ଭୁବନେଶ୍ୱର: ମେ ୩ ତାରିଖ ପରେ ବାହାର ରାଜ୍ୟରୁ ଓଡିଶା ଫେରିବେ ଲକ୍ଷାଧିକ ଶ୍ରମିକ । ଏଥିପାଇଁ ରାଜ୍ୟ ସରକାର ବଡ ଧରଣର ଯୋଜନା କରିଛନ୍ତି । ପ୍ରବାସୀ ଶ୍ରମିକଙ୍କ ରହିବା, ଖାଇବା ଓ ଚିକିତ୍ସାର ବ୍ୟାବସ୍ଥା କରାଯାଇଛି । କରୋନା ମୁକାବିଲା ପାଇଁ ରାଜ୍ୟ ସରକାର ଓ କେନ୍ଦ୍ର ସରକାରଙ୍କ ପଦକ୍ଷେପକୁ ପ୍ରଶଂସା କରିଛନ୍ତି ପିସିସି ସଭାପତି ନିରଂଜନ ପଟ୍ଟନାୟକ ।
ସେ କହିଛନ୍ତି, ରାଜ୍ୟ ସରକାର ଶ୍ରମିକଙ୍କ ପାଇଁ ଅନେକ ଯୋଜନା କରୁଛନ୍ତି । ତେବେ ଘରକୁ ଆଣିବା ପୂର୍ବରୁ ସେମାନଙ୍କ ପାଇଁ ସେହି ରାଜ୍ୟରେ ଆଗ ଭଲ ବ୍ୟବସ୍ଥା କରନ୍ତୁ । ସେମାନଙ୍କ ଖାଇବା, ପିଇବା ଓ ରହିବା ବ୍ୟବସ୍ଥା କରନ୍ତୁ । ଏଥିପାଇଁ ରାଜ୍ୟ ସରକାର ଚାହିଁଲେ ପ୍ରତି ପରିବାରକୁ ୫ ହଜାର ଟଙ୍କା ଲେଖାଏଁ ଦିଆଯାଇପାରିବ ।
ଏଥିସହ ଫେରିବାକୁ ଥିବା ସମସ୍ତ ଶ୍ରମିକ ଭାଇଭଉଣୀଙ୍କର ସେଠାରେ ହିଁ ସ୍ୱାବ୍ ପରୀକ୍ଷା କରାଯାଉ । ଏହାପରେ ସେମାନଙ୍କୁ ଓଡିଶା ଫେରାଇ ଅଣାଯିବା ଉଚିତ ବୋଲି ନିରଂଜନ କହିଛନ୍ତି ।
ବର୍ତ୍ତମାନ ପଡୋଶୀ ରାଜ୍ୟ ପଶ୍ଟିମବଙ୍ଗରୁ ଶ୍ରମିକ ଆସି ଓଡିଶାରେ ସଂକ୍ରମଣ ବଢାଇଛନ୍ତି । ଯାଜପୁର, ବାଲେଶ୍ୱର ଓ ଭଦ୍ରକରେ କରୋନା ଆକ୍ରାନ୍ତଙ୍କ ସଂଖ୍ୟା ଚିନ୍ତା ବଢାଇଲାଣି । ଏଭଳି ସ୍ଥିତିରେ ଯଦି ସୁରାଟ, ମୁମ୍ବାଇ ଏବଂ ଅନ୍ୟ ସ୍ଥାନରୁ ଲକ୍ଷାଧିକ ସଂଖ୍ୟାରେ ପ୍ରବାସୀ ଓଡିଆ ଆସିବେ ତେବେ ସ୍ଥିତି ଗମ୍ଭୀର ହୋଇପାରେ ବୋଲି ପିସିସି ସଭାପତି ଆଶଙ୍କା କରିଛନ୍ତି ।
Comments are closed.