଟ୍ରମ୍ କିଣିବା ଉଚିତ୍ ବୋଲି ଜିଓ ଏବଂ ଏୟାରଟେଲ୍ କଡ଼ା ଦାବି କରୁଥିଲେ। କିନ୍ତୁ ବର୍ତ୍ତମାନ ଟ୍ରାଇ ଏବଂ ଦୂରସଞ୍ଚାର ବିଭାଗର ନୂଆ ପ୍ରଶାସନିକ ସ୍ପେକ୍ଟ୍ରମ୍ ଆବଣ୍ଟନ ପ୍ରକ୍ରିୟା ଏବଂ ନୂତନ ଟେଲିକମ୍ ଆଇନ କାର୍ଯ୍ୟକାରୀ ହେବା ପରେ, ଉଭୟ ପ୍ରତିଦ୍ୱନ୍ଦ୍ୱୀ ଷ୍ଟାରଲିଙ୍କ୍ ସହ ମିଶି କାମ କରିବାକୁ ରାଜି ହୋଇଛନ୍ତି ।
ଗାଁ ଗହଳି କିମ୍ବା ପାହାଡ଼ିଆ ଅଞ୍ଚଳ ଯେଉଁଠି ପାରମ୍ପରିକ ମୋବାଇଲ୍ ଟାୱାର କିମ୍ବା ଫାଇବର କେବୁଲ୍ ପହଞ୍ଚିବା କଷ୍ଟକର, ସେଠାରେ ସାଟେଲାଇଟ୍ ଇଣ୍ଟରନେଟ୍ ସଞ୍ଜୀବନୀ ସଦୃଶ ହେବ। ବିଶେଷଜ୍ଞଙ୍କ ମତରେ, ଷ୍ଟାରଲିଙ୍କର ଏହି ନେଟୱାର୍କ ଫଳରେ ଖାଉଟିମାନେ ବିନା କୌଣସି ବାଧାରେ ଭିଡିଓ ଷ୍ଟ୍ରିମିଂ, ଅନଲାଇନ୍ ଗେମିଂ ଏବଂ ଡିଜିଟାଲ୍ ଶିକ୍ଷାର ଲାଭ ଉଠାଇପାରିବେ । ଯଦିଓ ଏଥିପାଇଁ ଆବଶ୍ୟକ ହେଉଥିବା ରିସିଭର୍ ଯନ୍ତ୍ରାଂଶ ଏବଂ ମାସିକ ରିଚାର୍ଜ ଖର୍ଚ୍ଚ ପ୍ରାରମ୍ଭିକ ପର୍ଯ୍ୟାୟରେ ସାଧାରଣ ଇଣ୍ଟରନେଟ୍ ତୁଳନାରେ ଟିକେ ଅଧିକ ରହିବା ନେଇ ଆଶଙ୍କା ରହିଛି, ତଥାପି ବ୍ୟାପକ ସମ୍ପ୍ରସାରଣ ପରେ ଏହା ଦେଶର ଡିଜିଟାଲ୍ ବିକାଶରେ ଏକ ମାଇଲଖୁଣ୍ଟ ସାବ୍ୟସ୍ତ ହେବ ବୋଲି ଆଶା କରାଯାଉଛି ।
