ନୂଆପଡା: ପାରିବାରିକ ବିବାଦ କେତେ ଭୟଙ୍କର ହୋଇପାରେ ତାହାର ଏକ କରୁଣ ରୂପ ଦେଖିବାକୁ ମିଳିଛି ନୂଆପଡା ଜିଲ୍ଲାରେ । ବାପା-ମା’ଙ୍କ ମଧ୍ୟରେ ଚାଲିଥିଲା ଝଗଡା । ଝଗଡା ଦେଖି ସହି ପାରିଲାନି କୁନି ଝିଅଟି । ଝଗଡାରୁ କ୍ଷାନ୍ତ କରିବା ପାଇଁ ଉଭୟଙ୍କୁ ଚେଷ୍ଟା କରୁଥିଲା । ହେଲେ ସେ ଜାଣି ନ ଥିଲା ଏମିତି ବାପା କ୍ରୋଧର ଶିକାର ହେବ ବୋଲି । କ୍ରୋଧାଗ୍ନିରେ ଜଳୁଥିବା ବାପା କୁନି ଝିଅର ତଣ୍ଟି ଚିପି ଦେଲା । ଏମିତି ଅଭାବନୀୟ ଘଟଣା ଘଟିଛି ନୂଆପଡ଼ା ଜିଲ୍ଲାରେ ।
ନୂଆପଡା ଜଲ୍ଲା ଧରମବନ୍ଧା ଥାନା କେନ୍ଦୁବାହାରା ଗାଁର ଘଟଣା । ଗତକାଲି ଅପରାହ୍ନରେ ଗାଁର ଗଜାନନ ମାଝୀ ମଦ ପିଇ ଘରକୁ ଫେରିଥିଲେ । ସ୍ୱାମୀଙ୍କୁ ମଦ୍ୟପାନ କରିଥିବା ଦେଖି ସ୍ତ୍ରୀ ଗୋପପୁରୀ ଉତ୍ତ୍ୟକ୍ତ ହୋଇପଡିଥିଲେ । ଉଭୟଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା । ଯୁକ୍ତି ଉଗ୍ରରୂପ ନେଇଥିଲା । ହେଲେ ଶେଷରେ ବାପା-ମା’ଙ୍କର କଳିରେ ବଳି ପଡି ଯାଇଥିଲା କୁନି ଝିଅଟି । ଯୁକ୍ତି ଏତେ ଭୟଙ୍କର ହୋଇଥିଲା ଯେ ୧୩ ବର୍ଷର ଝିଅ ସହି ନ ପାରି ବାପା-ମା’ଙ୍କୁ କ୍ଷାନ୍ତ କରିବାକୁ ଚଷ୍ଟା କରିଥିଲା।
ଝିଅକୁ ଦେଖି ଆହୁରି ରାଗି ଯାଇିଥିଲେ ବାପା । ୧୩ ବର୍ଷର ନାବାଳିକା ଝିଅର ତଣ୍ଟି ଚିପି ଦେଇଥିଲେ । ମା’ ଛଡାଇବାକୁ ଚେଷ୍ଟ କରିଥିଲେ ମଧ୍ୟ ବାପା ଛାଡି ନ ଥିଲା । ମା’ ବିକଳ ହୋଇ ପଡୋଶୀଙ୍କୁ ଡାକିବା ପାଇଁ ଯାଇଥିଲା । ପଡୋଶୀ ଆସି ଛଡାଇବା ବେଳକୁ କୁନି ଝିଅର ମୃତ୍ୟୁ ଘଟି ସାରିଥିଲା । ଖବର ପାଇ ଆଜି ସକାଳୁ ଧରମବନ୍ଧା ପୁଲିସ ଘଟଣା ସ୍ଥଳରେ ପହଞ୍ଚି ମୃତଦେହକୁ ଜବତ କରିବା ସହ ପିଶାଚ ବାପାଙ୍କୁ ଗିରଫ କରିଛି ପୋଲିସ ।