ନୀତିଶଙ୍କୁ ଚ୍ୟାଲେଂଜ, ପ୍ରଶାନ୍ତ କିଶୋର କହିବେ ‘ବାତ୍ ବିହାର କି’

ପାଟନା: ନିର୍ବାଚନ ଷ୍ଟ୍ରାଟେଜିଷ୍ଟ ପ୍ରଶାନ୍ତ କିଶୋର ଜେଡିୟୁୁରୁ ବିଦା ହେବା ପରେ ଖୁଲମଖୁଳା ବିହାର ମୁଖ୍ୟମନ୍ତ୍ରୀ ନୀତିଶ କୁମାରଙ୍କୁ ଚ୍ୟାଲେଂଜ କରିଛନ୍ତି । ବିହାର ନିର୍ବାଚନ ପୂର୍ବରୁ ଆଜି ପ୍ରଶାନ୍ତ କିଶୋର ଏକ ସମ୍ବାଦିକ ସମ୍ମିଳନୀ କରିଛନ୍ତି । ଏହି ସମ୍ମିଳନୀରେ ସେ ‘ବାତ୍ ବିହାର କି’ ନାମକ ଏକ ଅଭିଯାନ ଆରମ୍ଭ କରିବା ନେଇ ଘୋଷଣା କରିଛନ୍ତି । ଆସନ୍ତା ୨୦ରୁ ଏହି ଅଭିଯାନ ଆରମ୍ଭ ହେବ । ଏହି କାର୍ଯ୍ୟକ୍ରମ ମାଧ୍ୟମରେ ସେ ବିହାର ପାଇଁ କାମ କରିବେ ଓ ବିହାରକୁ ଦେଶର ଟପ୍‌-୧୦ ରାଜ୍ୟ ମଧ୍ୟରେ ସାମିଲ କରିବେ ବୋଲି କହିଛନ୍ତି ।
ଏଥିସହ ପ୍ରଶାନ୍ତ କିଶୋର ବିହାର ମୁଖ୍ୟମନ୍ତ୍ରୀ ନୀତିଶ କୁମାରଙ୍କୁ ବେଶ୍ ସମାଲୋଚନା ମଧ୍ୟ କରିଛନ୍ତି । ନୀତିଶଙ୍କ ବିକାଶ ମଡେଲ ଉପରେ ପ୍ରଶ୍ନ ଉଠାଇଛନ୍ତି । ସେ କହିଛନ୍ତି ଯେ, ବିହାର ୨୦୦୫ ମସିହାରେ ସବୁଠାରୁ ଗରିବ ରାଜ୍ୟ ଥିଲା, ଆଜି ମଧ୍ୟ ତାହା ଅଛି । ମହାରାଷ୍ଟ୍ର ଓ କର୍ଣ୍ଣାଟକ ତୁଳନାରେ ଏହି ରାଜ୍ୟ କେତେ ଉନ୍ନତି କରିଛି ବୋଲି ସେ ପ୍ରଶ୍ନ କରିଛନ୍ତି । ସେ ଆହୁରି କହିଛନ୍ତି ଯେ, ଶହେ ଦିନ ଧରି ସେ ବିହାର ବୁଲିବେ ଏବଂ ନୀତିଶ କୁମାରଙ୍କ କୁଶାସନ ବାବଦରେ ଲୋକଙ୍କୁ ସଚେତନ କରାଇବେ । ବିହରରେ ବିକାଶ ଚାହୁଁଥିବା ଯୁବବର୍ଗଙ୍କୁ ‘ବାତ୍ ବିହାର କି’ ଅଭିଯାନରେ ସାମିଲ ହେବା ପାଇଁ ଆହ୍ୱାନ କରିଛନ୍ତି ପ୍ରଶାନ୍ତ କିଶୋର ।