ଭୁବନେଶ୍ୱର: ବାତ୍ୟା ‘ଅର୍ଣ୍ଣବ’ ପ୍ରଭାବରେ ଗଞ୍ଜାମ ଜିଲ୍ଲାରେ ସୃଷ୍ଟି ହୋଇଥିବା ଭୟଙ୍କର ବନ୍ୟା ପରିସ୍ଥିତିକୁ ନେଇ ଶାସକ ବିଜେପି ଏବଂ ବିରୋଧୀ ବିଜେଡି ମଧ୍ୟରେ ରାଜନୈତିକ ଆରୋପ ପ୍ରତ୍ୟାରୋପ ତୀବ୍ର ହେବାରେ ଲାଗିଛି। ଉଭୟ ଦଳ ପରସ୍ପର ଉପରକୁ ଦୋଷ ଲଦି ବୟାନବାଜି ଜାରି ରଖିଛନ୍ତି। ବାତ୍ୟା ଅର୍ଣ୍ଣବ ଆସିବା ପରେ ଗଞ୍ଜାମ, ଗଜପତି, କନ୍ଧମାଳରେ ସୃଷ୍ଟି ହୋଇଥିବା ବନ୍ୟା ସ୍ଥିତି ରାଜନେତାଙ୍କ ଅସଲ ଚେହେରାକୁ ପଦାରେ ପକାଇ ଦେଇଛି । ବନ୍ୟା ଯୋଗୁଁ ହୋଇଥିବା କ୍ଷୟକ୍ଷତି ସେମାନଙ୍କୁ ଯେତିକି ବ୍ୟଥିତ କରୁନି, କରୁଛି ରାଜନୀତି ବୟାନବାଜି ।
ସରକାରଙ୍କ ବନ୍ୟା ପରିଚାଳନା ଉପରେ ବିଜେଡିର ଆରୋପ
- ଜଳଭଣ୍ଡାର କୁପରିଚାଳନା: ବିଜେଡି ଅଭିଯୋଗ କରିଛି ଯେ ଅକ୍ଟୋବର ୨୮ ସୁଦ୍ଧା ଭଞ୍ଜନଗର, ସୋରଡ଼ା ଓ ଧନେଇ ଜଳଭଣ୍ଡାରଗୁଡ଼ିକ ପ୍ରାୟ ୮୦ ପ୍ରତିଶତ ଭର୍ତ୍ତି ଥିଲା। ପାଣି ହଠାତ୍ ବଢ଼ିବାରୁ ତଳିଆ ଅଞ୍ଚଳର ଲୋକଙ୍କୁ ବିନା କୌଣସି ପୂର୍ବ ସୂଚନା ଦେଇ ଜଳଭଣ୍ଡାରର ଗେଟ୍ ଖୋଲି ଦିଆଗଲା, ଯାହା ଦ୍ୱାରା ଗଞ୍ଜାମରେ କୃତ୍ରିମ ବନ୍ୟା ପରିସ୍ଥିତି ସୃଷ୍ଟି ହେଲା।
- ଅପାରଗତା ଓ ପ୍ରସ୍ତୁତିର ଅଭାବ: ବାତ୍ୟା ଓ ପ୍ରବଳ ବର୍ଷା ନେଇ ପୂର୍ବାନୁମାନ ଥିଲେ ମଧ୍ୟ ବିଜେପି ସରକାର ଆଗୁଆ ପ୍ରସ୍ତୁତି କରିବାରେ ସମ୍ପୂର୍ଣ୍ଣ ବିଫଳ ହୋଇଛନ୍ତି। ନଦୀବନ୍ଧ ମରାମତି ଏବଂ ଜଳ ନିଷ୍କାସନ ବ୍ୟବସ୍ଥା ନେଇ ସରକାରଙ୍କ କୌଣସି ଦୂରଦୃଷ୍ଟି ନଥିଲା।
- ରିଲିଫ୍ ବିତରଣରେ ବିଫଳତା: ବିଜେଡି ନେତ୍ରୀ ପ୍ରମିଳା ମଲ୍ଲିକ ଓ ଦଳର ନେତାମାନେ ଅଭିଯୋଗ କରିଛନ୍ତି ଯେ ସରକାର ପ୍ରଭାବିତ ଅଞ୍ଚଳରେ ଲୋକଙ୍କ ପାଖରେ ରିଲିଫ୍ ପହଞ୍ଚାଇବା ପରିବର୍ତ୍ତେ କେବଳ ପଦପ୍ରଚାରରେ ବ୍ୟସ୍ତ ଅଛନ୍ତି।
ବିଜେପିର ପ୍ରତ୍ୟାରୋପ ଓ ଜବାବ
- ନବୀନ ପଟ୍ଟନାୟକଙ୍କ ‘ନିଖୋଜ’ ପୋଷ୍ଟର ରାଜନୀତି: ଦି ପ୍ରିଣ୍ଟର ନଭେମ୍ବର ୨, ୨୦୨୬ ରିପୋର୍ଟ ଅନୁସାରେ, ଗଞ୍ଜାମ ଜିଲ୍ଲାର ହିଞ୍ଜିଳି ବସଷ୍ଟାଣ୍ଡରେ ବିରୋଧୀ ଦଳ ନେତା ତଥା ସ୍ଥାନୀୟ ବିଧାୟକ ନବୀନ ପଟ୍ଟନାୟକଙ୍କ ଏକ “ନିଖୋଜ” (Missing) ପୋଷ୍ଟର ଲଗାଯାଇଥିଲା। ଏହାକୁ ନେଇ ବିଜେପି ମୁଖପାତ୍ର ଅନିଲ ବିଶ୍ୱାଳ କଟାକ୍ଷ କରି କହିଛନ୍ତି ଯେ ଦୁର୍ଦ୍ଦିନ ସମୟରେ ଲୋକେ ନିଜ ପ୍ରତିନିଧିଙ୍କୁ ପାଖରେ ନପାଇ ଏଭଳି ପୋଷ୍ଟର ମାରିଛନ୍ତି। ନବୀନ ବାବୁ ମୁଖ୍ୟମନ୍ତ୍ରୀ ଥିବା ବେଳେ ହେଲିକପ୍ଟରରେ ବନ୍ୟାଞ୍ଚଳ ବୁଲୁଥିଲେ, ହେଲେ ଏବେ ବିରୋଧୀ ଦଳ ନେତା ଭାବେ ନିଜ ନିର୍ବାଚନ ମଣ୍ଡଳୀକୁ ମଧ୍ୟ ଯାଉନାହାନ୍ତି।
- ୨୪ ବର୍ଷର ଶାସନକୁ ନେଇ ପ୍ରଶ୍ନ: ବିଜେପି ଓଲଟା ପ୍ରଶ୍ନ କରିଛି ଯେ ବିଜେଡି ତାର ୨୪ ବର୍ଷର ଶାସନ କାଳରେ ଗଞ୍ଜାମର ନଦୀବନ୍ଧ ଏବଂ ଜଳ ସଂରକ୍ଷଣ ଭିତ୍ତିଭୂମି ପାଇଁ କ’ଣ କରିଥିଲା?
- ଆହ୍ୱାନ ଓ ଖଣ୍ଡନ: ବିଜେପି ନେତାମାନେ ବିଜେଡିର ଅଭିଯୋଗକୁ ସମ୍ପୂର୍ଣ୍ଣ ଖଣ୍ଡନ କରିବା ସହ ଏହି ପ୍ରାକୃତିକ ବିପର୍ଯ୍ୟୟ ସମୟରେ ବିଭ୍ରାନ୍ତିକର ରାଜନୀତି ନକରି ପ୍ରଭାବିତ ଲୋକଙ୍କ ସହାୟତା ପାଇଁ ମିଳିମିଶି କାମ କରିବାକୁ ଆହ୍ୱାନ ଦେଇଛନ୍ତି।
ରାଜ୍ୟ ସାଧାରଣ ସମ୍ପାଦକ ବିରଂଚି ନାରାୟଣ ତ୍ରିପାଠୀ କହିଛନ୍ତି, ଗଜପତି, ଗଞ୍ଜାମ ଓ କନ୍ଧମାଳ ଜିଲ୍ଲାରେ ଏହି ବାତ୍ୟା ବିଶେଷ ଭାବେ କ୍ଷତି ପହଁଚାଇଛି। ଏହା ମୁଖ୍ୟ କାରଣ ହେଉଛି ବାତ୍ୟା ସମୟରେ ସର୍ବାଧିକ ବୃଷ୍ଟିପାତ। ୧୯୯୦ ମସିହା ବାତ୍ୟା, ୧୯୯୯ ମହାବାତ୍ୟା, ୨୦୧୮ରେ ଆସିଥିବା ତିତିଲି ବାତ୍ୟାଠାରୁ ଅର୍ଣ୍ଣବ ସମୟରେ ସର୍ବକାଳୀନ ରେକର୍ଡ ପରିମାଣର ବର୍ଷା ହେଇଛି। ଯେଉଁଥିପାଇଁ ଏହି ପ୍ରକାର ବନ୍ୟା ହୋଇଛି। ଦୀର୍ଘ ୨୪ ବର୍ଷ ମଧ୍ୟରେ ନବୀନ ସରକାରରେ କୌଣସି ଗୋଟିଏ ହେଲେ ଡ୍ୟାମ୍ ବା ରିଜର୍ଭହେୟାର ପ୍ରତିଷ୍ଠା କରାଯାଇନାହିଁ। ତତ୍କାଳୀନ ମୁଖ୍ୟମନ୍ତ୍ରୀ ନିଜେ ଅଧିକାଂଶ ସମୟ ଜଳ ସେଚନ ବିଭାଗର ଦାୟିତ୍ୱରେ ଥିଲେ ମଧ୍ୟ ଏ ସଂକ୍ରାନ୍ତରେ କୌଣସି ପଦକ୍ଷେପ ନ ନେବା ଦୁଃଖଦାୟକ। ତେଣୁ ଏହି ବନ୍ୟା ବିତ୍ପାତ ପାଇଁ ନବୀନ ବାବୁଙ୍କ ଅପାରଗତା ଓ ଅପରିଣାମଦର୍ଶିତା ଦାୟୀ।
ବିରୋଧୀ ବିଭିନ୍ନ ପ୍ରକାର ଭୁଲ୍ ତଥ୍ୟ ଦେଇ ଅପପ୍ରଚାର କରୁଛନ୍ତି ଯେ, ବନ୍ୟା ନିୟନ୍ତ୍ରଣ ପାଇଁ ସରକାରଙ୍କ ତରଫରୁ କୌଣସି ଜଳସ୍ତରକୁ କମାଗଲା ନାହିଁ। ମାତ୍ର ସେମାନେ ଜାଣିବା ଦରକାର ଯେ, ଘୋଡ଼ାହାଡ଼ ଡ୍ୟାମ୍ରେ ଗତ ଅକ୍ଟୋବର ୨୮ ତାରିଖ ପୂର୍ବରୁ ୬୭.୯୫ ପ୍ରତିଶତ ଜଳ ଥିଲା, ତାକୁ କମ୍କରି ୬୨.୫୭ ପ୍ରତିଶତ କରାଗଲା। ହରଭଙ୍ଗୀରେ ୭୯.୦୯ ପ୍ରତିଶତ ଥିଲା, ତାକୁ କମ୍ କରି ୭୨.୮୧ ପ୍ରତିଶତ କରାଗଲା। ସୋରଡ଼ାରେ ୯୨.୧୧ ପ୍ରତିଶତ ଜଳ ଥିଲା, ତାକୁ କମ୍କରି ୮୬.୩୪ ପ୍ରତିଶତ କରାଗଲା । ସେହିପରି ବାହୁଦା, ବାଘଲଟି, ଦହ, ଧନେଇ ଓ ଘଟକେଶ୍ୱରରେ ମଧ୍ୟ ବାତ୍ୟା ପୂର୍ବରୁ ଜଳସ୍ତର କମେଇ ଦିଆଯାଇଥିଲା।
ତେଣୁ ସରକାର ସମ୍ପୂର୍ଣ୍ଣ ରୂପେ ପୂର୍ବ ପ୍ରସ୍ତୁତି କରିଥିଲେ। କିନ୍ତୁ ବର୍ଷା ଯେଉଁ ପରିମାଣର ହେଲା ତାହା ସବୁ ରେକର୍ଡ ଭାଙ୍ଗି ଦେଇଛି। ସାଧାରଣତଃ ଅକ୍ଟୋବର ମାସରେ ବର୍ଷାର ହାରାହାରି ପରିମାଣ ପ୍ରାୟ ୧୯୦ ମିଲିମିଟର ଥିଲାବେଳେ ୨୦୨୬ ଅକ୍ଟୋବରରେ ଏହା ୨ ଗୁଣାରୁ ଅଧିକ ହୋଇ ୪୦୦ ମିଲିମିଟରରୁ ଅଧିକ ଥିଲା। ଅକ୍ଟୋବର ୨୮ରୁ ୩୦ ତାରିଖ ପର୍ଯ୍ୟନ୍ତ ରେକର୍ଡ ସଂଖ୍ୟକ ୫୦୦ ମିଲିମିଟରରୁ ଉର୍ଦ୍ଧ୍ୱ ବର୍ଷା ଗଞ୍ଜାମ ଜିଲ୍ଲାରେ ହୋଇଥିଲା। ମାତ୍ର ୭ରୁ ୮ ଘଂଟା ମଧ୍ୟରେ ଏଭଳି ବର୍ଷା କେବିବି ଗଂଜାମରେ ହୋଇନଥିଲା । ଅକ୍ଟୋବର ୨୩ ତାରିଖରେ ବାତ୍ୟା ଅର୍ଣ୍ଣବ ସୂଚନା ଆସିବା ମାତ୍ରେ ସରକାରଙ୍କ ତରଫରୁ ଯଥେଷ୍ଟ ପ୍ରତିଶେଧମୂଳକ ପ୍ରସ୍ତୁତି କରାଯାଇ ଏସ୍ଆରସି, ଆଇଏମଡି, ସିଡବ୍ଲ୍ୟୁସି ଓ ଜିଲ୍ଲା ପ୍ରଶାସନ ଭଳି ବିଭିନ୍ନ ବିଭାଗ ମଧ୍ୟରେ ସମନ୍ୱୟ ସ୍ଥାପନ କରାଯାଇଥିଲା।
ପ୍ରତ୍ୟେକ ଘଂଟାରେ ବର୍ଷାର ପରିମାଣ, ନଦୀର ଜଳ ପ୍ରବାହ, ଜଳ ଭଣ୍ଡାରର ସ୍ଥିତିର ସମୀକ୍ଷା କରାଯାଇଥିଲା। ଏହି ପ୍ରାକୃତିକ ଦୁର୍ବିପାକ ପରେ ରାଜ୍ୟ ସରକାରଙ୍କ ପକ୍ଷରୁ କେନ୍ଦ୍ର ଗୃହମନ୍ତ୍ରୀଙ୍କ ସହ ଆଲୋଚନା ପରେ ଆନ୍ତଃମନ୍ତ୍ରାଳୟସ୍ତରୀୟ ଏକ କମିଟି ଗଞ୍ଜାମ, ଗଜପତି ଓ କନ୍ଧମାଳ ଜିଲ୍ଲାରେ ଗସ୍ତ କରି କ୍ଷୟକ୍ଷତି ଆକଳନ କରୁଛନ୍ତି। ଆକଳନ କାର୍ଯ୍ୟ ଜାରି ରହିଥିବାବେଳେ ମଧ୍ୟ ବିଜେପିର ମୋହନ ମାଝୀଙ୍କ ସରକାରଙ୍କ ତରଫରୁ ଭରପୁର ସହାୟତା ଘୋଷଣା କରାଯାଇଛି।