ଲାଲକିଲ୍ଲା ଆତ୍ମଘାତୀ ବିସ୍ଫୋରଣ: ଡାକ୍ତର ଉମର ନବୀ ଥିଲା ମାଷ୍ଟରମାଇଣ୍ଡ, ୭୫୦୦ ପୃଷ୍ଠାର ଚାର୍ଜସିଟ୍ ଦାଖଲ କଲା ଏନଆଇଏ
ନୂଆଦିଲ୍ଲୀ: ଗତ ବର୍ଷ ନଭେମ୍ବର ମାସରେ ଦିଲ୍ଲୀର ଐତିହାସିକ ଲାଲକିଲ୍ଲା ନିକଟରେ ଘଟିଥିବା ଭୟଙ୍କର କାର୍ ବିସ୍ଫୋରଣ ମାମଲାରେ ଜାତୀୟ ତଦନ୍ତକାରୀ ସଂସ୍ଥା ଏକ ବଡ଼ ଏବଂ ଚାଞ୍ଚଲ୍ୟକର ଖୁଲାସା କରିଛି। ଏନଆଇଏ ପକ୍ଷରୁ ଦାଖଲ କରାଯାଇଥିବା ପ୍ରାୟ ୭,୫୦୦ ପୃଷ୍ଠାର ସମ୍ପୂର୍ଣ୍ଣ ଚାର୍ଜସିଟ୍ରେ ଦର୍ଶାଯାଇଛି ଯେ, ଆତଙ୍କବାଦୀମାନେ ବିସ୍ଫୋରକ ପ୍ରସ୍ତୁତି ଏବଂ ରକେଟ୍ ତିଆରି ଶିଖିବା ପାଇଁ ଆଧୁନିକ ପ୍ରଯୁକ୍ତିବିଦ୍ୟା ଯଥା- ୟୁଟ୍ୟୁବ୍ ଏବଂ ଆର୍ଟିଫିସିଆଲ ଇଣ୍ଟେଲିଜେନ୍ସର ବ୍ୟବହାର କରିଥିଲେ ।
ତଦନ୍ତରୁ ଜଣାପଡ଼ିଛି ଯେ, ଏହି କାଣ୍ଡର ମୁଖ୍ୟ ଆତ୍ମଘାତୀ ବୋମ୍ବର୍ ଡାକ୍ତର ଉମର ଅନ୍ ନବୀ ଥିଲା। ବିସ୍ଫୋରଣ ସ୍ଥଳରୁ ମିଳିଥିବା ଡିଏନ୍ଏ ପ୍ରମାଣ ଏହା ସ୍ପଷ୍ଟ କରିଛି ଯେ, ଯେତେବେଳେ ହୁଣ୍ଡାଇ ଆଇ-୨୦ କାର୍ରେ ବିସ୍ଫୋରଣ ଘଟିଥିଲା, ସେତେବେଳେ ଡାକ୍ତର ଉମର ନବୀ ନିଜେ ଗାଡ଼ି ଭିତରେ ଉପସ୍ଥିତ ଥିଲେ। ଦେଶର ସାର୍ବଭୌମତ୍ୱ ଏବଂ ପ୍ରତୀକ ସ୍ୱରୂପ ଲାଲକିଲ୍ଲାକୁ ଏହି ବିନାଶକାରୀ ଆକ୍ରମଣ ପାଇଁ ଜାଣିଶୁଣି ଟାର୍ଗେଟ୍ କରାଯାଇଥିଲା, ଯେଉଁଥିରେ ଅନେକ ନିରୀହ ଜୀବନ ଚାଲିଯାଇଥିଲା ।
ତଦନ୍ତକାରୀ ସଂସ୍ଥା ଅନୁଯାୟୀ, ଆତଙ୍କବାଦୀମାନେ କୌଣସି ପାରମ୍ପରିକ କ୍ୟାମ୍ପରେ ପ୍ରଶ୍ନ ନ ପାଇ, ସମ୍ପୂର୍ଣ୍ଣ ରୂପେ ଡିଜିଟାଲ୍ ମାଧ୍ୟମ ଉପରେ ନିର୍ଭର କରିଥିଲେ। ବୋମ୍ବ ତିଆରି କରିବା ପାଇଁ ଆବଶ୍ୟକୀୟ ରାସାୟନିକ ପଦାର୍ଥ ଏବଂ Triacetone Triperoxide ଭଳି ମାରାତ୍ମକ ବିସ୍ଫୋରକର ସଠିକ୍ ଅନୁପାତ ଜାଣିବାକୁ ସେମାନେ ChatGPT ଏବଂ YouTube ଭିଡିଓଗୁଡ଼ିକର ସହାୟତା ନେଇଥିଲେ । ଏହାଛଡ଼ା, ବିସ୍ଫୋରଣ ପାଇଁ ଆବଶ୍ୟକ ସରଞ୍ଜାମ ଏବଂ ରିମୋଟ୍ ଟ୍ରିଗରିଂ ଉପକରଣଗୁଡ଼ିକ ଅନଲାଇନ୍ ଇ-କମର୍ସ ପ୍ଲାଟଫର୍ମ ଜରିଆରେ କ୍ରୟ କରାଯାଇଥିଲା ।
ଏହି ସମ୍ପୂର୍ଣ୍ଣ ଷଡ଼ଯନ୍ତ୍ରକୁ ପଦାକୁ ଆଣିବା ପରେ ଏନଆଇଏ କୋର୍ଟ ଚାର୍ଜସିଟ୍ ଗ୍ରହଣ କରିଛନ୍ତି ଏବଂ ମାମଲାରେ ସଂପୃକ୍ତ ଅନ୍ୟ ସହଯୋଗୀମାନଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନକୁ ଜୋର୍ଦାର କରିଛନ୍ତି। ଆଧୁନିକ ଟେକ୍ନୋଲୋଜିର ଏଭଳି ଅପବ୍ୟବହାର ଦେଶର ଆଭ୍ୟନ୍ତରୀଣ ସୁରକ୍ଷା ପାଇଁ ଏକ ବଡ଼ ଆହ୍ୱାନ ସୃଷ୍ଟି କରିଛି ବୋଲି ସୁରକ୍ଷା ଏଜେନ୍ସିଗୁଡ଼ିକ ମତ ପ୍ରକାଶ କରିଛନ୍ତି।
