ନୂଆଦିଲ୍ଲୀ: ସରିଆସିଲାଣି ୨୦୨୩ । କବାଟ ବାଡେଇଲାଣି ବର୍ଷ ୨୦୨୪ । ୨୦୨୪ର ସ୍ଵାଗତ ପାଇଁ ଚାରିଆଡେ ଉତ୍ସବର ମାହୋଲ । ଦେଶର କୋଣ ଅନୁକୋଣରେ ନବବର୍ଷକୁ ଉତ୍ସାହର ସହ ପାଳନ କରିବା ପାଇଁ ପ୍ରସ୍ତୁତି ଏବେ ଶେଷ ପର୍ଯ୍ୟାୟରେ । ସେପଟେ କିନ୍ତୁ ଭାରତର ପାରମ୍ପରକ ଶତୃ ପାକିସ୍ତାନ ଚଳିତ ବର୍ଷ ନୂଆବର୍ଷ ସେଲିବ୍ରେସନ୍ କରିବ ନାହିଁ। ପାକିସ୍ତାନ ସରକାର ସେଠାରେ ନୂଆ ବର୍ଷ ପାଳନକୁ ବାରଣ କରିଛନ୍ତି। ଯଦି କିଏ ଦେଶରେ ନୂଆବର୍ଷ ପାଳନ କରେ ତାହା ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଛନ୍ତି ପାକିସ୍ତାନ୍ ପ୍ରଧାନମନ୍ତ୍ରୀ ଅନୱାର ଉଲ୍ ହକ୍ କାକର ।
ପାକିସ୍ତାନର ପ୍ରଧାନମନ୍ତ୍ରୀ ଅନୱାର ଉଲ୍ ହକ୍ କାକର ପାଲେଷ୍ଟାଇନବାସୀଙ୍କ ପ୍ରତି ସମର୍ଥନକୁ ଦର୍ଶାଇବା ପାଇଁ ଏହି ପ୍ରତିବନ୍ଧକ ପାକିସ୍ତାନ ସରକାର ଲାଗୁ କରିଛନ୍ତି । ରାଷ୍ଟ୍ରକୁ ଏକ ସଂକ୍ଷିପ୍ତ ସମ୍ବୋଧନରେ ସେ ପାଲେଷ୍ଟାଇନୀୟମାନଙ୍କ ସହ ଏକତା ପ୍ରଦର୍ଶନ କରିବାକୁ ଦେଶବାସୀଙ୍କୁ ନିବେଦନ କରିଛନ୍ତି । କାକର କହିଛନ୍ତି, ‘ପାଲେଷ୍ଟାଇନର ଭୟଙ୍କର ଚିନ୍ତାଜନକ ପରିସ୍ଥିତିକୁ ଦୃଷ୍ଟିରେ ରଖି ଏବଂ ଆମର ପାଲେଷ୍ଟାଇନ ଭାଇ ଓ ଭଉଣୀମାନଙ୍କ ସହିତ ଏକତା ଦେଖାଇବା ପାଇଁ ସରକାର ନୂତନ ବର୍ଷ ପାଳନ ପାଇଁ ଆୟୋଜିତ ହେବାକୁ ଥିବା ସମସ୍ତ ପ୍ରକାର କାର୍ଯ୍ୟକ୍ରମ ଉପରେ କଠୋର ପ୍ରତିବନ୍ଧକ ଲଗାଇଛନ୍ତି।’
କାକର କହିଛନ୍ତି ଯେ, ଅକ୍ଟୋବର ୭ ରେ ଇସ୍ରାଏଲର ବୋମା ବିସ୍ଫୋରଣ ଆରମ୍ଭ ହେବା ପରଠାରୁ ଇସ୍ରାଏଲ ସେନା “ହିଂସା ଏବଂ ଅନ୍ୟାୟର ସମସ୍ତ ସୀମା ଅତିକ୍ରମ କରି ପ୍ରାୟ ୯,୦୦୦ ପିଲାଙ୍କ ସମେତ ୨୧,୦୦୦ରୁ ଅଧିକ ପାଲେଷ୍ଟାଇନୀୟଙ୍କୁ ହତ୍ୟା କରିଥିଲା। ଏତେ ସଂଖ୍ୟକ ନିରୀହ ପିଲା ଏବଂ ଅସ୍ତ୍ରଶସ୍ତ୍ର ପାଲେଷ୍ଟାଇନୀୟଙ୍କ ହତ୍ୟାକାଣ୍ଡରେ ସମଗ୍ର ପାକିସ୍ତାନ ଏବଂ ମୁସଲମାନ ସମ୍ପ୍ରଦାୟ ଗଭୀର ଦୁଃଖିତ। ‘
କାକର କହିଛନ୍ତି ଯେ ପାକିସ୍ତାନ ପାଲେଷ୍ଟାଇନକୁ ଦୁଇଟି ସହାୟତା ପ୍ୟାକେଜ୍ ପଠାଇଛି ଏବଂ ତୃତୀୟ ପ୍ୟାକେଜ୍ ପ୍ରସ୍ତୁତ ହେଉଛି। ସେ କହିଛନ୍ତି ଯେ ପାଲେଷ୍ଟାଇନକୁ ଠିକ ସମୟରେ ସହାୟତା ଯୋଗାଇବା ଏବଂ ଗାଜାରେ ଉପସ୍ଥିତ ଆହତମାନଙ୍କୁ ସ୍ଥାନାନ୍ତର କରିବା ପାଇଁ ପାକିସ୍ତାନ ଜୋର୍ଡାନ ଏବଂ ଇଜିପ୍ଟ ସହ ଆଲୋଚନା କରୁଛି।