୨୦୦ତମ ମ୍ୟାଚ୍ରେ ମେସିଙ୍କ ମହା-ରେକର୍ଡ
ବିଶ୍ୱକପ୍ରେ ମେସିଙ୍କ ପ୍ରଥମ ହ୍ୟାଟ୍ରିକ, କ୍ଲୋଜ୍ଙ୍କ ରେକର୍ଡ଼ ସହ ସମକକ୍ଷ !
ଫୁଟବଲ୍ ଜଗତର ଜାଦୁଗର ଲିଓନେଲ୍ ମେସି ପୁଣିଥରେ ପ୍ରମାଣ କରିଛନ୍ତି ଯେ ତାଙ୍କ ପାଇଁ ବୟସ କେବଳ ଏକ ସଂଖ୍ୟା ମାତ୍ର। ଫିଫା ବିଶ୍ୱକପ୍ ୨୦୨୬ର ପ୍ରଥମ ମ୍ୟାଚ୍ରେ ହିଁ ମେସି ସୃଷ୍ଟି କରିଛନ୍ତି ନୂଆ ଇତିହାସ। ଆର୍ଜେଣ୍ଟିନା ପାଇଁ ନିଜର ୨୦୦ତମ ଆନ୍ତର୍ଜାତୀୟ ମ୍ୟାଚ୍କୁ ସେ ଏଭଳି ଭାବେ ସ୍ମରଣୀୟ କରିଛନ୍ତି, ଯାହାକୁ ଫୁଟବଲ୍ ଇତିହାସ ସ୍ବର୍ଣ୍ଣ ଅକ୍ଷରରେ ଲିପିବଦ୍ଧ କରି ରଖିବ। ଆଲଜେରିଆ ବିପକ୍ଷ ମ୍ୟାଚ୍ରେ ମେସିଙ୍କ ପାଦରୁ ବାହାରିଛି ଏକ ଚମତ୍କାର ହ୍ୟାଟ୍ରିକ, ଆଉ ଏହା ସହିତ ସେ ବିଶ୍ୱକପ୍ ଇତିହାସରେ ସର୍ବାଧିକ ଗୋଲ୍ର ସର୍ବକାଳୀନ ରେକର୍ଡ଼ ସହ ସମକକ୍ଷ ହୋଇଛନ୍ତି।
ମୈଦାନରେ ସେହି ପରିଚିତ ଚେହେରା… ଜର୍ସି ନମ୍ବର ୧୦… ଏବଂ ପାଦରେ ସେହି ଯାଦୁକରୀ ସ୍ପର୍ଶ। ଗ୍ରୁପ୍-ଜେ ର ଆଲଜେରିଆ ବିପକ୍ଷ ମ୍ୟାଚ୍ରେ ମେସି ପଡ଼ିଆକୁ ଓହ୍ଲାଇବା ମାତ୍ରେ ହିଁ ଦୁଇ ଦୁଇଟି ବଡ଼ ରେକର୍ଡ଼ ନିଜ ନାଁରେ କରିସାରିଥିଲେ। ଆର୍ଜେଣ୍ଟିନା ପାଇଁ ୨୦୦ତମ ଆନ୍ତର୍ଜାତୀୟ ମ୍ୟାଚ୍ ଖେଳିବାର ଗୌରବ ସହ, ଦୁନିଆର ପ୍ରଥମ ଖେଳାଳି ଭାବେ ୬ଟି ଭିନ୍ନ ଭିନ୍ନ ଫିଫା ବିଶ୍ୱକପ୍ ଖେଳିବାର ମହା-ରେକର୍ଡ଼ ନିଜ ନାମରେ କରିଥିଲେ ଲିଓନେଲ୍ ମେସି।
ମ୍ୟାଚ୍ର ୧୭ତମ ମିନିଟ୍ରେ ବକ୍ସ ବାହାରୁ ମେସିଙ୍କ ଏକ ରକେଟ୍ ଭଳି ଶଟ୍ ଆଲଜେରିଆର ରକ୍ଷଣଭାଗକୁ ଧ୍ୱସ୍ତ କରି ନେଟ୍ ଭିତରେ ପଶିଥିଲା। ଆଉ ଷ୍ଟାଡିୟମ କମ୍ପି ଉଠିଥିଲା ‘ମେସି.. ମେସି..’ ଗର୍ଜନରେ। ଆର୍ଜେଣ୍ଟିନା ପାଇଥିଲା ୧-୦ର ଅଗ୍ରଗତି।
୩୯ ବର୍ଷ ବୟସରେ ମଧ୍ୟ ଯୁବ ଖେଳାଳିଙ୍କ ଭଳି ଚପଳତା ଦେଖାଇ ମେସି ମ୍ୟାଚ୍ର ୬୦ତମ ମିନିଟ୍ରେ ଦ୍ୱିତୀୟ ଏବଂ ୭୬ତମ ମିନିଟ୍ରେ ତୃତୀୟ ଗୋଲ୍ ଦେଇ ନିଜ କ୍ୟାରିୟରର ଏକ ଐତିହାସିକ ହ୍ୟାଟ୍ରିକ ପୂରଣ କରିଥିଲେ। ଆର୍ଜେଣ୍ଟିନା ୩-୦ ରେ ମ୍ୟାଚ୍ ଜିତିବା ସହ ମେସି ଫୁଟବଲ୍ର ସବୁଠାରୁ ବଡ଼ ସିଂହାସନ ଆଡ଼କୁ ଆଗେଇ ଚାଲିଥିଲେ।
ଏହି ତିନୋଟି ଗୋଲ୍ ସହିତ ମେସି କେବଳ ମ୍ୟାଚ୍ ଜିତାଇ ନାହାନ୍ତି, ବରଂ ରେକର୍ଡ ବୁକ୍କୁ ଓଲଟପାଲଟ କରିଦେଇଛନ୍ତି।
ବିଶ୍ୱକପ୍ରେ ସର୍ବାଧିକ ଗୋଲ୍: ବିଶ୍ୱକପ୍ରେ ମେସିଙ୍କ ଗୋଲ୍ ସଂଖ୍ୟା ଏବେ ୧୩ ରୁ ବଢ଼ି ୧୬ରେ ପହଞ୍ଚିଛି। ଏହା ସହ ସେ ଜର୍ମାନୀର ମହାନ ଖେଳାଳି ମିରୋସ୍ଲାଭ୍ କ୍ଲୋଜ୍ଙ୍କ ସର୍ବାଧିକ ୧୬ ଗୋଲ୍ର ରେକର୍ଡ଼ ସହ ସମକକ୍ଷ ହୋଇଛନ୍ତି।
କ୍ୟାରିୟରର ୬୧ତମ ହ୍ୟାଟ୍ରିକ: ମେସିଙ୍କ କ୍ୟାରିୟରର ଏହା ୬୧ତମ ଏବଂ ଆର୍ଜେଣ୍ଟିନା ଜାତୀୟ ଦଳ ପାଇଁ ୧୧ତମ ହ୍ୟାଟ୍ରିକ।
ବିଶ୍ୱକପ୍ରେ ପ୍ରଥମ ହ୍ୟାଟ୍ରିକ: ସବୁଠୁ ଆଶ୍ଚର୍ଯ୍ୟର କଥା ହେଉଛି, ଏତେ ବଡ଼ କ୍ୟାରିୟର ମଧ୍ୟରେ ଫିଫା ବିଶ୍ୱକପ୍ ମୈଦାନରେ ଏହା ମେସିଙ୍କ କ୍ୟାରିୟରର ପ୍ରଥମ ହ୍ୟାଟ୍ରିକ।
ମ୍ୟାଚ୍ର ୮୦ତମ ମିନିଟ୍ରେ ଯେତେବେଳେ କୋଚ୍ ମେସିଙ୍କୁ ଆରାମ ଦେବା ପାଇଁ ପଡ଼ିଆରୁ ବାହାରକୁ ଡାକିଥିଲେ, ସେତେବେଳେ ପୂରା ଷ୍ଟାଡିୟମ ଠିଆ ହୋଇ ଏହି ମହାନ ଖେଳାଳିଙ୍କୁ ସଲାମ ଜଣାଇଥିଲା। ଏହି ଐତିହାସିକ ମୁହୂର୍ତ୍ତ ପ୍ରମାଣ କରିଦେଲା ଯେ, ମେସି ଆଜି ମଧ୍ୟ ବିଶ୍ୱ ଫୁଟବଲ୍ର ସବୁଠାରୁ ଉଜ୍ଜ୍ୱଳ ନକ୍ଷତ୍ର।
ତାଙ୍କ ପାଖରେ ଏବେ ମଧ୍ୟ ପୂରା ଟୁର୍ଣ୍ଣାମେଣ୍ଟ ବାକି ଅଛି, ଆଉ ଏକେଲା କ୍ଲୋଜ୍ଙ୍କ ରେକର୍ଡ଼ ଭାଙ୍ଗି ବିଶ୍ୱକପ୍ ଇତିହାସର ସର୍ବଶ୍ରେଷ୍ଠ ଗୋଲ୍ ସ୍କୋରର ହେବାର ସୁବର୍ଣ୍ଣ ସୁଯୋଗ ମଧ୍ୟ ରହିଛି।
ତେବେ ବିଶ୍ୱକପ୍ର ପ୍ରଥମ ମ୍ୟାଚ୍ରୁ ହିଁ ମେସି ଯେଉଁ ସଂକେତ ଦେଇଛନ୍ତି, ସେଥିରୁ ସ୍ପଷ୍ଟ ଜଣାପଡୁଛି ଯେ ଆର୍ଜେଣ୍ଟିନା ଏଥର ମଧ୍ୟ ବିଶ୍ୱକପ୍ରେ ବଡ଼ ଦାବିଦାର ଭାବେ ଉଭା ହୋଇଛି।