ମୁମ୍ବାଇ: ଥମୁନି ବାଲି ମାଫିଆଙ୍କ ରାଜୁତି। ଯାହାକୁ ରୋକିବା ପାଇଁ ନୂଆ ପଦକ୍ଷେପ ନେବାକୁ ସ୍ଥିର କରିଛନ୍ତି ମହାରାଷ୍ଟ୍ର ସରକାର। ରାଜ୍ୟରେ ବାଲି ମାଫିଆଙ୍କ ଉପଦ୍ରବ ରୋକିବା ପାଇଁ ଅନଲାଇନରେ ବାଲି ବିକ୍ରୟ କରିବାକୁ ନିଷ୍ପତ୍ତି ନିଆଯାଇଛି। ‘ବିନା ଲାଭ ବିନା କ୍ଷତି’ରେ ଏହି ବିକ୍ରି ହେବ ବୋଲି କହିଛନ୍ତି ମହାରାଷ୍ଟ୍ର ରାଜସ୍ୱ ମନ୍ତ୍ରୀ ରାଧାକୃଷ୍ଣ ଭିକେ ପାଟିଲ। ଏହାଦ୍ୱାରା ଲୋକେ ଘର ନିର୍ମାଣ ପାଇଁ ସାମଗ୍ରୀ ରିହାତି ମୂଲ୍ୟରେ ପାଇବେ।ରାଜ୍ୟ କ୍ୟାବିନେଟ ବୈଠକରେ ଭିକେ ପାଟିଲ ବାଲି ଖନନ ନୀତିରେ ପରିବର୍ତ୍ତନ ଆଣିବାକୁ ପ୍ରସ୍ତାବ ରଖିଥିଲେ। ଯାହା ପରେ ଲାଭରେ ଅନଲାଇନରେ ବାଲି ବିକ୍ରି କରିବାକୁ ନିଷ୍ପତ୍ତି ନେଇଥିଲେ। ଏହି ନୀତିରେ ପରିବର୍ତ୍ତନ ବେଆଇନ ଖଣି ଖନନ, ଏହାର ପରିବହନ ଏବଂ ସଂରକ୍ଷଣକୁ ମଧ୍ୟ ରୋକିବାରେ ସହାୟକ ହେବ।ନୂତନ ଯୋଜନା ଅଧୀନରେ ବାଲି ଖଣି ପରିଚାଳନା, ଏହାର ପରିବହନ ଏବଂ ବାଲି ଖଣି ଡିପୋ ନିର୍ମାଣ ପାଇଁ ଟେଣ୍ଡର ଆମନ୍ତ୍ରଣ କରାଯିବ।
ମନ୍ତ୍ରୀ ଆହୁରି ମଧ୍ୟ କହିଛନ୍ତି ଯେ ଏହା ତହସିଲଦାରଙ୍କ ଅଧୀନରେ ଏକ ବୈଷୟିକ କମିଟି ଗଠନ କରିବାରେ ସକ୍ଷମ ହେବ। କେବଳ ସେତିକି ନୁହେଁ, ପୂର୍ବ ନୀତି ଅନୁଯାୟୀ ଅନିୟମିତତା ତଥା ଅପରାଧିକ କାର୍ଯ୍ୟକଳାପ ଲାଗିରହିଛି, ଯେଉଁଥିରେ ସରକାରୀ କର୍ମଚାରୀଙ୍କ ଉପରେ ବାଲି ଖଣି ମାଲିକଙ୍କ ଆକ୍ରମଣକୁ ସୂଚିତ କରାଯାଇଛି।