ଭାରତ ଦଲାଇ ଲାମାଙ୍କ ଉତ୍ତରାଧିକାର ପ୍ରସଙ୍ଗରୁ ଦୂରେଇ ରହିବା ଉଚିତ୍, ଏହା ଆମର ଆଭ୍ୟନ୍ତରୀଣ ମାମଲା: ଚୀନ
ନୂଆଦିଲ୍ଲୀ: ଚୀନ୍ ଭାରତକୁ ଦଲାଇ ଲାମାଙ୍କ ଉତ୍ତରାଧିକାରୀ ପ୍ରସଙ୍ଗରେ ଦୂରେଇ ରହିବାକୁ ପରାମର୍ଶ ଦେଇଛି । ବେଜିଂ କହିଛି ଯେ ଦଲାଇ ଲାମାଙ୍କ ପୁନର୍ଜନ୍ମ ଏବଂ ଉତ୍ତରାଧିକାରୀ ନିର୍ଣ୍ଣୟ ପ୍ରକ୍ରିୟା ସମ୍ପୂର୍ଣ୍ଣ ଭାବରେ ଚୀନ୍ର ଆଭ୍ୟନ୍ତରୀଣ ବ୍ୟାପାର ଏବଂ ଏଥିରେ କୌଣସି ବାହ୍ୟ ହସ୍ତକ୍ଷେପକୁ ଅନୁମତି ଦିଆଯିବ ନାହିଁ ।
ଚୀନ୍ ଦୂତାବାସର ମୁଖପାତ୍ର ୟୁ ଜିଙ୍ଗ୍ ରବିବାର ଏକ ବିବୃତ୍ତି ଜାରି କରି କହିଛନ୍ତି ଯେ, ଦଲାଇ ଲାମାଙ୍କ ପୁନର୍ଜନ୍ମ ଶତାବ୍ଦୀ ପୁରୁଣା ଧାର୍ମିକ ପ୍ରଥା ଏବଂ ଐତିହାସିକ ପରମ୍ପରା ଅନୁଯାୟୀ ଘଟେ ।
ଚୀନ୍ର ଏହି ବିବୃତ୍ତି ଏପରି ଏକ ସମୟରେ ଆସିଛି ଯେତେବେଳେ ନିର୍ବାସିତ ତିବ୍ଦତୀୟ ସରକାର କେନ୍ଦ୍ରୀୟ ତିବ୍ଦତୀୟ ପ୍ରଶାସନ (CTA)ର ମୁଖ୍ୟ ପେନ୍ପା ସେରିଙ୍ଗ୍ ମେ ୨୭ ତାରିଖରେ ଭାରତର ଧର୍ମଶାଳାରେ ଦ୍ୱିତୀୟ ଥର ପାଇଁ ଶପଥ ଗ୍ରହଣ କରିବାକୁ ଯାଉଛନ୍ତି । ଦଲାଇ ଲାମା ମଧ୍ୟ ଏହି ଉତ୍ସବରେ ଯୋଗଦେବାର ଆଶା କରାଯାଉଛି ।
ଚୀନ୍ ଦୂତାବାସ ମଧ୍ୟ ତିବ୍ଦତ ଉପରେ ଭାରତକୁ ତାଙ୍କର ଦୀର୍ଘକାଳୀନ ସ୍ଥିତି ମନେ ପକାଇ ଦେଇଛି । ବିବୃତ୍ତିରେ କୁହାଯାଇଛି ଯେ, ଭାରତ ତିବ୍ଦତ ସ୍ୱାଧୀନତା ସହିତ ଜଡିତ କାର୍ଯ୍ୟକଳାପ ପାଇଁ ଏକ ମଞ୍ଚ ଯୋଗାଇବା ଉଚିତ୍ ନୁହେଁ । ଏହା ଆଞ୍ଚଳିକ ସ୍ଥିରତା ଏବଂ ଭାରତ-ଚୀନ୍ ସମ୍ପର୍କ ପାଇଁ ଅତ୍ୟନ୍ତ ଜରୁରୀ ।
ନୂଆଦିଲ୍ଲୀରେ ଅବସ୍ଥାପିତ ଚୀନ ଦୂତାବାସର ମୁଖପାତ୍ର ୟୁ ଜିଙ୍ଗ୍ କହିଛନ୍ତି ଯେ ଦଲାଇ ଲାମାଙ୍କ ଉତ୍ତରାଧିକାରୀ ମନୋନୟନ ପ୍ରସଙ୍ଗକୁ ଚୀନ ସରକାର ଆଜକୁ ଦୀର୍ଘ ବର୍ଷ ଧରି ନିୟନ୍ତ୍ରଣ କରିଆସୁଛନ୍ତି । ଚୀନ ସରକାରଙ୍କ ଅନୁମୋଦନ ମିଳିବା ପରେ ହିଁ ନୂଆ ଦଲାଇ ଲାମା ଦାୟିତ୍ବ ଗ୍ରହଣ କରିଥାନ୍ତି । ବର୍ତ୍ତମାନର ଧର୍ମଗୁରୁ ଚତୁର୍ଦଶ ଦଲାଇ ଲାମାଙ୍କୁ ମଧ୍ୟ ଚୀନ ସରକାର ମନୋନୀତ କରିଥିଲେ । ତେଣୁ ତାଙ୍କର ଉତ୍ତରାଧିକାରୀ ମନୋନୟନ ପ୍ରକ୍ରିୟା ମଧ୍ୟ ଚୀନ ସରକାରଙ୍କ ଆଭ୍ୟନ୍ତରୀଣ ବ୍ୟାପାର ବୋଲି ଜିଙ୍ଗ୍ କହିଛନ୍ତି ।
ବର୍ତ୍ତମାନର ଦଲାଇ ଲାମା ୧୯୩୫ ମସିହାରେ ଉତ୍ତର-ପଶ୍ଚିମ ଚୀନର ଟାକଟସେର ଗାଁରେ ଜନ୍ମଗ୍ରହଣ କରିଥିଲେ । ତାଙ୍କୁ ମାତ୍ର ଦୁଇ ବର୍ଷ ବୟସରେ ଚିହ୍ନଟ କରାଯାଇଥିଲା । ୧୩ତମ ଦଲାଇ ଲାମାଙ୍କ ଦ୍ଵାରା ଛାଡିଯାଇଥିବା ଚିହ୍ନ ସାହାଯ୍ୟରେ ବୌଦ୍ଧ ଭିକ୍ଷୁମାନଙ୍କର ଏକ ଦଳ ଗାଁରେ ପହଞ୍ଚିଥିଲେ । ଏହି ଦଳ ସେମାନଙ୍କ ସହିତ ୧୩ତମ ଦଲାଇ ଲାମାଙ୍କ କିଛି ଜିନିଷପତ୍ର, ଯେପରିକି ଚଷମା, ଏକ ଘଣ୍ଟି ଏବଂ ଏକ ଚାଲିବା ବାଡ଼ି ଆଣିଥିଲେ । ସେମାନେ ଦଲାଇ ଲାମାଙ୍କ ଜିନିଷପତ୍ର ଏବଂ ଅନ୍ୟାନ୍ୟ ଜିନିଷପତ୍ର ଏକ ପିଲା ସମ୍ମୁଖରେ ରଖିଲେ ।
ପିଲାଟି ୧୩ତମ ଦଲାଇ ଲାମାଙ୍କ ଜିନିଷପତ୍ର ଉଠାଇ କହିଲା, “ଏହା ମୋର।” ଶେଷରେ, ଭିକ୍ଷୁମାନେ ପିଲାଟି ଆଗରେ କିଛି ଚାଲିବା ବାଡ଼ି ରଖିଲେ । ପିଲାଟି ଦଲାଇ ଲାମାଙ୍କ ଚାଲିବା ବାଡ଼ିଟିକୁ ଉଠାଇ ନିଜ ଛାତିରେ ଆଲିଙ୍ଗନ କଲା । ତା’ପରେ ଭିକ୍ଷୁମାନେ ନିଶ୍ଚିତ ହେଲେ ଯେ ସେହି ଶିଶୁଟି ଦଲାଇ ଲାମାଙ୍କ ପୁନର୍ଜନ୍ମ । ସେ ୬ ବର୍ଷ ବୟସରେ ତାଙ୍କର ପାଠପଢ଼ା ଆରମ୍ଭ କରିଥିଲେ ଏବଂ ୧୯୫୦ ମସିହାରେ ତିବ୍ଦତ ଉପରେ ଚୀନ୍ ଆକ୍ରମଣ ପରେ, ସେ ପୂର୍ଣ୍ଣ କ୍ଷମତା ସହିତ ଦଲାଇ ଲାମାଙ୍କ ପଦ ଗ୍ରହଣ କରିଥିଲେ । ଦଲାଇ ଲାମା ୧୯୫୯ରୁ ଭାରତ ପଳାଇ ଆସି ହିମାଚଳ ପ୍ରଦେଶର ଧର୍ମଶାଳାରେ ଅବସ୍ଥାନ କରୁଛନ୍ତି । ଦଲାଇ ଲାମାଙ୍କୁ ଆଶୟ ଦେଇଥିବାରୁ ଚୀନ ସହ ଭାରତର ସମ୍ପର୍କ ମଧ୍ୟ ତିକ୍ତ ହୋଇଛି ।