ଆପଣଙ୍କ ନାମରେ କେତୋଟି ସିମ୍ କାର୍ଡ ଆକ୍ଟିଭ୍ ଅଛି? ‘ସଞ୍ଚାର ସାଥୀ’ ପୋର୍ଟାଲ ଜରିଆରେ ଏମିତି କରନ୍ତୁ ଯାଞ୍ଚ

ନୂଆଦିଲ୍ଲୀ: ଆଜିକାଲି ଡିଜିଟାଲ୍ ଠକେଇ ଏବଂ ସାଇବର ଅପରାଧ ଦିନକୁ ଦିନ ବୃଦ୍ଧି ପାଉଥିବା ବେଳେ ଆମର ବ୍ୟକ୍ତିଗତ ତଥ୍ୟର ସୁରକ୍ଷା ଏକ ବଡ଼ ଚିନ୍ତାର ବିଷୟ ପାଲଟିଛି। ଅନେକ ସମୟରେ ଠକମାନେ ଅନ୍ୟ ବ୍ୟକ୍ତିଙ୍କ ପରିଚୟପତ୍ର କିମ୍ବା ଆଧାର କାର୍ଡ ବ୍ୟବହାର କରି ବେଆଇନ ଭାବେ ସିମ୍ କାର୍ଡ ବାହାର କରିଥାନ୍ତି । ଫଳରେ ଯାହା ନାମରେ ସିମ୍ ଥାଏ, ସେ ଅଜାଣତରେ ଆଇନଗତ ସମସ୍ୟାରେ ପଡ଼ିବାର ଆଶଙ୍କା ରହିଥାଏ । ଏହି ସମସ୍ୟାର ସମାଧାନ ପାଇଁ ଏବଂ ଗ୍ରାହକମାନଙ୍କୁ ସୁରକ୍ଷା ଦେବା ଉଦ୍ଦେଶ୍ୟରେ ଭାରତ ସରକାରଙ୍କ ଦୂରସଞ୍ଚାର ବିଭାଗ ପକ୍ଷରୁ ‘ସଞ୍ଚାର ସାଥୀ’ ନାମକ ଏକ ସ୍ୱତନ୍ତ୍ର ପୋର୍ଟାଲ ଆରମ୍ଭ କରାଯାଇଛି।

ଏହି ପୋର୍ଟାଲର ଟାଫକପ୍ ସେବା ମାଧ୍ୟମରେ ଆପଣ ନିଜ ନାମରେ କେତୋଟି ମୋବାଇଲ୍ ନମ୍ବର କିମ୍ବା ସିମ୍ କାର୍ଡ ସକ୍ରିୟ ରହିଛି, ତାହା ଅତି ସହଜରେ ଘରେ ବସି ଯାଞ୍ଚ କରିପାରିବେ। ନିକଟରେ ଏନଡିଟିଭି ପକ୍ଷରୁ ପ୍ରକାଶିତ ଏକ ରିପୋର୍ଟରେ ଏହି ଯାଞ୍ଚ ପ୍ରକ୍ରିୟା ସମ୍ପର୍କରେ ସବିଶେଷ ତଥ୍ୟ ପ୍ରଦାନ କରାଯାଇଛି।

ଏହି ଯାଞ୍ଚ ପ୍ରକ୍ରିୟାଟି ଅତ୍ୟନ୍ତ ସରଳ ଏବଂ ଏଥିପାଇଁ ମାତ୍ର କିଛି ମିନିଟ୍ ସମୟ ଲାଗିଥାଏ। ପ୍ରଥମେ ନିଜ ମୋବାଇଲ୍ କିମ୍ବା କମ୍ପ୍ୟୁଟରର ବ୍ରାଉଜରରେ ସଞ୍ଚାର ସାଥୀର ଅଫିସିଆଲ୍ ୱେବସାଇଟ୍ ଖୋଲିବାକୁ ପଡ଼ିବ। ୱେବସାଇଟର ହୋମ୍ ପେଜରେ ଥିବା ‘ନୋ ୟୋର୍ ମୋବାଇଲ୍ କନେକ୍ସନ୍ସ’ ବିକଳ୍ପ ଉପରେ କ୍ଲିକ୍ କଲେ ଏକ ନୂଆ ପୃଷ୍ଠା ଖୋଲିବ। ସେଠାରେ ଆପଣଙ୍କୁ ନିଜର ବ୍ୟବହାର କରୁଥିବା ଦଶ ଅଙ୍କ ବିଶିଷ୍ଟ ମୋବାଇଲ୍ ନମ୍ବରଟିକୁ ଦେବା ସହିତ ସ୍କ୍ରିନରେ ଦେଖାଯାଉଥିବା କ୍ୟାପଚା କୋଡ୍ ପୂରଣ କରିବାକୁ ହେବ। ଏହାପରେ ‘ରିକ୍ୱେଷ୍ଟ ଓଟିପି’ ଉପରେ କ୍ଲିକ୍ କଲେ ଆପଣଙ୍କ ଫୋନକୁ ଏକ ୱାନ୍ ଟାଇମ୍ ପାସୱାର୍ଡ ବା ଓଟିପି ଆସିବ। ଏହି ଓଟିପିଟିକୁ ନିର୍ଦ୍ଦିଷ୍ଟ ସ୍ଥାନରେ ଦେଇ ଭ୍ୟାଲିଡେଟ୍ କରିବା କ୍ଷଣି, ଆପଣଙ୍କ ପରିଚୟପତ୍ର ବା ଆଧାର କାର୍ଡ ସହିତ ପଞ୍ଜୀକୃତ ହୋଇଥିବା ସମସ୍ତ ସିମ୍ କାର୍ଡର ତାଲିକା ଏକ ଡ୍ୟାସବୋର୍ଡରେ ଦେଖାଯିବ।

ଯଦି ଏହି ତାଲିକାରେ ଆପଣ ଏପରି କୌଣସି ମୋବାଇଲ୍ ନମ୍ବର ଦେଖନ୍ତି ଯାହାକୁ ଆପଣ ବ୍ୟବହାର କରୁନାହାନ୍ତି କିମ୍ବା ଯାହା ବିଷୟରେ ଆପଣଙ୍କର କୌଣସି ସୂଚନା ନାହିଁ, ତେବେ ତୁରନ୍ତ ସେହି ପୋର୍ଟାଲ ମାଧ୍ୟମରେ ଅଭିଯୋଗ କରିବାର ସୁବିଧା ମଧ୍ୟ ଦିଆଯାଇଛି। ଅପରିଚିତ ନମ୍ବରଟିକୁ ଚୟନ କରି ‘ଏହା ମୋର ନମ୍ବର ନୁହେଁ’ ବିକଳ୍ପରେ କ୍ଲିକ୍ କରି ଆପଣ ରିପୋର୍ଟ କରିପାରିବେ।

ଆପଣଙ୍କ ଅଭିଯୋଗ ଗ୍ରହଣ ହେବା ପରେ ସମ୍ପୃକ୍ତ ଟେଲିକମ କମ୍ପାନୀ ପକ୍ଷରୁ ସେହି ନମ୍ବରଟିର ପୁନଃ ଯାଞ୍ଚ କରାଯିବ ଏବଂ ତାହା ଜାଲ୍ ପ୍ରମାଣିତ ହେଲେ ୬୦ ଦିନ ଭିତରେ ସେହି ସିମ୍ କାର୍ଡକୁ ସମ୍ପୂର୍ଣ୍ଣ ରୂପେ ବନ୍ଦ କରିଦିଆଯିବ। ସାଇବର ଠକେଇରୁ ନିଜକୁ ସୁରକ୍ଷିତ ରଖିବା ପାଇଁ ପ୍ରତ୍ୟେକ ବ୍ୟକ୍ତି ସମୟ ସମୟରେ ଏହି ପୋର୍ଟାଲ ଜରିଆରେ ନିଜ ନାମରେ ଥିବା ସିମ୍ କାର୍ଡଗୁଡ଼ିକର ଯାଞ୍ଚ କରିବା ଅତ୍ୟନ୍ତ ଜରୁରୀ ବୋଲି ବିଶେଷଜ୍ଞମାନେ ପରାମର୍ଶ ଦେଇଛନ୍ତି।