୮୦ ହଜାର ଟଙ୍କା ବିନିମୟରେ କୁକୁର ମୂର୍ତ୍ତି ସ୍ଥାପନ, ଖୁବଶୀଘ୍ର ମନ୍ଦିର ନିର୍ମାଣ ହେବ

ଭୁବନେଶ୍ୱର : ଧନୀ ହୁଅନ୍ତୁ ଅବା ଗରିବ । କେହିକେହି କୁକୁରକୁ ପୋଷା ଜନ୍ତୁ ଭାବେ ପାଳିବାକୁ ପସନ୍ଦ କରିଥାନ୍ତି । ଧନୀ ଲୋକ ନିଜ ପୋଷା କୁକୁରକୁ ସ୍ୱତନ୍ତ୍ର ଖାଦ୍ୟ ଦେଇଥାନ୍ତି । ଅନ୍ୟପଟେ ଗରିବ ଲୋକ ଅଇଁଠା କିମ୍ବା ବଳକା ଖାଦ୍ୟ ପରଷିଥାନ୍ତି । ହେଲେ ତାମିଲନାଡୁର ଜଣେ ବ୍ୟକ୍ତି କିନ୍ତୁ ନିଜ ପୋଷା କୁକୁରର ସ୍ମୃତି ଉଦ୍ଦେଶ୍ୟରେ କିଛି ହଟ୍‌କେ କରି ଚର୍ଚ୍ଚାକୁ ଆସିଛନ୍ତି ।

ସରକାରୀ ଚାକିରୀରୁ ଅବସରପ୍ରାପ୍ତ ୮୨ ବର୍ଷୀୟ ମୁଥୁ ଶିବଗଙ୍ଗାର ମନମଦୁରାଇ ବାସିନ୍ଦା । ଟମ୍ ନାମକ ଏକ କୁକୁରୁ ସେ ନିଜ ପାଖରେ ପ୍ରାୟ ୧୧ ବର୍ଷ ରଖିଥିଲେ । ହେଲେ ଗତବର୍ଷ ଟମ୍ ଆରପାରିକୁ ଚାଲିଗଲା ପରେ ମୁଥୁ ନିଜ ପୋଷା କୁକୁର ଉଦ୍ଦେଶ୍ୟରେ ଏକ ମୂର୍ତ୍ତି ସ୍ଥାପନ କରିଛନ୍ତି ।

୨୦୧୦ ପରଠୁ ମୁଥୁ ପୋଷା କୁକୁର ଟମକୁ ନିଜ ପିଲାଭଳି ପାଳି ଆସିଥିଲେ । ହେଲେ ଟମ୍‌ର ମୃତ୍ୟୁ ପରେ ମୁଥୁ ୮୦ ହଜାର ଟଙ୍କା ଖର୍ଚ୍ଚ କରି ମାର୍ବଲର ଏକ ମୂର୍ତ୍ତି ନିର୍ମାଣ କରାଇଛନ୍ତି । ଚଳିତବର୍ଷ ଜାନୁଆରୀ ମାସରେ ମୂର୍ତ୍ତିଟି ସ୍ଥାପନ ହୋଇଥିଲାବେଳେ ଭବିଷ୍ୟତର ଏକ ମନ୍ଦିର ନିର୍ମାଣ କରିବା ଲାଗି ମୁଥୁଙ୍କ ପରିବାର ଯୋଜନା ରଖିଛି ।

ମୁଥୁଙ୍କ ପୁଅ ମନୋଜଙ୍କ ଅନୁଯାୟୀ ଟମ୍‌ର ମୂର୍ତ୍ତି ପାଖରେ ପ୍ରତିଦିନ ପୂଜାର୍ଚ୍ଚନା କରାଯାଇଥାଏ । ତେବେ କୌଣସି ବିଶେଷ ଦିନ କିମ୍ବା ପ୍ରତି ଶୁକ୍ରବାର ଟମ୍‌ର ମୂର୍ତ୍ତି ନିକଟରେ ମୁଥୁଙ୍କ ପରିବାର ଲୋକେ ଖାଦ୍ୟ ପରଷିବା ସହ ଭୋଗ ଲଗାଇଥାନ୍ତି ।