ଭୁବନେଶ୍ୱର: MMDR ସଂଶୋଧନ ଆଇନ୍ ବିରୁଦ୍ଧରେ ବିରୋଧୀ କଂଗ୍ରେସ ଏବଂ ବିଜୁ ଜନତା ଦଳ (BJD) ସଦସ୍ୟଙ୍କ ହଟ୍ଟଗୋଳ ଓ ବିକ୍ଷୋଭ ଯୋଗୁଁ ସୋମବାର ଦିନ ବିଧାନସଭାରେ ପଞ୍ଚମ ଦିନ ପାଇଁ ହଟ୍ଟଗୋଳ ହୋଇଥିଲା। ଯାହା ଫଳରେ ଗୃହ କାର୍ଯ୍ୟକୁ ଅପରାହ୍ନ ୪ଟା ପର୍ଯ୍ୟନ୍ତ ମୁଲତବୀ ରଖାଯାଇଛି।
ଆଜି କାର୍ଯ୍ୟ ଆରମ୍ଭ ହେବା ମାତ୍ରେ ବିରୋଧୀ ଦଳର ବିଧାୟକମାନେ ପ୍ଲାକାର୍ଡ ଧରି ଓ କଳା ସ୍କାର୍ଫ ପିନ୍ଧି ବିରୋଧ ପ୍ରଦର୍ଶନ କରିବା ସହ ଗୃହର ମଧ୍ୟଭାଗକୁ ଚାଲିଆସିଥିଲେ ଏବଂ ‘ଖଣି ଓ ଖଣିଜ (ବିକାଶ ଓ ନିୟନ୍ତ୍ରଣ) ସଂଶୋଧନ ଆଇନ୍’ ବିରୁଦ୍ଧରେ ସ୍ଲୋଗାନ ଦେଇଥିଲେ। ଏହି ନୂତନ ଖଣି ଆଇନ୍କୁ “ଓଡ଼ିଶା-ବିରୋଧୀ” ଏବଂ “ଆଦିବାସୀ-ବିରୋଧୀ” ବୋଲି ଆଖ୍ୟା ଦେଇ ସେମାନେ ଏହାକୁ ପ୍ରତ୍ୟାହାର କରିବା ପାଇଁ ତୁରନ୍ତ ପଦକ୍ଷେପ ନେବାକୁ ଦାବି କରିଥିଲେ।
ଯେତେବେଳେ ବାଚସ୍ପତି ସୁରମା ପାଢ଼ୀ ସଂସଦୀୟ ବ୍ୟାପାର ମନ୍ତ୍ରୀ ମୁକେଶ ମହାଲିଙ୍ଗଙ୍କୁ ଏକ ପ୍ରଶ୍ନର ଉତ୍ତର ଦେବାକୁ ଅନୁମତି ଦେଲେ, ସେତେବେଳେ ବିରୋଧୀ ସଦସ୍ୟମାନେ ଆହୁରି ହଟ୍ଟଗୋଳ କରିଥିଲେ। କିଛି ଆନ୍ଦୋଳନରତ ସଦସ୍ୟ ରିପୋର୍ଟରଙ୍କ ଟେବୁଲ୍ ଉପରେ ଛିଡ଼ା ହୋଇଥିବା ବେଳେ ଅନ୍ୟ ଏକ ଗୋଷ୍ଠୀ ବାଚସ୍ପତିଙ୍କ ପୋଡିୟମ୍ ନିକଟରେ ସ୍ଲୋଗାନ ଦେଉଥିଲେ।
ତେବେ ଏହା ପୂର୍ବରୁ ବିରୋଧୀ ସଦସ୍ୟଙ୍କୁ ବାରମ୍ବାର ଅନୁରୋଧ କରାଯାଇଥିଲେ ମଧ୍ୟ ତାହା କେହି ଶୁଣିନଥିଲେ, ଫଳସ୍ୱରୂପ ମାତ୍ର ସାତ ମିନିଟ୍ କାର୍ଯ୍ୟ ଚାଲିବା ପରେ ବାଚସ୍ପତି ଗୃହ କାର୍ଯ୍ୟକୁ ସକାଳ ୧୧.୩୦ ପର୍ଯ୍ୟନ୍ତ ମୁଲତବୀ ଘୋଷଣା କରିଥିଲେ। ଏହି ଅଧିବେଶନରେ ସ୍ୱାସ୍ଥ୍ୟ ଓ ପରିବାର କଲ୍ୟାଣ, ଗୃହ, ସଂସଦୀୟ ବ୍ୟାପାର, ଅର୍ଥ, ସାଧାରଣ ପ୍ରଶାସନ ଓ ଜନ ଅଭିଯୋଗ ତଥା ଇଲେକ୍ଟ୍ରୋନିକ୍ସ ଓ ସୂଚନା ପ୍ରଯୁକ୍ତିବିଦ୍ୟା ବିଭାଗ ସମ୍ବନ୍ଧୀୟ ପ୍ରଶ୍ନ ଉପରେ ଆଲୋଚନା ହେବାର କାର୍ଯ୍ୟକ୍ରମ ଥିଲା।
ସକାଳ ୧୧.୩୦ରେ ଗୃହ ପୁନର୍ବାର ଆରମ୍ଭ ହେବା ବେଳେ ସମାନ ପରିସ୍ଥିତି ଦେଖିବାକୁ ମିଳିଥିଲା, କିନ୍ତୁ ଗୃହର ମଧ୍ୟଭାଗରେ ଚାଲିଥିବା ବିରୋଧ ସତ୍ତ୍ୱେ ବାଚସ୍ପତି ‘ଶୂନ୍ୟକାଳ’ ଆଲୋଚନା ପାଇଁ ଅନୁମତି ଦେଇଥିଲେ। ପରେ ବିଜେଡି ବିଧାୟକମାନେ ଗୃହରୁ ବାହାରି ଯାଇ MMDR ଆଇନ ପ୍ରତ୍ୟାହାର ଦାବି କରି ବିଧାନସଭା ବାହାରେ ଆୟୋଜିତ ଦଳର ପ୍ରତିବାଦ ରାଲିରେ ଯୋଗ ଦେଲେ। ଅନ୍ୟପକ୍ଷରେ ହଟ୍ଟଗୋଳ ମଧ୍ୟରେ ଶୂନ୍ୟ କାଳ କାର୍ଯ୍ୟ ପରିଚାଳନା ହେଉଥିବା ବେଳେ କଂଗ୍ରେସ ବିଧାୟକମାନେ କକ୍ଷରେ ସେମାନଙ୍କର ପ୍ରତିବାଦ ଜାରି ରଖିଥିଲେ। ପରେ ଏଭଳି ସ୍ଥିତି ଦେଖି ବାଚସ୍ପତି ପୁଣିଥରେ ଗୃହକୁ ଅପରାହ୍ନ ୪ଟା ଯାଏଁ ମୁଲତବୀ ଘୋଷଣା କରିଥିଲେ।