ଅନୁବାଦ କବିତା : ସମାଧିରେ ଶୋଇବ?

ମୂଳ ବଙ୍ଗଳା : ଶକ୍ତି ଚଟ୍ଟୋପାଧ୍ୟାୟ

ପୁରୀ ସମୁଦ୍ରକୁ ଛାଣି
ଆଣିଛି ମୁଁ ଶାମୁକା ଗୋଟାଇ
ଶଙ୍ଖ, ତାରା ମାଛ, ସାଗରର ଘୋଡ଼ା
ଫେଣର ମଧୁରତା ଆଣି
ବିଛଣାରେ ଦେଇଛି ମେଲାଇ।

ପାତିଛି ଶିମୁଳି ତୁଳା, ବରଫ ଓ ଲୁଣ
ପିଠି ଓ ହାଡ଼ରେ ଯେହ୍ନେ ଲାଗିବନି
ଅବା ଲାଗି ରହିବନି କଳାଦାଗ କିଛି
ଅଥବା କାଦୁଅ, ସେଥିପାଇଁ
ପୁରା ଆୟୋଜନ।

ତଥାପି ବି କିଛିଟା ତ କଷ୍ଟ ହେବ,
ସେଟା ମୋତେ ଜଣା
ତେଣୁ ତୁମ ବିଛଣାରେ ଫୋମର ଚାଦର,
ସେଠାରେ ସୁଖରେ ଥାଅ,
ଜୀବନରେ ବହୁ କଷ୍ଟ ପାଇ
ଭାଙ୍ଗିଯା ପଡ଼ିଛି ତାକୁ ହେବନି ଗଢାଇ
ସେଇଟା ବି ଜଣା ମୋତେ
ସେଥିପାଇଁ କରୁଛି ଓ କରି ଚାଲିଥିବି
ବଳ ଓ ବୟସ ସହ ପାରୁଥିବି ଯେତେ।
କିଛିଦିନ ପରେ ଏଇ ଧୁଳିଘାସ ଦେଖି
ଖୁବ୍ ଖୁସି ହେବ,
ମୋ ଯତ୍ନର ଆଭାସ ପାଇବ ।

ସମାଧିରେ ଶୋଇବ ? ଶୋଇପଡ଼
ଭଲ ଏ ବିଛଣା ,
ୟାକୁ ଛାଡ଼ି କେବେ ଉଠିବନି
ଉଠିବାକୁ, ଛୁଟିବାକୁ ଭଲ ଲାଗିବନି
ଥକି ପଡିବ, କ୍ଳାନ୍ତ, ଶ୍ରାନ୍ତ ହୋଇଯିବ।
ଶୋଇବକି ସମାଧିରେ ? ଅନନ୍ତ ନିଦ୍ରାରେ
ବିଛଣାଟି ଖୁବ୍ ଭଲ ,ଶୁଅ ଆରାମରେ।

ଅନୁବାଦ: ମନୋରଞ୍ଜନ ହୋତା