ଅଗଷ୍ଟ ୧୭ରୁ ଆରମ୍ଭ ହୋଇପାରେ ସଂସଦର ସ୍ୱତନ୍ତ୍ର ଅଧିବେଶନ: ସୀମା ନିର୍ଦ୍ଧାରଣ ଓ ମହିଳା ଆରକ୍ଷଣ ବିଲ୍ ଉପରେ ହୋଇପାରେ ଆଲୋଚନା
ନୂଆଦିଲ୍ଲୀ: କେନ୍ଦ୍ର ସରକାର ଆସନ୍ତା ଅଗଷ୍ଟ ୧୭ ତାରିଖରୁ ସଂସଦର ଏକ ସ୍ୱତନ୍ତ୍ର ଅଧିବେଶନ ଆହୂତ କରିବାକୁ ଯୋଜନା କରୁଥିବା ନେଇ ଗୁରୁତ୍ୱପୂର୍ଣ୍ଣ ସୂଚନା ମିଳିଛି। ଏହି ସ୍ୱତନ୍ତ୍ର ଅଧିବେଶନରେ ସୀମା ନିର୍ଦ୍ଧାରଣ (ଡିଲିମିଟେସନ୍) ଏବଂ ମହିଳା ଆରକ୍ଷଣ ସମ୍ପର୍କିତ ପ୍ରମୁଖ ବିଲ୍ଗୁଡ଼ିକ ଉପରେ ବ୍ୟାପକ ଆଲୋଚନା ସହ ଏଗୁଡ଼ିକୁ ଗୃହୀତ କରାଇବା ପାଇଁ ପ୍ରଶାସନିକ ସ୍ତରରେ ପ୍ରସ୍ତୁତି ଚାଲିଥିବା ସରକାରୀ ସୂତ୍ରରୁ ଜଣାପଡ଼ିଛି ।
ଦେଶରେ ଆଗାମୀ ଦିନରେ ହେବାକୁ ଥିବା ଲୋକସଭା ଓ ବିଧାନସଭା ଆସନଗୁଡ଼ିକର ସୀମା ନିର୍ଦ୍ଧାରଣ ପ୍ରକ୍ରିୟା ଏବଂ ‘ନାରୀ ଶକ୍ତି ବନ୍ଦନ ଅଧିନିୟମ’କୁ ପୂର୍ଣ୍ଣାଙ୍ଗ ରୂପେ କାର୍ଯ୍ୟକାରୀ କରିବା ଦିଗରେ ଏହି ଅଧିବେଶନ ଅତ୍ୟନ୍ତ ନିର୍ଣ୍ଣାୟକ ସାବ୍ୟସ୍ତ ହୋଇପାରେ। ମହିଳାଙ୍କ ପାଇଁ ୩୩ ପ୍ରତିଶତ ଆରକ୍ଷଣ ବ୍ୟବସ୍ଥାକୁ ବାସ୍ତବ ରୂପ ଦେବା ପାଇଁ ସୀମା ନିର୍ଦ୍ଧାରଣ ପ୍ରକ୍ରିୟା ଆବଶ୍ୟକ ହୋଇଥିବାରୁ, ସରକାର ଆଇନଗତ ମାର୍ଗ ପ୍ରଶସ୍ତ କରିବାକୁ ଏହି ସ୍ୱତନ୍ତ୍ର କଦମ ଉଠାଉଥିବା କୁହାଯାଉଛି ।
ସଂସଦର ନିୟମିତ ମୌସୁମୀ ଅଧିବେଶନ ବ୍ୟତୀତ ଏଭଳି ସ୍ୱତନ୍ତ୍ର ଅଧିବେଶନ ଡକାଯିବାର ସମ୍ଭାବନା ଜାତୀୟ ରାଜନୀତିରେ ବେଶ ଚର୍ଚ୍ଚା ସୃଷ୍ଟି କରିଛି। ଏହି ସ୍ୱତନ୍ତ୍ର ଗୃହ କାର୍ଯ୍ୟକାଳ ମଧ୍ୟରେ ସୀମା ନିର୍ଦ୍ଧାରଣ ସହିତ ଜଡ଼ିତ ଅନ୍ୟ କେତେକ ସଂସ୍କାରମୂଳକ ବିଲ୍ ମଧ୍ୟ ଆଗତ କରାଯିବାର ଯୋଜନା ରହିଛି। ତେବେ ଅଧିବେଶନର ନିର୍ଦ୍ଦିଷ୍ଟ କାର୍ଯ୍ୟସୂଚୀ ଓ ସମୟସୀମା ସମ୍ପର୍କରେ କେନ୍ଦ୍ରୀୟ ସଂସଦୀୟ ବ୍ୟାପାର ମନ୍ତ୍ରଣାଳୟ ପକ୍ଷରୁ ଖୁବଶୀଘ୍ର ଆନୁଷ୍ଠାନିକ ବିଜ୍ଞପ୍ତି ପ୍ରକାଶ ପାଇବ ।
