ନୂଆଦିଲ୍ଲୀ: ହିନ୍ଦୁ ଧର୍ମରେ ଗରୁଡ଼ ପୁରାଣକୁ କେବଳ ମୃତ୍ୟୁର ରହସ୍ୟ ଉନ୍ମୋଚନ କରୁଥିବା ଗ୍ରନ୍ଥ ନୁହେଁ, ବରଂ ଏକ ଉତ୍ତମ ଜୀବନଶୈଳୀର ଶ୍ରେଷ୍ଠ ମାର୍ଗଦର୍ଶିକା ଭାବରେ ବିବେଚନା କରାଯାଏ। ଅଧିକାଂଶ ସମୟରେ ମଣିଷ ଭାବିଥାଏ ଯେ ତା’ ଦ୍ୱାରା କରାଯାଇଥିବା ପାପ ବା ଖରାପ କର୍ମ ଦୁନିଆ ଆଖିରୁ ଲୁଚି ରହିଛି।
କିନ୍ତୁ ଗରୁଡ଼ ପୁରାଣର ବର୍ଣ୍ଣନା ଅନୁଯାୟୀ, ମୃତ୍ୟୁ ପରେ ଯମଲୋକରେ ପ୍ରତ୍ୟେକ ବ୍ୟକ୍ତିର ଛୋଟବଡ଼ କର୍ମର ଟିକିନିଖି ହିସାବ ହୋଇଥାଏ। ଭଗବାନ ବିଷ୍ଣୁ ଏବଂ ତାଙ୍କ ବାହନ ଗରୁଡ଼ଙ୍କ ମଧ୍ୟରେ ହୋଇଥିବା ଦିବ୍ୟ କଥୋପକଥନ ଉପରେ ଆଧାରିତ ଏହି ମହାପୁରାଣ ସ୍ପଷ୍ଟ କରେ ଯେ, ମଣିଷର କର୍ମ ହିଁ ନିର୍ଦ୍ଧାରଣ କରେ ତା’ର ଆତ୍ମାକୁ ଶାନ୍ତି ମିଳିବ ନା ନର୍କର ଭୟଙ୍କର ଯନ୍ତ୍ରଣା ଭୋଗିବାକୁ ପଡ଼ିବ।
ଯେତେବେଳେ ଆତ୍ମା ଶରୀର ତ୍ୟାଗ କରେ, ଯମଦୂତମାନେ ତାଙ୍କୁ ଯମଲୋକକୁ ନେଇଯାଆନ୍ତି। ସେଠାରେ ଧର୍ମରାଜଙ୍କ ଦରବାରରେ ଚିତ୍ରଗୁପ୍ତ ସମ୍ପୃକ୍ତ ବ୍ୟକ୍ତିର ଜୀବନବ୍ୟାପୀ କର୍ମର ପୂର୍ଣ୍ଣ ବିବରଣୀ ଉପସ୍ଥାପନ କରନ୍ତି। ଯଦି ଜୀବନରେ ପୁଣ୍ୟ କର୍ମ ଅଧିକ ଥାଏ, ତେବେ ଆତ୍ମାକୁ ସୁଖ ଓ ସଦ୍ଗତି ପ୍ରାପ୍ତ ହୁଏ। କିନ୍ତୁ ଯଦି ଜୀବନ ପାପରେ ପୂର୍ଣ୍ଣ ଥାଏ, ତେବେ ଯମରାଜଙ୍କ କଠୋର ଦଣ୍ଡର ସାମ୍ନା କରିବାକୁ ପଡ଼ିଥାଏ।
ଗରୁଡ଼ ପୁରାଣରେ ବର୍ଣ୍ଣିତ କିଛି ମହାପାପ ଓ ତାହାର ପରିଣାମ:
ଗୋହତ୍ୟା ଏବଂ ଗୋମାତାଙ୍କୁ କଷ୍ଟ ଦେବା:
ସନାତନ ଧର୍ମରେ ଗାଈକୁ ମାତାର ମାନ୍ୟତା ଦିଆଯାଇଛି ଏବଂ ସେ ପୂଜନୀୟା। ଗରୁଡ଼ ପୁରାଣ ଅନୁଯାୟୀ, ଯେଉଁ ବ୍ୟକ୍ତି ଗୋହତ୍ୟା କରେ କିମ୍ବା ଗାଈମାନଙ୍କୁ ଅକାରଣରେ କଷ୍ଟ ଦିଏ, ତାକୁ ମହାପାପୀ ଶ୍ରେଣୀରେ ଭୁକ୍ତ କରାଯାଏ। ଏଭଳି ବ୍ୟକ୍ତିର ଆତ୍ମାକୁ ମୃତ୍ୟୁ ପରେ କେବେବି ଶାନ୍ତି ମିଳେନାହିଁ ଏବଂ ଯମଲୋକରେ ତାକୁ ଯୁଗ ଯୁଗ ଧରି କଠୋର ଯନ୍ତ୍ରଣା ଭୋଗିବାକୁ ପଡ଼ିଥାଏ।
ପିତାମାତା ଓ ଗୁରୁଜନଙ୍କୁ ଅପମାନ:
ବର୍ତ୍ତମାନର ଆଧୁନିକ ସମାଜରେ ଅନେକ ସମୟରେ ଲୋକେ ନିଜର ବୟସ୍କ ପିତାମାତା ଓ ଗୁରୁଜନଙ୍କୁ ଉପଯୁକ୍ତ ସମ୍ମାନ ଦେବାକୁ ଭୁଲିଯାଆନ୍ତି। ଗରୁଡ଼ ପୁରାଣ ଚେତାବନୀ ଦିଏ ଯେ, ଯେଉଁମାନେ ସନ୍ତାନ ଭାବରେ ନିଜର କର୍ତ୍ତବ୍ୟ ପାଳନ କରନ୍ତି ନାହିଁ କିମ୍ବା ବିଦ୍ୟାଦାତା ଗୁରୁଙ୍କୁ ଅପମାନିତ କରନ୍ତି, ସେମାନଙ୍କୁ ଯମଲୋକରେ ଅତ୍ୟନ୍ତ ପୀଡ଼ାଦାୟକ ଶାସ୍ତି ମିଳେ। ପିତାମାତା ଏବଂ ଗୁରୁଙ୍କୁ ଭଗବାନଙ୍କ ସ୍ୱରୂପ ମାନିଆସିଥିବା ସମାଜରେ ସେମାନଙ୍କୁ ମାନସିକ ବା ଶାରୀରିକ ଆଘାତ ଦେବା ସିଧାସଳଖ ଯମରାଜଙ୍କ କ୍ରୋଧକୁ ନିମନ୍ତ୍ରଣ କରିବା ସହ ସମାନ।
ଭ୍ରୂଣ ହତ୍ୟା- ସବୁଠାରୁ ଜଘନ୍ୟ ଅପରାଧ:
ସମାଜରେ ଭ୍ରୂଣ ହତ୍ୟାକୁ ଏକ ଜଘନ୍ୟ ଅପରାଧ ଭାବେ ଗ୍ରହଣ କରାଯାଏ। ଗରୁଡ଼ ପୁରାଣରେ ମଧ୍ୟ ଏହାକୁ ସବୁଠାରୁ ଗମ୍ଭୀର ପାପ ବୋଲି ଦର୍ଶାଯାଇଛି। ପୃଥିବୀର ଆଲୋକ ଦେଖିନଥିବା ଏକ ଅଜନ୍ମା ଜୀବକୁ ହତ୍ୟା କରୁଥିବା ବ୍ୟକ୍ତିକୁ ନର୍କରେ ଏପରି ନିର୍ମମ ଯାତନା ଦିଆଯାଏ, ଯାହାର କଳ୍ପନା ମାତ୍ରେ ହିଁ ଦେହ ଶିତେଇ ଉଠେ। ଏଭଳି ମହାପାପୀମାନଙ୍କ ପାଇଁ ମୋକ୍ଷର ଦ୍ୱାର ଚିରଦିନ ପାଇଁ ବନ୍ଦ ହୋଇଯାଏ।
ବିଶ୍ୱାସଘାତକତା ଓ ମିଛ ସାକ୍ଷୀ ପ୍ରଦାନ:
ନିଜ ସ୍ୱାର୍ଥ ପାଇଁ ଅନ୍ୟର ବିଶ୍ୱାସ ଭାଙ୍ଗିବା କିମ୍ବା ମିଥ୍ୟା ସାକ୍ଷ୍ୟ ଦେଇ ନିର୍ଦ୍ଦୋଷ ବ୍ୟକ୍ତିକୁ ଅସୁବିଧାରେ ପକାଇବା ମଧ୍ୟ ନର୍କର ରାସ୍ତା ପ୍ରଶସ୍ତ କରେ। ଗରୁଡ଼ ପୁରାଣ କହୁଛି ଯେ, ଯେଉଁ ବ୍ୟକ୍ତି ଅନ୍ୟମାନଙ୍କ ସହ ଛଳ କପଟ କରେ କିମ୍ବା ନିଜ ସ୍ୱାର୍ଥ ହାସଲ ପାଇଁ ବିଶ୍ୱାସଘାତକତାକୁ ଅସ୍ତ୍ର ଭାବେ ବ୍ୟବହାର କରେ, ମୃତ୍ୟୁ ପରେ ତାକୁ ଅକଥନୀୟ ଯନ୍ତ୍ରଣାର ସାମ୍ନା କରିବାକୁ ପଡ଼େ।
