ନୁଆଦିଲ୍ଲୀ: ନିକଟରେ ଆମେରିକା ଓ ଦକ୍ଷିଣ କୋରିଆ ସାମରିକ ଡ୍ରିଲ୍ ଶେଷ ହୋଇଛି । ଏହାର ମାତ୍ର ୨ ଦିନ ପରେ ଉତ୍ତର କୋରିଆ ପକ୍ଷରୁ ସମୁଦ୍ର ଭିତରେ ଏକାଧିକ କ୍ରୁଜ୍ କ୍ଷେପଣାସ୍ତ୍ର ପରୀକ୍ଷଣ କରାଯାଇଛି । ଏହି କ୍ଷେପଣାସ୍ତ୍ର ଉତ୍ତର କୋରିଆର ପଶ୍ଚିମ ଉପକୂଳରେ ପରୀକ୍ଷା କରାଯାଇଥିବା ଦକ୍ଷିଣ କୋରିଆର ସାମରିକ ବାହିନୀ ଠାବ କରିଛି ।
ଆମେରିକା ଏବଂ ଦକ୍ଷିଣ କୋରିଆର ଏହି ୧୧ ଦିନିଆ ସାମରିକ ତାଲିମକୁ ଉତ୍ତର କୋରିଆ ଯୁଦ୍ଧ ପାଇଁ ପ୍ରସ୍ତୁତି ବୋଲି କହୁଥିବାବେଳେ ୱାଶିଂଟନ ଏବଂ ସିଓଲ ପକ୍ଷରୁ ଏହା ଆତ୍ମସୁରକ୍ଷା ପାଇଁ ପ୍ରସ୍ତୁତି ବୋଲି କୁହାଯାଇଛି । ଯାହ ବି ହେଉ, ଏହି ଯୁଦ୍ଧାଭ୍ୟାସ ପରେ ଉତ୍ତର କୋରିଆ ଏହି ଦୁଇ ଦେଶକୁ ନିଜର ସାମରିକ ଶକ୍ତି ଦେଖାଇଛି । ଗୋଟିଏ ଦିନରେ ଏକାଧିକ କ୍ରୁଜ ମିଶାଇଲ ପରୀକ୍ଷଣ କରିଛି । ଆମେରିକା-ଦକ୍ଷିଣ କୋରିଆର ସାମରିକ ଡ୍ରିଲ୍ ଜବାବରେ, ଉତ୍ତର କୋରିଆ ତା’ର ଅସ୍ତ୍ରଶସ୍ତ୍ର ପରୀକ୍ଷା କାର୍ଯ୍ୟକଳାପକୁ ବୃଦ୍ଧି କରିବାକୁ ଲକ୍ଷ୍ୟ ରଖିଛି ବୋଲି କୁହାଯାଇଛି ।
ସୂଚନାଥାଉ କି, ଉତ୍ତର କୋରିଆ ଆଜି ସକାଳୁ ସକାଳୁ ପଶ୍ଚିମ ଉପକୂଳରେ ଥିବା ୟେଲୋ ସିରେ ଏକାଧିକ କ୍ରୁଜ୍ ମିସାଇଲ୍ ନିକ୍ଷେପ କରିଛି । ସେତିକି ନୁହେଁ,ଆମେରିକା ଓ ଦକ୍ଷିଣ କୋରିଆ ଯୁଦ୍ଧାଭ୍ୟାସ ଶେଷ ହେବାର ଦିନକ ପୂର୍ବରୁ ମଧ୍ୟ ଉତ୍ତର କୋରିଆ ଦୁଇଟି ସର୍ଟ ରେଞ୍ଜ କ୍ଷେପଣାସ୍ତ୍ର ସମୁଦ୍ରରେ ପରୀକ୍ଷଣ କରିଥିଲା । ଏ ନେଇ ଉତ୍ତରକୋରିଆ ମିଡିଆ ପକ୍ଷରୁ କୁହାଯାଇଥିଲା, କିମ ଜୋନ ମିଜାଇଲ ଲଞ୍ଚକୁ ନୀରିକ୍ଷଣ କରୁଛନ୍ତି । ଉତ୍ତର କୋରିଆର ମିଲିଟାରୀ ସ୍ପାଇ ସାଟେଲାଇଟ ପଠାଇବାର ୨ୟ ପରୀକ୍ଷା ବିଫଳ ହୋଇଛି । ଅକ୍ଟୋବରରେ ଏହାର ତୃତୀୟ ପ୍ରୟାସ ଆରମ୍ଭ ହେବ ।