ନୂଆଦିଲ୍ଲୀ: ଭାରତୀୟ ସେନା ‘ଖଡଗ୍’ କାମିକାଜ୍ ଡ୍ରୋନ୍ ବିକଶିତ କରିଛି। ଏହା ଗୁଇନ୍ଦା ଏବଂ ସର୍ଭିଲାନ୍ସ ଭୂମିକାରେ ନିୟୋଜିତ ହୋଇପାରିବ | ଅଧିକାରୀ କହିଛନ୍ତି ଯେ, ଏହି ଡ୍ରୋନ୍ ହେଉଛି ଏକ ହାଇ ସ୍ପିଡ୍ ଏବଂ କମ୍ ଓଜନ ବିଶିଷ୍ଟ ଡ୍ରୋନ୍ ଯାହା ପ୍ରତି ସେକେଣ୍ଡରେ ୪୦ମିଟର ବେଗରେ ଗତି କରିଥାଏ। ‘ଖଡଗ୍’ ୭୦୦ ଗ୍ରାମ ପର୍ଯ୍ୟନ୍ତ ବିସ୍ଫୋରକ ସାମଗ୍ରୀ ନେଇପାରେ ଏବଂ ଏଥିରେ ଜିପିଏସ୍, ନାଭିଗେସନ୍ ସିଷ୍ଟମ୍ ଏବଂ ହାଇ-ଡେଫିନେସନ୍ କ୍ୟାମେରା ରହିଛି | ଶତ୍ରୁଙ୍କ ଇଲକ୍ଟ୍ରୋମ୍ୟାଗ୍ନେଟିକ୍ ସ୍ପେକ୍ଟ୍ରମ୍ ଜାମିଂକୁ ବି ବିଫଳ କରିବାରେ ଏହା ସମର୍ଥ ।
ଏକ ପ୍ରକାର ‘ବିଧ୍ବଂସକାରୀ’ ଡ୍ରୋନ୍ ଭାବରେ ଜଣାଶୁଣା ଏହି ଡ୍ରୋନ୍ ସହଜରେ ଶତ୍ରୁ ଲକ୍ଷ୍ୟକୁ ନଷ୍ଟ କରିପାରେ | ଅଧିକାରୀଙ୍କ କହିବାନୁସାରେ, ‘ଖଡଗ୍’ ରାଡାର ପରିସରକୁ ଆସେ ନାହିଁ | ଏହି ଡ୍ରୋନ୍ ୩୦,୦୦୦ ଟଙ୍କା ମୂଲ୍ୟରେ ପ୍ରସ୍ତୁତ ହୋଇଛି ।
ଅଧିକାରୀ କହିଛନ୍ତି ଯେ, ଋଷ-ୟୁକ୍ରେନ ଯୁଦ୍ଧରେ ଏଭଳି ଡ୍ରୋନ୍ ବ୍ୟବହାର କରାଯାଇଥିଲା। ଅଗଷ୍ଟରେ ନ୍ୟାସନାଲ ଏରୋସ୍ପେସ୍ ଲାବୋରେଟୋରୀ (NAL) ଶକ୍ତିଶାଳୀ ‘ସ୍ୱଦେଶୀ’ (ମେକ୍ ଇନ୍ ଇଣ୍ଡିଆ) କାମିକାଜେ ଡ୍ରୋନ୍ ଲଞ୍ଚ କରିଥିଲା । ସ୍ୱଦେଶୀ ନିର୍ମିତ ଇଞ୍ଜିନ ଏଥିରେ ରହିଛି ଯାହା ୧୦୦୦ କିଲୋମିଟର ପର୍ଯ୍ୟନ୍ତ ଉଡ଼ିବାରେ ସକ୍ଷମ |
କେନ୍ଦ୍ର ଗୃହମନ୍ତ୍ରୀ ଅମିତ ଶାହା ରବିବାର ଦିନ କହିଛନ୍ତି ଯେ, ଭାରତର ସ୍ୱଦେଶୀ ମାନବବିହୀନ ଏରିଆଲ୍ ସିଷ୍ଟମ୍ (C-UAS) ‘ଦ୍ରୋଣମ’ ବ୍ୟବହାର କରି ପଞ୍ଜାବରେ ଭାରତ-ପାକିସ୍ଥାନ ସୀମାରେ ୫୫% ଡ୍ରୋନକୁ ପ୍ରଭାବହୀନ କରିବାରେ ସୀମା ସୁରକ୍ଷା ବଳ (ବିଏସଏଫ) ସକ୍ଷମ ହୋଇଛି।
Comments are closed.