ବ୍ରିକ୍ସ ଦେଶରେ ବଢୁଛି ‘ମେଡ୍ ଇନ୍ ଇଣ୍ଡିଆ’ର ଚାହିଦା: ଚୀନକୁ ଭାରତର ରପ୍ତାନି ୩୯ ପ୍ରତିଶତ ବୃଦ୍ଧି

ନୂଆଦିଲ୍ଲୀ: ସାମ୍ପ୍ରତିକ ବିଶ୍ୱ ଅର୍ଥନୀତିରେ ଭାରତ ନିଜର ସ୍ଥିତିକୁ ଆହୁରି ସୁଦୃଢ଼ କରିବାରେ ଲାଗିଛି । ବିଶେଷକରି ବ୍ରିକ୍ସ ସଦସ୍ୟ ରାଷ୍ଟ୍ରଗୁଡ଼ିକ ମଧ୍ୟରେ ‘ମେଡ୍ ଇନ୍ ଇଣ୍ଡିଆ’ ସାମଗ୍ରୀର ଚାହିଦା ଦ୍ରୁତ ଗତିରେ ବୃଦ୍ଧି ପାଉଛି । କେନ୍ଦ୍ର ବାଣିଜ୍ୟ ମନ୍ତ୍ରଣାଳୟ ପକ୍ଷରୁ ପ୍ରକାଶିତ ସଦ୍ୟତମ ତଥ୍ୟ ଅନୁଯାୟୀ, ଚଳିତ ଆର୍ଥିକ ବର୍ଷ ୨୦୨୬-୨୭ର ପ୍ରଥମ ୫ ମାସରେ ଚୀନକୁ ଭାରତର ରପ୍ତାନି ୩୯ ପ୍ରତିଶତ ବୃଦ୍ଧି ପାଇଛି, ଯାହାକି ଭାରତୀୟ ବାଣିଜ୍ୟ କ୍ଷେତ୍ର ପାଇଁ ଏକ ବଡ଼ ସଫଳତା ।

ତଥ୍ୟ ଅନୁସାରେ, ଏପ୍ରିଲରୁ ଅଗଷ୍ଟ ମାସ ମଧ୍ୟରେ ୪ ପ୍ରମୁଖ ବ୍ରିକ୍ସ ରାଷ୍ଟ୍ର ଚୀନ୍, ଦକ୍ଷିଣ ଆଫ୍ରିକା, ବ୍ରାଜିଲ ଏବଂ ରୁଷିଆକୁ ଭାରତର ମୋଟ ରପ୍ତାନି ୩୪ ପ୍ରତିଶତ ବଢ଼ିଛି । ଗତବର୍ଷ ଏହି ସମୟ ମଧ୍ୟରେ ରପ୍ତାନିର ପରିମାଣ ୧୪.୯ ବିଲିୟନ ଡଲାର ଥିବା ବେଳେ, ଚଳିତ ବର୍ଷ ତାହା ୧୯.୯ ବିଲିୟନ ଡଲାରରେ ପହଞ୍ଚିଛି । ଏହି ଅଭିବୃଦ୍ଧିରେ ଚୀନର ସବୁଠାରୁ ବଡ଼ ଯୋଗଦାନ ରହିଛି । ଗତ ୫ ମାସ ମଧ୍ୟରେ ଭାରତ କେବଳ ଚୀନକୁ ପ୍ରାୟ ୯.୬ ବିଲିୟନ ଡଲାର ମୂଲ୍ୟର ସାମଗ୍ରୀ ରପ୍ତାନି କରିବାରେ ସଫଳ ହୋଇଛି ।

ଅନ୍ୟ ଦେଶଗୁଡ଼ିକ କଥା ବିଚାରକୁ ନେଲେ, ଦକ୍ଷିଣ ଆଫ୍ରିକାକୁ ରପ୍ତାନିରେ ସର୍ବାଧିକ ୫୮ ପ୍ରତିଶତ ବୃଦ୍ଧି ଘଟିଛି । ସେହିପରି ବ୍ରାଜିଲକୁ ୧୩ ପ୍ରତିଶତ ଏବଂ ରୁଷିଆକୁ ୧୧ ପ୍ରତିଶତ ରପ୍ତାନି ବଢ଼ିଛି। ଫଳସ୍ୱରୂପ, ଭାରତର ମୋଟ ବିଶ୍ୱ ରପ୍ତାନି ବଜାରରେ ଏହି ୪ଟି ବ୍ରିକ୍ସ ରାଷ୍ଟ୍ରର ଅଂଶଧନ ଗତବର୍ଷର ୮.୧ ପ୍ରତିଶତରୁ ବୃଦ୍ଧି ପାଇ ଚଳିତ ବର୍ଷ ୯.୨ ପ୍ରତିଶତରେ ପହଞ୍ଚିଛି ।

ଅର୍ଥନୈତିକ ବିଶେଷଜ୍ଞଙ୍କ ମତରେ, ବ୍ରିକ୍ସ ଦେଶଗୁଡ଼ିକ ସହ ବାଣିଜ୍ୟିକ ସମ୍ପର୍କ ସୁଦୃଢ଼ ହେବା ଭାରତ ପାଇଁ ଏକ ସକାରାତ୍ମକ ଦିଗ । ଏହାଦ୍ୱାରା ପ୍ରଥମତଃ ଚୀନ୍ ସହ ରହିଥିବା ଟ୍ରେଡ୍ ଡେଫିସିଟକୁ କମାଇବାରେ ସହାୟତା ମିଳିବ । ଦ୍ୱିତୀୟତଃ, ଆମେରିକା ଭଳି ପାଶ୍ଚାତ୍ୟ ଦେଶଗୁଡ଼ିକ ଦ୍ୱାରା ଲାଗୁ ହେଉଥିବା ଅତ୍ୟଧିକ ଟାରିଫ୍ ଭୟରୁ ରକ୍ଷା ପାଇବା ପାଇଁ ବ୍ରିକ୍ସ ଦେଶଗୁଡ଼ିକ ଭାରତ ପାଇଁ ଏକ ମଜବୁତ୍ ବିକଳ୍ପ ବଜାର ଭାବେ ଉଭା ହୋଇଛନ୍ତି । ରପ୍ତାନିରେ ଏଭଳି କ୍ରମାଗତ ବୃଦ୍ଧି ଆଗାମୀ ଦିନରେ ଦେଶର ମ୍ୟାନୁଫ୍ୟାକ୍ଚରିଂ କ୍ଷେତ୍ରକୁ ଅଧିକ ପ୍ରୋତ୍ସାହିତ କରିବା ସହ ରୋଜଗାର ସୃଷ୍ଟିରେ ସହାୟକ ହେବ ବୋଲି ଆଶା କରାଯାଉଛି ।