ଭୁବନେଶ୍ୱର: ନାମଲେଖା ସମୟରେ ଛାତ୍ରଛାତ୍ରୀଙ୍କୁ ସାର୍ଟିଫିକେଟ୍ ପାଇଁ ଆଉ ହଇରାଣ ହେବାକୁ ପଡ଼ିବ ନାହିଁ। ଆବଶ୍ୟକ ପ୍ରମାଣପତ୍ର ବିଳମ୍ବ ଯୋଗୁଁ କୌଣସି ଛାତ୍ରଛାତ୍ରୀ ଶିକ୍ଷାନୁଷ୍ଠାନରେ ନାମଲେଖାରୁ ବଞ୍ଚିତ ହେବେନି ବୋଲି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ସ୍ପଷ୍ଟ କରିଛନ୍ତି।
ଯୁକ୍ତ ଦୁଇ ଓ ସ୍ନାତକ ନାମଲେଖା ପ୍ରକ୍ରିୟା ଆରମ୍ଭ ପରେ ସାର୍ଟିଫିକେଟ୍ ପାଇଁ ଆବେଦନ ବଢ଼ିଛି। ଏହାକୁ ଦୃଷ୍ଟିରେ ରଖି ରାଜ୍ୟର ସମସ୍ତ ରାଜସ୍ୱ ଅଧିକାରୀଙ୍କୁ କଡ଼ା ନିର୍ଦ୍ଦେଶ ଦିଆଯାଇଛି। Odisha Right to Public Services Act, 2012 ଅନୁଯାୟୀ ନିର୍ଦ୍ଧାରିତ ସମୟସୀମା ଭିତରେ ସମସ୍ତ ଆବେଦନ ନିଷ୍ପତ୍ତି କରିବାକୁ କୁହାଯାଇଛି।
ଘରର ଠିକଣା ଓ ଆୟ ପ୍ରମାଣପତ୍ର ଭଳି ଆଧାରିତ ସାର୍ଟିଫିକେଟ୍ ଅନାବଶ୍ୟକ ଅଟକାଇ ରଖିବାକୁ ମନା କରାଯାଇଛି। ଜାତି ପ୍ରମାଣପତ୍ର ପାଇଁ ଗାଁ ଗୁଡିକରେ ଶୀଘ୍ର କ୍ଷେତ୍ର ଯାଞ୍ଚ କରିବାକୁ ସ୍ଥାନୀୟ ରାଜସ୍ୱ କର୍ମଚାରୀଙ୍କୁ ନିର୍ଦ୍ଦେଶ ରହିଛି।
ତହସିଲ୍ କାର୍ଯ୍ୟାଳୟଗୁଡ଼ିକୁ ମଧ୍ୟ ଅତିରିକ୍ତ କାଗଜପତ୍ର ମାଗି ଆବେଦନକାରୀଙ୍କୁ ହଇରାଣ ନ କରିବାକୁ ସତର୍କ କରାଯାଇଛି। e District ପୋର୍ଟାଲରେ ଆସୁଥିବା ଆବେଦନଗୁଡ଼ିକୁ ତୁରନ୍ତ ପ୍ରକ୍ରିୟାକରଣ କରିବା ସହ ସରକାରୀ ରେକର୍ଡ ଓ ଡିଜିଟାଲ୍ ମାଧ୍ୟମ ବ୍ୟବହାର କରି ଯାଞ୍ଚ ତ୍ୱରାନ୍ୱିତ କରିବାକୁ କୁହାଯାଇଛି।
