ନୂଆଦିଲ୍ଲୀ: ଚୀନରୁ ଗସ୍ତରୁ ଫେରିବା ପରେ ମାଳଦ୍ୱୀପ ରାଷ୍ଟ୍ରପତି ମହମ୍ମଦ ମୁଇଜୁଙ୍କ ଆକ୍ରାମକ ରୂପ ସାମ୍ନାକୁ ଆସିବାରେ ଲାଗିଛି। ଆସନ୍ତା ମାର୍ଚ୍ଚ ୧୫ ପୂର୍ବରୁ ଦେଶ ଛାଡ଼ିବାକୁ ଭାରତୀୟ ସେନାଙ୍କୁ ନିର୍ଦ୍ଦେଶ ଦେଇଛନ୍ତି। ଏନେଇ ଭାରତ ସରକାରଙ୍କୁ ଏକ ଚିଠି ମାଧ୍ୟମରେ ପ୍ରସ୍ତାବ ଦେଇଛନ୍ତି। ତେବେ ମାଳଦ୍ୱୀପ ଓ ଭାରତ ମଧ୍ୟରେ ଚାଲିଥିବା ବିବାଦ ମଧ୍ୟ ଏହି ସୂଚନା ସାମ୍ନାକୁ ଆସିଛି। ଏଠାରେ କହି ରଖୁ କି ପୂର୍ବତନ ସରକାରଙ୍କ ଅନୁରୋଧ କ୍ରମେ ଦୀର୍ଘ ବର୍ଷ ଧରି ମାଳଦ୍ୱୀପରେ ଭାରତୀୟ ସେନାର ଉପସ୍ଥିତି ରହି ଆସୁଥିଲା। ଏହି ସେନା ମାଳଦ୍ୱୀପର ସାମୁଦ୍ରିକ ସୁରକ୍ଷା ଓ ପ୍ରାକୃତିକ ବିପର୍ଯ୍ୟୟ କ୍ଷେତ୍ରରେ ସହାୟତା ଯୋଗାଇ ଆସୁଥିଲେ।
ଏଠାରେ କହି ରଖୁ କି ମାଳଦ୍ୱୀପର ନୂତନ ରାଷ୍ଟ୍ରପତି ମହମ୍ମଦ ମୁଇଜୁ ୨୦୨୩ରେ ଭାରତ ସହିତ ସମ୍ପର୍କକୁ ଛିନ୍ନ କରିବା ଓ ଚୀନ ସହିତ ସମ୍ପର୍କକୁ ବୃଦ୍ଧି କରିବା ଦିଗରେ କାର୍ଯ୍ୟ କରୁଛନ୍ତି। ଏପରିକି ଏହି ଦିଗରେ ସେ ଅନେକ ମଞ୍ଚରେ ମଧ୍ୟ ଖୋଲାଖୋଲି ଭାବେ ଅଭିଯାନ ଚଳାଇଥିବା ଜଣାପଡ଼ିଛି। ଏଭଳି ସ୍ଥଳେ ମୁଇଜୁ ଭାରତ ସରକାର ସୈନ୍ୟଙ୍କୁ ଫେରାଇ ନେବାକୁ କହିଛନ୍ତି।
ସେପଟେ ନଭେମ୍ବରରେ ଜାରି ଏକ ବିବୃତ୍ତିରେ ମାଲଦ୍ୱୀପ ରାଷ୍ଟ୍ରପତିଙ୍କ କାର୍ଯ୍ୟାଳୟ କହିଛି ଯେ ତାଙ୍କ ଦେଶ ଭାରତର ଲୋକମାନଙ୍କର ଗଣତାନ୍ତ୍ରିକ ଇଚ୍ଛାକୁ ସମ୍ମାନ କରିବ ବୋଲି ଆଶା କରୁଛି। ଏହି ବିବୃତ୍ତିରେ ଆହୁରି ମଧ୍ୟ କୁହାଯାଇଛି ଯେ ସେପ୍ଟେମ୍ବର ମାସରେ ଅନୁଷ୍ଠିତ ରାଷ୍ଟ୍ରପତି ନିର୍ବାଚନରେ ମାଲଦ୍ୱୀପର ଲୋକମାନେ ମୁଇଜୁଙ୍କୁ ଏକ ଦୃଢ ଆଦେଶ ଦେଇଛନ୍ତି ଏବଂ ମାଲଦ୍ୱୀପବାସୀଙ୍କ ଗଣତାନ୍ତ୍ରିକ ଇଚ୍ଛାକୁ ଭାରତ ସମ୍ମାନ କରିବ ବୋଲି ଆଶା ମଧ୍ୟ ପ୍ରକାଶ କରିଛି। ତେବେ ଏପର୍ଯ୍ୟନ୍ତ ସେନା ପ୍ରତ୍ୟାହାର ପାଇଁ ସରକାର କୌଣସି ସମୟ ସୀମା ପ୍ରସ୍ତାବ ଦେଇନାହାଁନ୍ତି।
