ହିଞ୍ଜିଳି, କଣ୍ଟାବାଞ୍ଜିରେ ଶାହ ଏବଂ ନଡ଼୍ଡାଙ୍କ ପ୍ରଚାର କାର୍ଯ୍ୟକ୍ରମ ବାତିଲ ପଛର ଉଦ୍ଦେଶ୍ୟକୁ ନେଇ ବଢ଼ିଲା ଚର୍ଚ୍ଚା

ଭୁବନେଶ୍ୱର: ବିଜେଡି ଓ ବିଜେପି ମଧ୍ୟରେ ଜୋରଦାର ବୟାନବାଜି ଚାଲିଛି। ବ୍ରହ୍ମପୁରରେ ପ୍ରଧାନମନ୍ତ୍ରୀ ପ୍ରଚାର କରି ନବୀନ ପଟ୍ଟନାୟକଙ୍କୁ ମଧ୍ୟ ଟାର୍ଗେଟ କରିଥିଲେ। ଏବେ କିନ୍ତୁ ନବୀନ ପ୍ରାର୍ଥୀପତ୍ର ଦାଖଲ କରିଥିବା ହିଞ୍ଜିଳି ଏବଂ କଣ୍ଟାବଞ୍ଜିରେ ବିଜେପିର ଶୀର୍ଷ ନେତାଙ୍କ ପ୍ରଚାର କାର୍ଯ୍ୟକ୍ରମ ବାତିଲ ହେବା ସମସ୍ତଙ୍କୁ ଆଶ୍ଚର୍ଯ୍ଯ କରିଛି।

ବିଜେପି ଗତ ୧୨ ତାରିଖରେ ଘୋଷଣା କରିଥିଲା ଯେ ନବୀନ ଯେଉଁ ନିର୍ବାଚନ ମଣ୍ଡଳୀରୁ ନିର୍ବାଚନ ମଇଦାନକୁ ଓହ୍ଲାଇଛନ୍ତି, ସେଠାରେ ନିର୍ବାଚନ ପ୍ରଚାର ପାଇଁ ବିଜେପି ନିଜର ବଡ଼ ବଡ଼ ନେତାଙ୍କୁ ଆଣି ପ୍ରଚାର କରାଇବ।

ଗତ ୧୪ ତାରିଖରେ ଦଳ କୌଣସି କାରଣ ନ ଦର୍ଶାଇ କଣ୍ଟାବାଞ୍ଜିଙ୍କୁ ଶାହାଙ୍କ ଗସ୍ତ ସୂଚୀରୁ ବାଦ୍ ଦେଇଥିଲା। ତେଣୁ ବୁଧବାର କେନ୍ଦ୍ରମନ୍ତ୍ରୀ ଓଡ଼ିଶା ଆସି ସୋରଡ଼ା ଓ ବୌଦ୍ଧରେ ଦୁଇଟି ରାଲି ଏବଂ ସନ୍ଧ୍ୟାରେ କଟକ ସହରରେ ରୋଡ୍ ସୋ’କୁ ସମ୍ବୋଧିତ କରିଥିଲେ।

ଉଭୟ ସୋରଡ଼ା ଓ ହିଞ୍ଜିଳି ଆସ୍କା ସଂସଦୀୟ କ୍ଷେତ୍ର ଅଧୀନରେ ଆସୁଛି। ନବୀନ ଷଷ୍ଠ ଥର ପାଇଁ ହିଞ୍ଜିଳିରୁ ନିର୍ବାଚନ ଲଢୁଛନ୍ତି। ବିଜେପିର ରାଜ୍ୟ ଉପସଭାପତି ଗୋଲକ ମହାପାତ୍ର ଘୋଷଣା କରିଥିବା ନଡ୍ଡାଙ୍କ ଗସ୍ତ ସୂଚୀରୁ ହିଞ୍ଜିଳିକୁ ବାଦ୍ ଦିଆଯାଇଛି।

ବିଜେପି ସଭାପତି ବୁଧବାର ସନ୍ଧ୍ୟାରେ ଭୁବନେଶ୍ୱରରେ ପହଞ୍ଚି ସୁଭଦ୍ରା ଯୋଜନା ସମ୍ପର୍କିତ ଏକ ମହିଳା ସମ୍ମିଳନୀରେ ଯୋଗ ଦେଇଛନ୍ତି। ଯେଉଁଥିରେ କ୍ଷମତାକୁ ଆସିଲେ ପ୍ରତ୍ୟେକ ଯୋଗ୍ୟ ମହିଳାଙ୍କୁ ୫୦ ହଜାର ଟଙ୍କାର କ୍ୟାସ୍ ଭାଉଚର ମିଳିବ। ଗୁରୁବାର ସକାଳେ ସେ ମାଉସୀ ମା’ ମନ୍ଦିରଠାରୁ ସହରର ଲିଙ୍ଗରାଜ ମନ୍ଦିର ପର୍ଯ୍ୟନ୍ତ ରୋଡ୍ ସୋ କରିବେ। ଅପରାହ୍ନରେ ବରଗଡ଼ ପଦ୍ମପୁର ଓ ସୁନ୍ଦରଗଡ଼ ସହରରେ ଦୁଇଟି ରାଲିକୁ ସମ୍ବୋଧିତ କରିବେ।

ତାଙ୍କ ବଦଳରେ ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ଶର୍ମା ଆସନ୍ତା ୧୭ ତାରିଖରେ ବଲାଙ୍ଗୀର ଜିଲ୍ଲାର କଣ୍ଟାବାଞ୍ଜିରେ ପ୍ରଚାର କରିବେ।ବିଜେପିର ଶୀର୍ଷ ନେତାମାନେ ଲୋକସଭା ଆସନରେ ଭଲ ପ୍ରଦର୍ଶନ କରିବା ପାଇଁ ଏବଂ ରାଜ୍ୟରେ ସରକାର ଗଢିବାକୁ ଦାବି କରୁଥିବା ବେଳେ ହଠାତ ଶାହ ଏବଂ ନଡ୍ଡାଙ୍କ ପ୍ରଚାରରୁ ହିଞ୍ଜିଳି ଏବଂ କଣ୍ଟାବାଞ୍ଜି ବାଦ ପଡ଼ିବା ରାଜନୈତିକ ଚର୍ଚ୍ଚାକୁ ଖୋରାକ୍ ଯୋଗାଇଛି।

ଏହି ଦୁଇଟି ଘଟଣା ଉଭୟ ଦଳର ଶୀର୍ଷ ନେତୃତ୍ୱ ନରେନ୍ଦ୍ର ମୋଦୀ ଓ ନବୀନଙ୍କ ମଧ୍ୟରେ ବନ୍ଧୁତ୍ୱକୁ ନେଇ ଚର୍ଚ୍ଚା ଜୋର ଧରିଛି । ବିଜେଡି ନେତା ଭିକେ ପାଣ୍ଡିଆନ ନିଜେ ସ୍ୱୀକାର କରିଥିଲେ ଯେ ଉଭୟଙ୍କ ମଧ୍ୟରେ ଭଲ ସମ୍ପର୍କ ରହିଛି। ନବୀନ ପଟ୍ଟନାୟକ ନିଶ୍ଚିତ ଭାବେ ରାଜ୍ୟର ମୁଖ୍ୟମନ୍ତ୍ରୀ ହେବାକୁ ଯାଉଛନ୍ତି ଏବଂ ନରେନ୍ଦ୍ର ମୋଦୀ ପ୍ରଧାନମନ୍ତ୍ରୀ ହେବାକୁ ଯାଉଛନ୍ତି।

କିନ୍ତୁ ଏମିତି କିଛି ଅଛି ଯାହା ରାଜନୀତି ବାହାରେ ଅଛି। ଦୁଇ ମହାନ ନେତା ଏକ ବୃହତ ଉଦ୍ଦେଶ୍ୟ ପାଇଁ ଏକାଠି ହେବାକୁ ଚାହୁଁଛନ୍ତି ବୋଲି ଏକ ଜାତୀୟ ଘରୋଇ ନ୍ୟୁଜ ଚ୍ୟାନେଲକୁ ସାକ୍ଷାତକାର ଦେଇ ସେ ଏପରି କହିଥିଲେ। ତେବେ ମେଣ୍ଟ ଚର୍ଚ୍ଚାରେ ଫୁୁଲଷ୍ଟପ ପଡ଼ିବା ପରେ ଦୁଇ ଦଳ ପରସ୍ପରକୁ ଜୋରଦାର ଆକ୍ରମଣ କରୁଥିବା ବେଳେ ଶାହ ଏହଂ ନଡ୍ଡାଙ୍କ ଗସ୍ତ ସୂଚୀରୁ ହିଞ୍ଜିଳି ଏବଂ କଣ୍ଟାବାଞ୍ଜି ବାଦ୍ ପଡ଼ିବା ଅନେକ ପ୍ରଶ୍ନବାଚୀ ସୃଷ୍ଟି କରିଛି।