ନ୍ୟୁୟର୍କ: ପୋଲାଣ୍ଡ ଗସ୍ତ ପୂର୍ବରୁ ଆମେରିକାର ରାଷ୍ଟ୍ରପତି ଜୋ ବାଇଡେନଙ୍କ ବୟାନ ସାରା ବିଶ୍ୱକୁ ସ୍ତବ୍ଧ କରି ଦେଇଛି । ଆମେରିକାର ଏହି ୪୬ ତମ ରାଷ୍ଟ୍ରପତି କହିଛନ୍ତି ଯେ ଖୁବ୍ ଶୀଘ୍ର ବଦଳିବ ଅନ୍ତର୍ଜାତୀୟ ଦୃଶ୍ୟପଟ୍ଟ। ଆଉ ଏହାର ନେତୃତ୍ୱ ନେବ ଆମେରିକା । ଏଥିପାଇଁ ଆମେରିକା ବିଶ୍ୱର ସମସ୍ତ ଦେଶକୁ ଏକଜୁଟ କରାଇବ। ସୋମବାର ହ୍ୱାଇଟ ହାଉସରେ ଏକ ବୈଠକ ବସିଥିଲା । ଏହି ବୈଠକରେ ଅନେକ ବଡ ବଡ ବ୍ୟବସାୟୀ ଯୋଗ ଦେଇଥିଲେ । ଏହି ସମୟରେ ବାଇଡେନ୍ କହିଥିଲେ ଖୁବଶୀଘ୍ର ହେବ ନୂଆ ଓ୍ୱାର୍ଲଡ ଅର୍ଡର ।
ପୋଲାଣ୍ଡ ଗସ୍ତ ପୂର୍ବରୁ ବାଇଡେନଙ୍କ ଏପରି ବୟାନ ଋଷର ଏକଛତ୍ରବାଦ ଶାସକ ତଥା ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ଉଦ୍ଦେଶ୍ୟରେ ଥିଲା ବୋଲି ଜଣାପଡିଛି। ଆମେରିକା ବର୍ତ୍ତମାନ ଋଷ-ୟୁକ୍ରେନ ଯୁଦ୍ଧକୁ ନେଇ ସିଧାସଳଖ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଚେତାବନୀ ଦେଉଛି। ୟୁକ୍ରେନ ପକ୍ଷରୁ ଆମେରିକା ଏହି ଯୁଦ୍ଧରେ ଯୋଗ ଦେଇପାରେ। ଯାହା ବିଶ୍ୱଯୁଦ୍ଧକୁ ଆରମ୍ଭ କରିପାରେ।
ଋଷ ଗଣମାଧ୍ୟମର ରିପୋର୍ଟ ଅନୁଯାୟୀ ଆମେରିକା ରାଷ୍ଟ୍ରପତି ଜୋ ବାଇଡେନଙ୍କ ବିଶ୍ୱ ନେତା ହେବାର ଅଭିଳାଷ ସମଗ୍ର ବିଶ୍ୱକୁ କ୍ଷତି ପହଞ୍ଚାଇପାରେ। ଆମେରିକାର ଏପରି ମନୋଭାବ ପାଇଁ କିଛି ସହଯୋଗୀ ଦେଶ ମଧ୍ୟ ଆଉ ସେପରି ସମର୍ଥନ କରୁ ନାହାନ୍ତି । ଏହାର ଉଦାହରଣ ହେଉଛି ୟୁରୋପୀୟ ୟୁନିଅନରେ ମତଭେଦ। ହଙ୍ଗେରୀର ବରିଷ୍ଠ କୂଟନୀତିଜ୍ଞ ପିଟର ସ୍କିଜର୍ଟୋ କହିଛନ୍ତି ଯେ ସେ ଋଷ ଉପରେ ଆମେରିକା ଦ୍ୱାରା ଲାଗୁ କରାଯାଉଥିବା ନୂଆ ନୂଆ ପ୍ରତିବନ୍ଧକକୁ ଗ୍ରହଣ ନକରିପାରନ୍ତି । କାରଣ ପ୍ରତିବନ୍ଧକ ଲଗାଇବା ଦ୍ୱାରା ଅନେକ କ୍ଷତି ହେବାର ସମ୍ଭାବନା ରହିଛି। ୟୁକ୍ରେନକୁ ନୋ-ଫ୍ଲାଏ ଜୋନ୍ ଘୋଷଣା କରିବାକୁ ଯୋଜନାକୁ ହଙ୍ଗେରୀ ମଧ୍ୟ ଆପତ୍ତି କରିଛି ଏବଂ ଏହା ଏକ ବିରାଟ ଯୁଦ୍ଧର କାରଣ ହୋଇପାରେ ବୋଲି କହିଛି। ସେପଟେ ବାଇଡେନଙ୍କ ଏପରି ଚେତାବନୀ ପରେ ଋଷ ସେନା ୟୁକ୍ରେନର ମାରିଓପୋଲରେ ଆକ୍ରମଣକୁ ଜୋରଦାର କରିଛି।
ବାଇଡେନଙ୍କ ଗସ୍ତ ପୂର୍ବରୁ ୟୁରୋପୀୟ କମିଶନ ସଦସ୍ୟ ଦେଶମାନଙ୍କୁ ଏକ ପରାମର୍ଶ ଜାରି କରିଛନ୍ତି। ୟୁରୋପୀୟ କମିଶନ ଆଶଙ୍କା କରୁଛନ୍ତି ଯେ ବାଇଡେନ ୟୁରୋପ ଗସ୍ତ ସମୟରେ ପୁଟିନ ପରମାଣୁ ଆକ୍ରମଣ କରିପାରନ୍ତି। ସେଥିପାଇଁ ୟୁରୋପୀୟ କମିଶନ କହିଛନ୍ତି ଯେ ପରମାଣୁ ଆକ୍ରମଣର ପରବର୍ତ୍ତୀ ପ୍ରଭାବ ପାଇଁ ସମସ୍ତ ଦେଶ ନିଜକୁ ପ୍ରସ୍ତୁତ କରିବା ଉଚିତ୍। ଏହା ମଧ୍ୟ କରାଯାଇଛି ଯେ ଜୈବିକ ଆକ୍ରମଣ ଏବଂ କେମିକାଲ ଆକ୍ରମଣ ପରିସ୍ଥିତିର ମୁକାବିଲା ପାଇଁ ଜଣେ ନିଜକୁ ମଧ୍ୟ ପ୍ରସ୍ତୁତ ହେବାକୁ ପଡିବ । ଏସବୁ ମଧ୍ୟରେ ୟୁରୋପର ବିଭିନ୍ନ ଦେଶରେ ଆଣବିକ ବଙ୍କର୍ ନିର୍ମାଣ କାର୍ଯ୍ୟ ଜୋରଦାର ହୋଇଛି।
ବ୍ରିଟେନରେ, ଦ୍ୱିତୀୟ ବିଶ୍ୱଯୁଦ୍ଧ ପରଠାରୁ ୬୫୦ ପୁରୁଣା ବଙ୍କର ନିଷ୍କ୍ରିୟ ହୋଇ ରହିଆସିଛି। ଇଟାଲୀରୁ ବେଲଜିୟମ ଏବଂ ଜର୍ମାନୀରୁ ଫିନଲ୍ୟାଣ୍ଡ ପର୍ଯ୍ୟନ୍ତ ପରମାଣୁ ଆକ୍ରମଣରୁ ରକ୍ଷା କରିବା ପାଇଁ ବଙ୍କର୍ ନିର୍ମାଣ କରାଯାଉଛି।
