CJP on Detentions: ‘ଜନତାଙ୍କ ଉପରେ ଖାକିର ଚାପ…ନିଜ ନାଗରିକଙ୍କ ବିରୋଧରେ ସରକାରଙ୍କ ଯୁଦ୍ଧ!’, ମୁକୁଳିବା ପରେ ସରକାରଙ୍କୁ ଘେରିଲେ CJP ନେତା
ନୂଆଦିଲ୍ଲୀ: ଦିଲ୍ଲୀରେ CJPର ଆନ୍ଦୋଳନକୁ ନେଇ ରାଜନୈତିକ ଉତ୍ତେଜନା ଥମିବାର ନାଁ ନେଉନାହିଁ। ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାରଙ୍କ ଇସ୍ତଫା ଦାବିରେ ଶନିବାର ହୋଇଥିବା ପ୍ରତିବାଦ ଓ ବ୍ୟାପକ ଅଟକ ପରେ ରବିବାର ଏକ୍ଜିକ୍ୟୁଟିଭ୍ ମାଜିଷ୍ଟ୍ରେଟ୍ କୋର୍ଟ CJPର ପ୍ରମୁଖ ନେତା ଅଭିଜିତ ଦିପ୍କେ, ସୌରଭ ଦାସ ଓ ଆଶୁତୋଷ ରାଙ୍କାଙ୍କୁ ମୁକ୍ତ କରିବାକୁ ଆଦେଶ ଦେଇଛନ୍ତି। ତେବେ ଏଥିପାଇଁ ଆସନ୍ତା ଏକ ବର୍ଷ ପର୍ଯ୍ୟନ୍ତ ଶାନ୍ତିଭଙ୍ଗ ନକରିବା ସର୍ତ୍ତ ରଖାଯାଇଛି। ଦିଲ୍ଲୀ ପୋଲିସ କହିଛି, ଶାନ୍ତି ଓ ସଦ୍ବ୍ୟବହାର ବଜାୟ ରଖିବା ପାଇଁ ୫୦ ହଜାର ଟଙ୍କାର ବଣ୍ଡ ଦାଖଲ ହୋଇଛି।
ମୁକ୍ତ ହେବା ପରେ CJP ନେତାମାନେ ଦିଲ୍ଲୀ ପୋଲିସର କାର୍ଯ୍ୟଶୈଳୀକୁ ନେଇ ଗୁରୁତର ଅଭିଯୋଗ ଆଣିଛନ୍ତି। ସୌରଭ ଦାସ କହିଛନ୍ତି, ସରକାର ସାମ୍ବାଦିକ ଓ ନାଗରିକଙ୍କ ସହ ଯୁଦ୍ଧ କରୁଛନ୍ତି। “ଭାରତରେ ସାମ୍ବାଦିକତା କ’ଣ ଅପରାଧ?” ବୋଲି ସେ ପ୍ରଶ୍ନ ଉଠାଇଛନ୍ତି। ତାଙ୍କ ଅଭିଯୋଗ ଅନୁସାରେ, ଅଟକ ସମୟରେ ପୋଲିସ ଆନୁଷ୍ଠାନିକ ନୋଟିସ୍ ଦେଇନଥିଲା, ମୋବାଇଲ୍ ଫୋନ୍ ନେଇଯାଇଥିଲା ଏବଂ ଓକିଲଙ୍କ ସହ କଥା ହେବାକୁ ଦେଇନଥିଲା।
ସୌରଭ ଦାସ ଆହୁରି ଅଭିଯୋଗ କରିଛନ୍ତି ଯେ, ପ୍ରାୟ ୨୪ ଘଣ୍ଟା ଫୋନ୍ ନିଜ ପାଖରେ ରଖାଯାଇଥିବାରୁ ଫୋନ୍ର ତଥ୍ୟ ହ୍ୟାକ୍ କିମ୍ବା କ୍ଲୋନ୍ କରାଯାଇଥିବା ଏବଂ ପ୍ରମାଣ ରଖିଦିଆଯାଇଥିବା ନେଇ ସେମାନେ ଆଶଙ୍କା କରୁଛନ୍ତି। ସୌରଭ ଦାସ ସରକାରଙ୍କ କାର୍ଯ୍ୟକଳାପକୁ ୧୯୭୫ର ଜରୁରୀକାଳୀନ ପରିସ୍ଥିତି ସହ ତୁଳନା କରିଥିବା ବେଳେ ଦେଶକୁ ଗୃହଯୁଦ୍ଧ ସଦୃଶ ସ୍ଥିତି ଆଡ଼କୁ ଠେଲି ଦିଆଯାଉଥିବା ଅଭିଯୋଗ କରିଛନ୍ତି। ସେ ଜାତୀୟ ମାନବାଧିକାର ଆୟୋଗ (NHRC) ଓ ସୁପ୍ରିମକୋର୍ଟଙ୍କ ଭୂମିକା ଉପରେ ମଧ୍ୟ ପ୍ରଶ୍ନ ଉଠାଇଛନ୍ତି।
CJP ନେତା ଆଶୁତୋଷ ରାଙ୍କା ଅଭିଯୋଗ କରିଛନ୍ତି ଯେ, ତାଙ୍କୁ ଓ ଅନ୍ୟ ନେତାଙ୍କୁ ବିମାନରୁ ନେଇଯାଇଥିଲା। ସେ ଏହାକୁ ଅପହରଣ ବୋଲି ବର୍ଣ୍ଣନା କରିଛନ୍ତି। ଦିପ୍କେ, ଦାସ ଓ ରାଙ୍କାଙ୍କୁ ଭିନ୍ନ ଭିନ୍ନ ସ୍ଥାନରେ ରଖାଯାଇଥିବା ମଧ୍ୟ ସୌରଭ ଦାସ ଦାବି କରିଛନ୍ତି।
ପୋଲିସର ଆଚରଣକୁ ନେଇ ରାଙ୍କା ଅସନ୍ତୋଷ ପ୍ରକାଶ କରିବା ସହ ଅଟକ ସମୟରେ ଅଭିଜିତ ଦିପ୍କେଙ୍କୁ ତାଙ୍କ ଜେଜେମା’ଙ୍କ ମୃତ୍ୟୁ ଖବର ଦିଆଯାଇଥିବା ଘଟଣାକୁ ନେଇ ମଧ୍ୟ ଅଭିଯୋଗ କରିଛନ୍ତି। ସେ କହିଛନ୍ତି, ଏହି ଲଢ଼େଇ ଏବେ ଆରମ୍ଭ ହୋଇଛି ଏବଂ ଆନ୍ଦୋଳନ ଜାରି ରହିବ।
ଅନ୍ୟପଟେ ଦିପ୍କେ ସୋସିଆଲ୍ ମିଡିଆ ପୋଷ୍ଟରେ ପ୍ରଧାନମନ୍ତ୍ରୀ ମୋଦୀଙ୍କୁ ‘ଭାରତ ପାଇଁ ଲଜ୍ଜା’ ବୋଲି କହି ସମାଲୋଚନା କରିଛନ୍ତି। ମୋଦି ପ୍ରଧାନମନ୍ତ୍ରୀ ଭାବେ ଭାରତ ପାଇଁ ଲଜ୍ଜା ବୋଲି ସେ ସୋସିଆଲ୍ ମିଡିଆ ପ୍ଲାଟଫର୍ମ Xରେ ଲେଖିଛନ୍ତି। ଏହା ସହ ଭାରତ ଏତେ ବଡ଼ ‘କାପୁରୁଷ’ ଓ ‘ଦାଦାଗିରି କରୁଥିବା’ ବ୍ୟକ୍ତିଙ୍କୁ କେବେ ଦେଖିନାହିଁ ବୋଲି ମଧ୍ୟ ଅଭିଯୋଗ କରିଛନ୍ତି।
ସେପଟେ ଦିଲ୍ଲୀ ପୋଲିସ ଶନିବାରର ଘଟଣାକୁ ନେଇ ୨୦ରୁ ଅଧିକ FIR ରୁଜୁ କରିଛି। ସରକାରୀ କାମରେ ବାଧା ସୃଷ୍ଟି ଓ ପୋଲିସ କର୍ମଚାରୀଙ୍କ ଉପରେ ଆକ୍ରମଣ ଭଳି ଅଭିଯୋଗ ଏଥିରେ ରହିଛି।
ଏହି ଘଟଣାକୁ ନେଇ ବିରୋଧୀ ଦଳଗୁଡ଼ିକ ମଧ୍ୟ ପ୍ରତିକ୍ରିୟା ଦେଇଛନ୍ତି। କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡ଼ଗେ କହିଛନ୍ତି ଯେ, ଏହି ପ୍ରସଙ୍ଗରେ ଇଣ୍ଡି ମେଣ୍ଟର ନେତାମାନେ ସୋମବାର ଭାରତର ପ୍ରଧାନ ବିଚାରପତିଙ୍କୁ ଭେଟିବେ। ରାହୁଲ ଗାନ୍ଧୀ ସରକାରଙ୍କ ଉପରେ ଗଣତନ୍ତ୍ରକୁ ଦମନ କରୁଥିବା ଅଭିଯୋଗ ଆଣିଛନ୍ତି।
ଦିଲ୍ଲୀ ବାହାରେ ମଧ୍ୟ ପ୍ରତିବାଦର ଡାକରା ଦିଆଯାଇଛି। CJPର ସାଂଗଠନିକ ଦାୟିତ୍ୱରେ ଥିବା ଅଜିଙ୍କ୍ୟ ସିନ୍ଦେ ମୁମ୍ବାଇର ଶିବାଜୀ ପାର୍କ ନିକଟ ଟି ଜଙ୍କସନ୍ରେ ଅପରାହ୍ନ ୪ଟାରେ ପ୍ରଦର୍ଶନ ଘୋଷଣା କରିଛନ୍ତି। ଲକ୍ଷ୍ନୌରେ ମଧ୍ୟ ଛାତ୍ର ସଂଗଠନଗୁଡ଼ିକ ଜ୍ଞାନେଶ କୁମାରଙ୍କ ଇସ୍ତଫା ଦାବିରେ ମିଳିତ ପ୍ରତିବାଦ ଡାକରା ଦେଇଛନ୍ତି।
CJPର ଦାବି ହେଉଛି, ଭୋଟର ତାଲିକାରୁ ବ୍ୟାପକ ନାମ ବାଦ୍ ପଡ଼ିବା ଓ ଅନିୟମିତତାର ଅଭିଯୋଗର ତଦନ୍ତ ହେଉ। ଏବେ ଦଳର ପରବର୍ତ୍ତୀ ସାମ୍ବାଦିକ ସମ୍ମିଳନୀ, ନୂଆ ପ୍ରତିବାଦ ଓ ବିରୋଧୀ ମେଣ୍ଟର CJIଙ୍କ ସହ ପ୍ରସ୍ତାବିତ ସାକ୍ଷାତ ଉପରେ ସମସ୍ତଙ୍କ ନଜର ରହିଛି।