ନୂଆଦିଲ୍ଲୀ: ମଙ୍ଗଳବାର ସିବିଆଇ ଆରଜେଡି ମୁଖ୍ୟ ତଥା ପୂର୍ବତନ ରେଳମନ୍ତ୍ରୀ ଲାଲୁ ପ୍ରସାଦ ଯାଦବଙ୍କୁ ପ୍ରାୟ ୩ ଘଣ୍ଟା ଧରି ଜେରା କରିଥିଲା। ସୋମବାର ବିହାରର ପାଟାନରେ ମଧ୍ୟ ପୂର୍ବତନ ମୁଖ୍ୟମନ୍ତ୍ରୀ ରାବଡ଼ି ଦେବୀଙ୍କ ବାସଭବନରେ ସିବିଆଇ ପହଞ୍ଚି ଜେରା କରିଛି।
ଲାଲୁ ଯାଦବଙ୍କୁ ତାଙ୍କ ଝିଅ ତଥା ରାଜ୍ୟସଭା ସଦସ୍ୟ ମିସା ଭାରତୀଙ୍କ ଦିଲ୍ଲୀସ୍ଥିତ ବାସଭବନରେ ପଚରାଉଚରା କରାଯାଇଥିଲା। ଗତ କିଛି ଦିନ ତଳେ ତଦନ୍ତକାରୀ ସଂସ୍ଥା ଲାଲୁ ଯାଦବଙ୍କୁ ନୋଟିସ୍ କରିଥିଲା। ନିକଟରେ ସିଙ୍ଗାପୁରରେ କିଡନୀ ଅସ୍ତ୍ରୋପଚାର କରିଥିବା ଲାଲୁ ଯାଦବଙ୍କୁ ସଂକ୍ରମଣରୁ ରକ୍ଷା କରିବା ପାଇଁ ଦୂରତା ବଜାୟ ରଖିବା ଏବଂ ମାସ୍କ ବ୍ୟବହାର କରିବାକୁ ସିବିଆଇ ଅଧିକାରୀଙ୍କୁ କୁହାଯାଇଥିଲା।
୨୦୦୪ରୁ ୨୦୦୯ ଯାଏ ଲାଲୁ ପ୍ରସାଦ ବିହାରର ରେଳମନ୍ତ୍ରୀ ଥିବା ବେଳେ ଲୋକଙ୍କଠାରୁ ଜମି ବଦଳରେ ରେଳ ବିଭାଗରେ ଚାକିରି ଦିଆଯାଇଥିଲା ବୋଲି ସିବିଆଇ ଅଭିଯୋଗ କରିଛି। ଲାଲୁ ଯାଦବ ପରିବାର ଓ ସେମାନଙ୍କ ସହଯୋଗୀଙ୍କ ନାଁରେ ଜମି ପଞ୍ଜିକରଣ କରାଯାଇଥିବା ତଦନ୍ତ ବେଳେ ସିବିଆଇ ଜାଣିବାକୁ ପାଇଛି।
ଗତ ଅକ୍ଟୋବରରେ ତଦନ୍ତକାରୀ ସଂସ୍ଥା ଯାଦବ, ତାଙ୍କ ପତ୍ନୀ ରାବଡ଼ି ଦେବୀ, ଝିଅ ମିସା ଭାରତୀ ଏବଂ ଅନ୍ୟ ୧୩ ଜଣଙ୍କ ବିରୋଧରେ ଚାର୍ଜସିଟ୍ ଦାଖଲ କରିଥିଲା। ଯେଉଁମାନଙ୍କ ବିରୋଧରେ ଚାର୍ଜସିଟ୍ ଦାଖଲ ହୋଇଛି ସେମାନଙ୍କ ମଧ୍ୟରେ ଦୁଇ ଜଣ ପୂର୍ବତନ ବରିଷ୍ଠ ରେଳ ଅଧିକାରୀ ଏବଂ ସାତ ଜଣ ଚାକିରି ଆଶାୟୀ ପ୍ରାର୍ଥୀ ଅଛନ୍ତି ଯେଉଁମାନେ ରେଳବାଇରେ ଗ୍ରୁପ୍ ଡି ଚାକିରି ପାଇବା ବଦଳରେ ଲାଲୁ ଯାଦବ ଏବଂ ତାଙ୍କ ପରିବାରକୁ ଜମି ବିକ୍ରି କରିଥିବା ଅଭିଯୋଗ ହୋଇଛି।
ତଦନ୍ତ ସମୟରେ ସିବିଆଇ ଦାବି କରିଥିଲା ଯେ ତତ୍କାଳୀନ କେନ୍ଦ୍ରୀୟ ରେଳବାଇର ଜିଏମ୍ ଏବଂ କେନ୍ଦ୍ରୀୟ ରେଳବାଇର ସିପିଓଙ୍କ ସହ ଷଡ଼ଯନ୍ତ୍ର କରି ଅଭିଯୁକ୍ତମାନେ ସେମାନଙ୍କ ନାଁରେ କିମ୍ବା ସେମାନଙ୍କ ନିକଟ ସମ୍ପର୍କୀୟଙ୍କ ନାଁରେ ଜମି ବଦଳରେ ଲୋକଙ୍କୁ ନିଯୁକ୍ତ କରିଥିଲେ। ଏହି ଜମିକୁ ପ୍ରଚଳିତ ସର୍କଲ ରେଟ୍ ଠାରୁ କମ୍ ମୂଲ୍ୟରେ ଏବଂ ବଜାର ରେଟ୍ ଠାରୁ ବହୁତ କମ୍ ମୂଲ୍ୟରେ ଅଧିଗ୍ରହଣ କରାଯାଇଥିବା ସିବିଆଇ ଦାବି କରିଛି।