ହକି ଇଣ୍ଡିଆ ଲିଗ୍: ଆଜି ଗ୍ରାଉଣ୍ଡକୁ ଓହ୍ଲାଇବ ଡିଫେଣ୍ଡିଂ ଚମ୍ପିଆନ୍ କଳିଙ୍ଗ ଲାନସର୍ସ

ରାଉରକେଲା:ଦୀର୍ଘ ୭ ବର୍ଷ ଅପେକ୍ଷାର ଅନ୍ତ ଘଟି ବିର୍ସା ମୁଣ୍ଡା ହକି ଷ୍ଟାଡିୟମରେ ଆରମ୍ଭ ହୋଇଯାଇଛି ହକି ଇଣ୍ଡିଆ ଲିଗ୍‌। ତେବେ ଆଜି ହେଉଛି ଏହି ଲିଗ୍ ର ତୃତୀୟ ଦିନ । ତେବେ ଡିଫେଣ୍ଡିଂ ଚମ୍ପିଆନ୍ କଳିଙ୍ଗ ଲାନସର୍ସ ଆଜି ଖେଳିବ ଏହି ଲିଗ୍ ର ପ୍ରଥମ ମ୍ୟାଚ । ୟୁପି ରୁଦ୍ରସକୁ ସନ୍ଧ୍ୟା ୮.୧୫ରେ ଭେଟିବ କଳିଙ୍ଗ ଲାନସର୍ସ । ଡିଡି ସ୍ପୋର୍ଟସ୍, ଓ୍ବେଭସ୍, ସୋନି TEN 1, ସୋନି TEN 3, ସୋନି TEN 4 ଏବଂ ସୋନି LIVରେ ସିଧାପ୍ରସାରଣ ଦେଖିପାରିବେ ।

ହକି ଇଣ୍ଡିଆ ଲିଗ୍ ୨୦୨୪-୨୫ରେ ଆଜି ନିଜର ଅଭିଯାନ ଆରମ୍ଭ କରୁଛି କଳିଙ୍ଗ ଲାନସର୍ସ । ୨୦୧୭ରେ ଖେଳାଯାଇଥିବା ଶେଷ ସଂସ୍କରଣରେ କଳିଙ୍ଗ ଟିମ୍ ଚମ୍ପିଆନ୍ ହୋଇଥିଲା । ତେଣୁ ଆଜି ବି ବିଜୟରୁ ମ୍ୟାଚ ଆରମ୍ଭ କରିବା ଆଶାରେ ନିଜର ଘରୋଇ ଗ୍ରାଉଣ୍ଡରେ ଓହ୍ଲାଇବ କଳିଙ୍ଗ ଟିମ୍ ।

ଏହି ଦଳର ନେତୃତ୍ବ ନେଇଛନ୍ତି ଆରନ ଜେଲେସ୍କି । ଭାରତୀୟ ଦଳର ଗୋଲକିପର କ୍ରିଷ୍ଣା ବାହାଦୂର ପାଠକ କଳିଙ୍ଗ ଲାନସର୍ସର ଗୋଲରକ୍ଷକ ସାଜିବେ । ତାଙ୍କ ଉପରେ ସମସ୍ତ ଦର୍ଶକଙ୍କ ନଜର ରହିବ । ସେହିପରି ୟୁପି ରୁଦ୍ରସର ନେତୃତ୍ବ ନେଇଛନ୍ତି ହାର୍ଦ୍ଦିକ ସିଂ ।

ବେଦାନ୍ତ କଳିଙ୍ଗ ଲାନସର୍ସ ଟିମ୍ ରେ ଗୋଞ୍ଜାଲେଜ ଏନରିକ, ହେଣ୍ଡ୍ରିକେସ୍ ଆଲେକଜାଣ୍ଡର, ଥିଏରୀ ବ୍ରିଙ୍କମ୍ୟାନ ,ରେନୋଲ୍ଡସ୍ କୋଟେରିଲ୍ ଟୋବି ,ବାନ୍ଦୁରାକ୍ ନିକୋଲାସ୍, କିନା ଆଣ୍ଟୋଏନ୍ ,ଭାନ୍ ଡୋରେନ୍ ଆର୍ଥର୍ , ଆରନ ଜେଲେସ୍କି ବିଦେଶୀ ତାରକା ରହିଛନ୍ତି ।

ଭାରତୀୟଙ୍କ ମଧ୍ୟରେ କେ ବି ପାଠକ, ସାହିଲ ନାୟକ, ରୋହିତ କୁଲୁ, ମନଦୀପ ମୋର, ରବିଚନ୍ଦ୍ର,ମୁକେଶ ଟପ୍ପୋ, ଗୁରୁସାହିବଜିତ୍ ସିଂ,ଦୀପକ ପ୍ରଧାନ, ଦୀଲପ୍ରୀତ ସିଂ, ରୋଶନ କୁଜୁର, ରୋଶନ ମିଞ୍ଜ, ଅଙ୍ଗଦ ବିର୍ ସିଂ, ବବି ସିଂ ଧାମି ।

ଗତ ଶନିବାରଠାରୁ ବିଶ୍ବର ସର୍ବବୃହତ ବିର୍ସା ମୁଣ୍ଡା ହକି ଷ୍ଟାଡିୟମରେ ଆରମ୍ଭ ହୋଇଯାଇଥିବା ହକି ଇଣ୍ଡିଆର ଉଦ୍‌ଘାଟନ ମ୍ୟାଚ୍‌କୁ ଦେଖିବାକୁ ହକିପ୍ରେମୀଙ୍କ ପ୍ରବଳ ଉତ୍ସାହ ପରିଲକ୍ଷିତ ହୋଇଥିଲା। ପାଖାପାଖି ୧୫ ହଜାର ଦର୍ଶକ ଉପସ୍ଥିତ ଥିଲେ ।