ରାଜଗାଙ୍ଗପୁର: ସୁନ୍ଦରଗଡ଼ରେ ଜଣେ ପେଟ୍ରୋଲ ପମ୍ପ କର୍ମଚାରୀଙ୍କୁ ଦୁର୍ବୃତ୍ତମାନେ ଆକ୍ରମଣ କରି ପ୍ରାୟ ୨ ଲକ୍ଷ ଟଙ୍କା ଲୁଟି ନେଇଛନ୍ତି।
ମିଳିଥିବା ସୂଚନା ଅନୁଯାୟୀ, ୧୦ ନମ୍ବର ଜାତୀୟ ରାଜପଥ ନିକଟ ରାଜଗାଙ୍ଗପୁରର ପଦମାପାଲି ସ୍ଥିତ ଏକ ପେଟ୍ରୋଲ ପମ୍ପରେ କାମ କରୁଥିବା ଅନୀଲ କୁମାର ତିୱାରୀ ନଗଦ ଟଙ୍କା ଜମା କରିବାକୁ ନିକଟସ୍ଥ ଏକ ବ୍ୟାଙ୍କକୁ ଯାଉଥିଲେ।
ସହରର ଲୋମଲୋଇ ନିକଟରେ ୩ ଜଣ ମୁଖାପିନ୍ଧା ଦୁର୍ବୃତ୍ତ ଏକ ବାଇକରେ ଆସି ତାଙ୍କୁ ଅଟକାଇଥିଲେ। ସେମାନେ ତାଙ୍କୁ ଛୁରୀରେ ଆକ୍ରମଣ କରିବାରୁ ଅନିଲ ତାଙ୍କ ମୋଟର ସାଇକେଲରୁ ଖସି ପଡ଼ିଥିଲେ। ଦୁର୍ବୃତ୍ତମାନେ ତାଙ୍କ ନଗଦ ଟଙ୍କା ଭର୍ତ୍ତି ବ୍ୟାଗ୍ ଛଡ଼ାଇ ନେଇ ବାଇକରେ ଫେରାର ହୋଇଯାଇଥିଲେ।
ଖବର ପାଇ ରାଜଗାଙ୍ଗପୁର ଥାନା ପୁଲିସ ଘଟଣାସ୍ଥଳରେ ପହଞ୍ଚି ଅନିଲଙ୍କୁ ଗୁରୁତର ଅବସ୍ଥାରେ ରାଜଗାଙ୍ଗପୁର ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲା। ପରେ ଅବସ୍ଥା ସଂକଟାପନ୍ନ ହେବାରୁ ତାଙ୍କୁ ରାଉରକେଲା ଡାକ୍ତରଖାନାକୁ ସ୍ଥାନାନ୍ତର କରାଯାଇଥିଲା।
ମାସ୍କ ପିନ୍ଧିଥିବାରୁ ଆକ୍ରମଣକାରୀଙ୍କ ମୁହଁ ମୁଁ ଦେଖି ପାରିନଥିଲି। ସେମାନେ ମୋତେ ଆକ୍ରମଣ କରିଥିଲେ ଏବଂ ମୋ ମୋଟରସାଇକେଲକୁ ମାଡ଼ ମାରିଥିଲେ। ମୁଁ ପଡ଼ି ସାହାଯ୍ୟ ପାଇଁ ଚିତ୍କାର କଲି କିନ୍ତୁ ଆଖପାଖ ଅଞ୍ଚଳରୁ କେହି ମୋତେ ଉଦ୍ଧାର କରିବାକୁ ଆସିନଥିଲେ ବୋଲି ଅନିଲ ଗଣମାଧ୍ୟମକୁ କହିଛନ୍ତି।