ଆଇଏସଏଲ: ଓଡିଶା ଏଫସି ନଭେମ୍ବର ୨୩ରୁ ହାଇଦ୍ରାବାଦ ବିପକ୍ଷରେ ଅଭିଯାନ ଆରମ୍ଭ କରିବ

ଭୁବନେଶ୍ୱର: ଇଣ୍ଡିଆନ ସୁପର ଲିଗ୍ (ଆଇଏସଏଲ) ଫୁଟବଲର ୭ମ ସଂସ୍କରଣ କାର୍ଯ୍ୟସୂଚୀ ଶୁକ୍ରବାର ଘୋଷଣା କରାଯାଇଛି । ଓଡିଶା ଏଫସି ନଭେମ୍ବର ୨୩ରୁ ହାଇଦ୍ରାବାଦ ଏଫସି ବିପକ୍ଷରେ ତାର ଅଭିଯାନ ଆରମ୍ଭ କରିବ । ଏହି ମ୍ୟାଚ ଗୋଆର ବାମ୍ବୋଲିମର ଜିଏମସି ଷ୍ଟାଡିୟମରେ ଖେଳାଯିବ । ଫୁଟବଲ ସ୍ପୋର୍ଟ୍ସ ଡେଭଲେପମେଂଟ ଲିମିଟେଡ ପ୍ରଥମ ୧୧ ରାଉଣ୍ଡ ଖେଳର କାର୍ଯ୍ୟସୂଚୀ ଘୋଷଣା କରିଛି । ଉଦଘାଟନୀ ମୁକାବିଲାରେ ଚାମ୍ପିୟନ ଏଟିକେ ମୋହନ ବାଗାନ ନଭେମ୍ବର ୨୦ରେ କେରଳ ବ୍ଲାଷ୍ଟର୍ସକୁ ଭେଟିବ । କରୋନା ମହାମାରୀ ଯୋଗୁ ବନ୍ଦ ଷ୍ଟାଡିୟମରେ ମ୍ୟାଚ ଖେଳାଯିବ ।
ଓଡିଶା ଏଫସି କାର୍ଯ୍ୟସୂଚୀ: ନଭେମ୍ବର ୨୩ରେ ହାଇଦ୍ରାବାଦ ଏଫସି ବିପକ୍ଷରେ ଅଭିଯାନ ଆରମ୍ଭ କରିବା ପରେ ୨୯ରେ ଜାମସେଦପୁରକୁ ଓ ଡିସେମ୍ବର ୩ରେ ଏଟିକେ ମୋହନବାଗାନକୁ ଭେଟିବ । ସେହିପରି ୬ରେ ମୁମ୍ବାଇ ସିଟି ଏଫସି, ୧୨ରେ ଏଫସି ଗୋଆ, ୧୭ରେ ବେଙ୍ଗାଲୁର ଏଫସି, ୨୨ରେ ନର୍ଥଇଷ୍ଟ ୟୁନାଇଟେଡ ଏଫସିକୁ ଭେଟିବ । ଜାନୁୟାରୀ ୩ରେ ଇଷ୍ଟବେଙ୍ଗଲ, ୭ରେକେରଳ ବ୍ଲାଷ୍ଟର୍ସ ଓ ୧୦ରେ ଚେନ୍ନାୟିନି ଏଫସିକୁ ଭେଟିବ । ଜାମସେଦପୁର,ମୁମ୍ବାଇ, ଇଷ୍ଟବେଙ୍ଗଲ ଓ ଚେନ୍ନାୟିନି ଏଫସି ମ୍ୟାଚ ସନ୍ଧ୍ୟା ୫ଟାରେ ଏବଂ ଅନ୍ୟ ମ୍ୟାଚଗୁଡିକ ୭ଟା୩୦ରୁ ଆରମ୍ଭ ହେବ ।