ପୁରୀ ପୋଲିସର ସ୍ପେଶାଲ୍ ଅପରେସନ: ବିଭିନ୍ନ ସ୍ଥାନରୁ ୧୦ ଡକାୟତ ଗିରଫ

ପୁରୀ: ଅପରାଧୀଙ୍କୁ ସାବାଡ କରୁଛି ପୁରୀ ପୋଲିସ । ବିଭିନ୍ନ ସ୍ଥାନରେ ରେଡ୍ କରି ଡକାୟତଙ୍କୁ ପିନ୍ଧାଉଛି ହାଡ଼କଡ଼ି । ପୁରୀ ବଳିଆପଣ୍ଡା ଓ ପିପିଲି ଅଞ୍ଚଳରୁ ୧୦ ଜଣ ଲୁଟେରାଙ୍କୁ ଗିରଫ କରିଛି ପୁରୀ ପୋଲିସ । ସେମାନଙ୍କ ନିକଟରୁ ବିଭିନ୍ନ ପ୍ରକାର ମାରଣାସ୍ତ୍ର ବି ଜବତ ହୋଇଛି ।
ପୁରୀ ବଳିଆପଣ୍ଡା ଥାନା ପୋଲିସ ଏକ ୭ ଜଣିଆ ଡକାୟତ ଗ୍ୟାଙ୍ଗକୁ କାବୁ କରିବାରେ ସଫଳ ହୋଇଛି । ଅଭିଯୁକ୍ତଙ୍କ ନିକଟରୁ ଖଣ୍ଡା, ଛୁରୀ, ଲୁହା ରଡ୍ ଓ ବୋମା ଜବତ କରାଯାଇଛି ।

ଚନ୍ଦନପୁରର ଦୁର୍ଦ୍ଦାନ୍ତ ଅପରାଧୀ ରବି ମଲ୍ଲିକ ଓ ତାର ୬ ସାଥୀ ନୂଆ ଷ୍ଟାର୍ଲିଂ ରୋଡ୍ ବାଇପାସ ନିକଟରେ ଏକଠି ହୋଇ ଟୁରିଷ୍ଟ ବସକୁ ଅଟକେଇ ଡକାୟତି ଯୋଜନା କରୁଥିବା ପୋଲିସକୁ ଖବର ମିଳିଥିଲା । ସ୍ୱତନ୍ତ୍ର ପୋଲିସ ଟିମ ଚଢ଼ାଉ କରି ସମସ୍ତ ଅପରାଧିଙ୍କୁ ଗିରଫ କରି କୋର୍ଟ ଚାଲାଣ କରିଛି ।

ସେହିପରି ପିପିଲି ପୋଲିସ ଗୋଟିଏ ମୋବାଇଲ ଲୁଟେରା ଗ୍ୟାଙ୍ଗକୁ ଧରିଛି । ୩ଜଣଙ୍କୁ ଗିରଫ କରାଯାଇଥିବା ବେଳେ ସେମାନଙ୍କ ନିକଟରୁ ୬ଟି ମୋବାଇଲ, ଗୋଟିଏ ବାଇକ, କଟର ମେସିନ ଜବତ ହୋଇଛି ।