ଭୁବନେଶ୍ୱର: ଲଗାଣ ଖରା ଓ ଗୁଳୁଗୁଳିରୁ ଖୁବଶୀଘ୍ର ମିଳିବ ଆଶ୍ୱସ୍ତି। ଦକ୍ଷିଣ-ପଶ୍ଚିମ ବଙ୍ଗୋପସାଗରରେ ଆଜି ଏକ ଲଘୁଚାପ କ୍ଷେତ୍ର ସୃଷ୍ଟି ହେବାକୁ ଯାଉଛି। ଭାରତୀୟ ପାଣିପାଗ ବିଭାଗ (IMD) ପକ୍ଷରୁ ଏହି ପୂର୍ବାନୁମାନ କରାଯାଇଛି। ପାଗରେ ହେବାକୁ ଥିବା ଏହି ପରିବର୍ତ୍ତନ ସାଧାରଣ ଲୋକଙ୍କ ଦୈନନ୍ଦିନ ଜୀବନ ଏବଂ ଚାଷକାମ ଉପରେ ସିଧାସଳଖ ପ୍ରଭାବ ପକାଇବ। ତେଣୁ ଏହି ବର୍ଷା ଅପଡେଟ୍ ସମସ୍ତଙ୍କ ପାଇଁ ବେଶ୍ ଗୁରୁତ୍ୱପୂର୍ଣ୍ଣ।
ବର୍ତ୍ତମାନ ମାନ୍ନାର ଉପସାଗର ଏବଂ ଶ୍ରୀଲଙ୍କା ଉପକୂଳରେ ଏକ ଘୂର୍ଣ୍ଣିବଳୟ ସକ୍ରିୟ ରହିଛି। ଏହାରି ପ୍ରଭାବରେ ଲଘୁଚାପ ସୃଷ୍ଟି ପାଇଁ ପାଗ ଅନୁକୂଳ ହେଉଛି। ଏହା ପ୍ରାଥମିକ ସ୍ତରରେ ରହିଛି। ଏହା କେତେ ଶକ୍ତିଶାଳୀ ହେବ କିମ୍ବା ଏହାର ଗତିପଥ କୁଆଡ଼େ ରହିବ, ସେ ନେଇ ଚିତ୍ର ଏବେ ସୁଦ୍ଧା ସ୍ପଷ୍ଟ ହୋଇନାହିଁ। କିଛି ମଡେଲ୍ ଏହା ଅବପାତର ରୂପ ନେବ ବୋଲି ଦର୍ଶାଉଥିବା ବେଳେ ଆଉ କିଛି ମଡେଲ୍ ଏହା ଦୁର୍ବଳ ରହିବ ବୋଲି କହୁଛନ୍ତି। ତେବେ ଆଗାମୀ ୨୪ରୁ ୪୮ ଘଣ୍ଟା ମଧ୍ୟରେ ସ୍ଥିତି ପୂରା ସ୍ପଷ୍ଟ ହୋଇଯିବ। ବର୍ତ୍ତମାନ ସୁଦ୍ଧା କୌଣସି ବଡ଼ ବାତ୍ୟାର ଆଶଙ୍କା ନାହିଁ।
ଏହି ସମ୍ଭାବ୍ୟ ଲଘୁଚାପ ପ୍ରଭାବରେ ଉପକୂଳ ଓଡ଼ିଶା, ଆନ୍ଧ୍ରପ୍ରଦେଶ ଏବଂ ତାମିଲନାଡୁରେ ବର୍ଷା ଓ ଘଡ଼ଘଡ଼ି ବଢ଼ିବ। ଉପକୂଳବର୍ତ୍ତୀ ଅଞ୍ଚଳରେ ପବନର ବେଗ ଘଣ୍ଟାପ୍ରତି ୪୦ରୁ ୫୦ କିଲୋମିଟର ରହିପାରେ। ଆନ୍ଧ୍ରପ୍ରଦେଶ ପାଇଁ ମେ’ ୧୪ ତାରିଖ ଯାଏଁ ପାଣିପାଗ ସତର୍କତା ଜାରି କରାଯାଇଛି। ସମୁଦ୍ର ଅଶାନ୍ତ ରହିବାକୁ ଥିବାରୁ ମତ୍ସ୍ୟଜୀବୀମାନେ ସମୁଦ୍ର ଭିତରକୁ ନଯିବାକୁ ପ୍ରଶାସନ ପକ୍ଷରୁ ବାରଣ କରାଯାଇଛି। ତେବେ ଏହି ବର୍ଷା ଯୋଗୁଁ ପ୍ରବଳ ତାତିରୁ ଲୋକଙ୍କୁ ଆଶ୍ୱସ୍ତି ମିଳିବ ଏବଂ ପାଗ ତୁଳନାତ୍ମକ ଭାବେ ଥଣ୍ଡା ରହିବ।
ଅନ୍ୟପକ୍ଷରେ, ଓଡ଼ିଶାରେ ଏବେ କାଳବୈଶାଖୀର ପ୍ରଭାବ ମଧ୍ୟ ଜାରି ରହିଛି। ଆସନ୍ତା ୧୫ ତାରିଖ ଯାଏଁ ରାଜ୍ୟର ବିଭିନ୍ନ ଜିଲ୍ଲାରେ କାଳବୈଶାଖୀ ବର୍ଷା ହୋଇପାରେ ବୋଲି ଆଞ୍ଚଳିକ ପାଣିପାଗ କେନ୍ଦ୍ର ପୂର୍ବାନୁମାନ କରିଛି। ଆଗାମୀ ୨ରୁ ୩ ଦିନ ଯାଏଁ ତାପମାତ୍ରାରେ ବିଶେଷ ପରିବର୍ତ୍ତନ ହେବ ନାହିଁ। କିନ୍ତୁ ତା’ପରେ ପାରଦ ପୁଣି ୨ରୁ ୪ ଡିଗ୍ରୀ ବଢ଼ିବାର ସମ୍ଭାବନା ରହିଛି। ତେଣୁ ଉପକୂଳ ଜିଲ୍ଲାଗୁଡ଼ିକ ପାଇଁ ଆଗାମୀ ଦିନରେ ୟେଲୋ କିମ୍ବା ଅରେଞ୍ଜ ଆଲର୍ଟ ଜାରି କରାଯାଇପାରେ।
