ଭୁବନେଶ୍ୱର: ଓଡ଼ିଶାରେ ଓଟିପି ସେୟାରିଂ ସ୍କାମର ତଦନ୍ତ ଓ ପଚରାଉଚରା ଚାଲିଥିବା ବେଳେ ଜାତୀୟ ତଦନ୍ତକାରୀ ସଂସ୍ଥା (ଏନଆଇଏ)ର ଟିମ୍ ସୋମବାର ଭୁବନେଶ୍ୱରରେ ପହଞ୍ଚିଛି। ଏହି ମାମଲାରେ ଏଯାବତ୍ ଛଅ ଜଣଙ୍କୁ ଗିରଫ କରାଯାଇଛି।
ଏନେଇ ଆଣ୍ଟି ଟେରରିଜମ ସ୍କ୍ୱାର୍ଡ (ଏଟିଏସ୍) ପକ୍ଷରୁ ସୂଚନା ଦିଆଯାଇଛି। ମହାରାଷ୍ଟ୍ର, ଗୁଇନ୍ଦା ବିଭାଗ, ଏବଂ ଓଡ଼ିଶା ପୋଲିସର ସ୍ପେଶାଲ ଟାସ୍କ ଫୋର୍ସ ଅଭିଯୁକ୍ତ ଅଭିଜିତ ସଞ୍ଜୟ ଜାମ୍ବୁରେଙ୍କୁ ପୂର୍ବରୁ ଜେରା କରିସାରିଛି, ପାକିସ୍ତାନୀ ଗୁଇନ୍ଦା ସଂସ୍ଥା (ପିଆଇଓ) ସହ ଓଟିପି ସେୟାର କରିବା ଅଭିଯୋଗରେ ଜୁନ୍ ୨୯ରେ ପୁଣେରୁ ଗିରଫ କରି ଟ୍ରାଞ୍ଜିଟ୍ ରିମାଣ୍ଡରେ ଭୁବନେଶ୍ୱର ଅଣାଯାଇଥିଲା।
୨୦୨୦ ମସିହାରୁ ଜଣେ ପାକିସ୍ତାନୀ ଏଜେଣ୍ଟ ସହ ତାର ସମ୍ପର୍କ ଥିବା ସହ ଓଡିଶାର ପଠାଣିସାମନ୍ତ ଲେଙ୍କା ସମେତ ଅନ୍ୟ ଗିରଫ ଅଭିଯୁକ୍ତଙ୍କୁ ସେ ଟଙ୍କା ପଠାଉଥିଲା ବୋଲି ଅଭିଯୋଗ ହୋଇଛି। ରାଜ୍ୟରେ ହୋଇଥିବା ନକଲି ସିମ୍ କାର୍ଡ ଓ ଓଟିପି ସେୟାରିଂ ସ୍କାମର ମାଷ୍ଟରମାଇଣ୍ଡ ଲେଙ୍କା ବୋଲି କୁହାଯାଉଛି।
ଅଭିଜିତ୍ ଲେଙ୍କାଙ୍କୁ ଟଙ୍କା ପଠାଇଥିବା ସ୍ୱୀକାର କରିଥିବା ବେଳେ ପାକିସ୍ତାନୀ ଏଜେଣ୍ଟଙ୍କ ସହ ସମ୍ପର୍କକୁ ସେ ଖଣ୍ଡନ କରିଛି। ସେ କହିଛି, ମୁଁ ଥରେ ପଠାଣିସାମନ୍ତ ଲେଙ୍କାଙ୍କୁ ୫୫୦ ଟଙ୍କା ପଠାଇଥିଲି। ମୁଁ ଜାଣିନି ଦାନିଶ ଓ ଖୁରାମ୍ କିଏ। ଏହି ଅଭିଯୋଗ ଭିତ୍ତିହୀନ ବୋଲି ସେ ଗଣମାଧ୍ୟମକୁ କହିଛନ୍ତି।
ତେବେ ଆଇଏସ୍ଆଇ ଓ କିଛି ନାଇଜେରିଆନଙ୍କ ସହ ସମ୍ପୃକ୍ତି ଥିବା ଏସଟିଏଫ୍ ଏସ.ପି କେ. କେ. ପାଣିଗ୍ରାହୀ ସୂଚନା ଦେଇଛନ୍ତି। ଏହା ଏକ ଗମ୍ଭୀର ପ୍ରସଙ୍ଗ। ଆତଙ୍କବାଦୀ ଲିଙ୍କ୍ ଏବଂ ଟେରର ଫଣ୍ଡିଂ ଦିଗକୁ ମଧ୍ୟ ଯାଞ୍ଚ କରାଯାଉଛି। ଅଭିଜିତ୍ ବିଭିନ୍ନ ପିଆଇଓ ଏଜେଣ୍ଟଙ୍କୁ ଟଙ୍କା ପଠାଉଥିଲା। ସେ ଅନେକ ଥର ଲେଙ୍କାଙ୍କୁ ଟଙ୍କା ପଠାଇଥିଲେ। ତେବେ ଅଧିକ ତଥ୍ୟ ଦେବାକୁ ଏହାପରେ ଏସପି ମନା କରିଦେଇଛନ୍ତି।
ଏସଟିଏଫର ସୂଚନା ଅନୁଯାୟୀ, ଅଭିଜିତ ଫେସ୍ବୁକ୍ ମେସେଞ୍ଜର ଜରିଆରେ ପାକିସ୍ତାନରେ ଥିବା ଖାନକି, ଫଇସଲାବାଦର ଜନୈକ ଦାନିଶ ଓରଫ ସୟଦ ଦାନିଶ ଅଲ୍ଲୀ ନକଭିଙ୍କୁ ଭେଟିଥିଲା, ଯିଏକି ୨୦୧୮ରେ ‘ଚେଗ୍’ରେ ନିଜକୁ ଫ୍ରିଲାନ୍ସର ବୋଲି ପରିଚୟ ଦେଇଥିଲା। ପରେ ଦାନିଶ ତାଙ୍କୁ କରାଚିର ବନ୍ଧୁ ଖୁରମ୍ ଓରଫ ଅବଦୁଲ୍ ହମିଦଙ୍କ ସହ ପରିଚୟ କରାଇଥିଲେ।
ଖୁରମ ଜଣେ ବରିଷ୍ଠ ପାକ୍ ସେନା ଗୁଇନ୍ଦା ଅଧିକାରୀ ହୋଇଥିବାରୁ ଭାରତରେ ତାଙ୍କର ଏଜେଣ୍ଟଙ୍କ ଏକ ବଡ଼ ନେଟ୍ଓ୍ୱର୍କ ଥିବା ସନ୍ଦେହ କରାଯାଉଛି। ଖୁରମଙ୍କ ନିର୍ଦ୍ଦେଶରେ ଅଭିଜିତ୍ ଭାରତରେ କାମ କରୁଥିବା ବିଭିନ୍ନ ଏଜେଣ୍ଟଙ୍କୁ ଟଙ୍କା ଟ୍ରାନ୍ସଫର କରୁଥିଲା। ହ୍ବାଟସଆପ ଜରିଆରେ ସେ ଅନ୍ୟୂନ ସାତ ଜଣ ପାକିସ୍ତାନ ନାଗରିକ ଏବଂ ୧୦ ଜଣ ନାଇଜେରିଆ ନାଗରିକଙ୍କ ସହ କଥା ହୋଇଥିଲେ।