ଝାରସୁଗୁଡା: ବରଗଡ ଲୋକସଭା ଆସନ ତଥା ଏହା ଅଧୀନରେ ଆସୁଥିବା ଝାରସୁଗୁଡାର ବ୍ରଜରାଜନଗରରେ ଭାରତୀୟ ଜନତା ପାର୍ଟିକୁ ବଡ଼ ଝଟକା। ପୂର୍ବତନ ବିଧାୟକ ରାଧାରାଣୀ ପଣ୍ଡା ବିଜେପି ଛାଡ଼ି ଶାସକ ବିଜୁ ଜନତା ଦଳରେ ଯୋଗ ଦେଇଛନ୍ତି। ବ୍ରଜରାଜନଗରର ପୂର୍ବତନ ବିଧାୟକ ତାଙ୍କ ଇସ୍ତଫା ପତ୍ର ରାଜ୍ୟ ବିଜେପି ସଭାପତି ମନମୋହନ ସାମଲଙ୍କୁ ପଠାଇବା ପରେ ବିଜେଡିରେ ଯୋଗ ଦେଇଛନ୍ତି।
ବିଜେଡି ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସଙ୍କ ଉପସ୍ଥିତିରେ ପୂର୍ବତନ ବିଧାୟକ ଆଞ୍ଚଳିକ ଦଳରେ ଯୋଗ ଦେଇଛନ୍ତି। ଚଳିତଥର ବିଜେପି ରାଧାରାଣୀଙ୍କୁ ଟିକେଟ୍ ଦେଇନଥିଲା। ଏହାପରେ ସେ ଦଳରେ ଅସନ୍ତୋଷ ଥିଲେ। ନିକଟରେ ବରଗଡ ଲୋକସଭା ଆସନରୁ ବିଜେପି ପ୍ରାର୍ଥୀ ହୋଇଥିବା ପ୍ରଦୀପ ପୂରୋହିତ ରାଧାରାଣୀଙ୍କୁ ଭେଟିଥିଲେ। ସେ ତାଙ୍କ ପାଇଁ ପ୍ରଚାର କରିବେ ବୋଲି ପ୍ରତିଶ୍ରୁତି ଦେଇଥିଲେ। ଏହାପରେ ରାଧାରାଣୀ କିନ୍ତୁ ତାଙ୍କ ନିଷ୍ପତ୍ତିରେ ପରିବର୍ତ୍ତନ କରିଛନ୍ତି। ସେ ୨୦୧୪ରୁ ୨୦୧୯ ପର୍ଯ୍ୟନ୍ତ ରାଜ୍ୟ ବିଧାନସଭାରେ ବ୍ରଜରାଜନଗରରୁ ପ୍ରତିନିଧିତ୍ୱ କରିଥିଲେ।
ଚଳିତଥର ବିଜେପି ବ୍ରଜରାଜନଗର ଆସନରୁ ବରଗଡ ସାଂସଦ ସୁରେଶ ପୂଜାରୀଙ୍କୁ ପ୍ରାର୍ଥୀ କରିଛି। କୁହାଯାଏ ଏକଦା ସୁରେଶ ପୂଜାରୀ ଏବଂ ରାଧାରାଣୀ ଭଲ ବନ୍ଧୁ ଥିଲେ। କିନ୍ତୁ ଏବେ ପରସ୍ପରର ଘୋର ଶତ୍ରୁ ବୋଲି ଜଣାଶୁଣା।
Comments are closed.