କୋଲକତା: ଇଣ୍ଡିଆନ ପ୍ରିମିୟର ଲିଗର ଆଗାମୀ ସଂସ୍କରଣ ପାଇଁ କୋଲକାତା ନାଇଟ ରାଇଡର୍ସ ଚନ୍ଦ୍ରକାନ୍ତ ପଣ୍ଡିତଙ୍କୁ କୋଚ ଦାୟିତ୍ୱ ପ୍ରଦାନ କରିଛି । ବ୍ରେଣ୍ଡନ ମ୍ୟାକକୁଲାମଙ୍କ ସ୍ଥାନରେ ସେ ଏହି ଦାୟିତ୍ୱ ଗ୍ରହଣ କରିବେ । ପଣ୍ଡିତଙ୍କ କୋଚିଂ ବଳରେ ମଧ୍ୟପ୍ରଦେଶ ପ୍ରଥମ ଥର ପାଇଁ ରଣଜୀ ଟ୍ରଫି ଟାଇଟଲ ଜିତିବାରେ ସକ୍ଷମ ହୋଇଥିଲା । ୨୦୨୨ରେ କେକେଆରର ପ୍ରଦର୍ଶନ ନୈରାଶ୍ୟଜନକ ରହିବାରୁ ଏବଂ ମ୍ୟାକକୁଲାମ ଇଂଲଣ୍ଡ କୋଚ ଦାୟିତ୍ୱ ତୁଲାଇବା ପାଇଁ ଚୁକ୍ତିବଦ୍ଧ ହେବା ଫଳରେ ଏହି ସ୍ଥାନ ଖାଲି ପଡିଥିଲା । ୱିକେଟ କିପର ତଥା ବ୍ୟାଟ୍ସମ୍ୟାନ ପଣ୍ଡିତ ଜାତୀୟ ଦଳ ପକ୍ଷରୁ ୫ଟି ଟେଷ୍ଟ ଏବଂ ୩୬ଟି ଦିନିକିଆ ମ୍ୟାଚ ଖେଳିବା ଗୌରବ ଅର୍ଜନ କରିଛନ୍ତି । ମୁମ୍ବାଇ ଓ ବିଦର୍ଭ ଟିମର କୋଚ ଦାୟିତ୍ୱ ମଧ୍ୟ ସେ ତୁଲାଇଛନ୍ତି । ସେ ଘରୋଇ କ୍ରିକେଟରେ ୮ ହଜାରରୁ ଅଧିକ ରନ ସଂଗ୍ରହ କରିଛନ୍ତି । ଶ୍ରେୟାଶ ଆୟାର ଏବଂ ପଣ୍ଡିତଙ୍କ କମ୍ବିନେଶନ ଦଳକୁ ଫାଇଦାରେ ରଖିବ ବୋଲି କେକେଆର ପକ୍ଷରୁ କୁହାଯାଇଛି ।
