୧୪ ବର୍ଷରୁ ରୋଜଗାର ଆରମ୍ଭ, ୨୦ ବର୍ଷରେ ମା’ଙ୍କୁ କରାଇଲେ ଅବସରପ୍ରାପ୍ତ: ବିହାରର ଯୁବକଙ୍କ ପ୍ରେରଣାଦାୟୀ କାହାଣୀ
ନୂଆଦିଲ୍ଲୀ: ଆଜିକାଲି ଇଣ୍ଟରନେଟ୍ ଦୁନିଆରେ ଜଣେ ୨୦ ବର୍ଷୀୟ ଯୁବକଙ୍କ ସଫଳତାର କାହାଣୀ ବେଶ୍ ଭାଇରାଲ୍ ହେବାରେ ଲାଗିଛି। ଏହି ଯୁବକ ଜଣକ ହେଉଛନ୍ତି ବିହାରର ଅସ୍ମିତ । ମାତ୍ର ୧୪ ବର୍ଷ ବୟସରେ ଯେତେବେଳେ ଅନ୍ୟ ପିଲାମାନେ ଖେଳକୁଦରେ ବ୍ୟସ୍ତ ଥାଆନ୍ତି, ସେତେବେଳେ ସେ ଡିଜାଇନିଂ ଓ ଏଡିଟିଂ ଶିଖି ରୋଜଗାର ଆରମ୍ଭ କରିଥିଲେ। ଆଜି ୨୦ ବର୍ଷ ବୟସରେ ସେ ମାସିକ ପ୍ରାୟ ୪ ଲକ୍ଷ ଟଙ୍କା (ପାଖାପାଖି ୪ ହଜାର ଡଲାର) ରୋଜଗାର କରୁଛନ୍ତି ଏବଂ ନିଜ ମା’ଙ୍କୁ କାମରୁ ଅବସର ପ୍ରଦାନ କରି ନିଜ ଦାୟିତ୍ୱବୋଧର ପରିଚୟ ଦେଇଛନ୍ତି ।
୨୦୨୦ ମସିହାରେ ଅସ୍ମିତ ନିଜର କ୍ୟାରିୟର ଆରମ୍ଭ କରିଥିଲେ। ପ୍ରଥମେ ସେ ଲୋକପ୍ରିୟ ଗେମ୍ ପବ୍ଜିର ଇ-ସ୍ପୋର୍ଟସ୍ ଟିମ୍ ପାଇଁ ଗ୍ରାଫିକ୍ସ ଡିଜାଇନ୍ ଏବଂ କଣ୍ଟେଣ୍ଟ୍ ଏଡିଟିଂ ଭଳି କାମ କରୁଥିଲେ। କିନ୍ତୁ ଯେତେବେଳେ ଭାରତ ସରକାର ସୁରକ୍ଷା କାରଣରୁ ପବ୍ଜି ଉପରେ କଟକଣା ଲଗାଇଲେ, ସେତେବେଳେ ତାଙ୍କ କ୍ୟାରିୟର୍ ହଠାତ୍ ଏକ ବଡ଼ ଝଟକା ଖାଇଥିଲା। ଏହାପରେ ସେ କିଛି ଦିନ ନିରାଶା ଏବଂ ଅସୁରକ୍ଷିତ ମନୋଭାବ ଭିତରେ କାଟିଥିଲେ। ଦ୍ୱାଦଶ ଶ୍ରେଣୀ ପାସ୍ କରିବା ପରେ କଲେଜ୍ ନଯାଇ ସେ ନିଜସ୍ୱ ଦକ୍ଷତା ଉପରେ ଭରସା କରିଥିଲେ। ସେ ଦିଲ୍ଲୀ ନିକଟସ୍ଥ ନୋଏଡାରେ ଥିବା ଏକ ‘ୱେବ୍-୩’ ମାର୍କେଟିଂ ଏଜେନ୍ସିରେ ମାତ୍ର ୧୫ ହଜାର ଟଙ୍କା ଦରମାରେ କାମରେ ଯୋଗ ଦେଇଥିଲେ। କିନ୍ତୁ ସେଠାରେ ରହିବା ପରିବେଶ ଭଲ ନଥିଲା ଏବଂ ଗୋଟିଏ ଖାଲି ବଖରାରେ ରହି ସେ କାମ କରୁଥିଲେ। ଶେଷରେ ସେ ସେହି ଚାକିରି ଛାଡ଼ି ପୁଣି ବିହାର ଫେରିଆସିଥିଲେ ।
ଘରକୁ ଫେରିବା ପରେ ତାଙ୍କ ଜୀବନର ମୋଡ଼ ବଦଳିଯାଇଥିଲା। ଅନଲାଇନ୍ ମାଧ୍ୟମରେ ସେ ଏକ ଡିଜାଇନର୍ ଏବଂ ବ୍ରାଣ୍ଡ୍ କନସଲଟାଣ୍ଟ୍ ଭାବେ ଫ୍ରିଲାନ୍ସ କାମ ଆରମ୍ଭ କରିଥିଲେ। ପ୍ରାରମ୍ଭରେ ସେ ମାସିକ ୨୦୦ରୁ ୩୦୦ ଡଲାର ରୋଜଗାର କରୁଥିଲେ। ଧୀରେ ଧୀରେ ତାଙ୍କର କାମ ବଢ଼ିଲା ଏବଂ ୨୦୨୫-୨୬ ଆର୍ଥିକ ବର୍ଷରେ ତାଙ୍କର ବାର୍ଷିକ ଆୟ ପ୍ରାୟ ୧୨ ଲକ୍ଷ ଟଙ୍କାରେ ପହଞ୍ଚିଥିଲା। ବର୍ତ୍ତମାନ ସେ ପ୍ରତି ମାସରେ ପ୍ରାୟ ୪ ହଜାର ଡଲାର ନିୟମିତ ଭାବେ ରୋଜଗାର କରୁଥିବା ବେଳେ, ଗୋଟିଏ ମାସରେ ତାଙ୍କର ସର୍ବାଧିକ ରୋଜଗାର ୬,୫୦୦ ଡଲାର ମଧ୍ୟ ଛୁଇଁପାରିଛି ।
ସବୁଠାରୁ ହୃଦୟସ୍ପର୍ଶୀ ବିଷୟ ହେଉଛି, ଯେତେବେଳେ ତାଙ୍କ ପାଖକୁ ଆଶାତୀତ ଅର୍ଥ ଆସିଲା, ସେ ଏହାକୁ ବିଳାସବ୍ୟସନରେ ଖର୍ଚ୍ଚ ନକରି ଏକ ଜରୁରୀକାଳୀନ ପାଣ୍ଠି (ଏମର୍ଜେନ୍ସି ଫଣ୍ଡ) ପ୍ରସ୍ତୁତ କରିଥିଲେ। ସେ ନିଜର ସ୍ୱପ୍ନର ‘ମ୍ୟାକ୍ବୁକ୍ ପ୍ରୋ’ କିଣିବା ସହ ମା’ଙ୍କ ପାଇଁ ସୁନା ଗହଣା କିଣିଥିଲେ ଏବଂ ମା’ଙ୍କୁ ଆର୍ଥିକ ଚିନ୍ତାରୁ ମୁକ୍ତି ବା ‘ଅବସର’ ଦେଇଥିଲେ। ସାରା ଜୀବନ ଭଡ଼ା ଘରେ ରହି ଆସିଥିବା ଏହି ମଧ୍ୟବିତ୍ତ ପରିବାରର ଯୁବକ ଏବେ ନିଜ ପାଇଁ ଏକ ଜମି କିମ୍ବା ଫ୍ଲାଟ୍ କିଣିବାକୁ ଅର୍ଥ ସଞ୍ଚୟ କରୁଛନ୍ତି। ଏକ୍ସରେ ତାଙ୍କର ଏହି ସଫଳତାର କାହାଣୀ ଏବେ ସୋସିଆଲ୍ ମିଡିଆରେ ଖୁବ୍ ଚର୍ଚ୍ଚା ସାଉଁଟିଛି। କେବଳ ଟଙ୍କା ପାଇଁ ନୁହେଁ, ବରଂ ନିଜର ଦୃଢ଼ ଇଚ୍ଛାଶକ୍ତି ଏବଂ ପରିବାର ପ୍ରତି ଥିବା ଦାୟିତ୍ୱବୋଧ ତାଙ୍କୁ ଆଜି ଏକ ଭିନ୍ନ ପରିଚୟ ଦେଇଛି ।
