ଆଗାମୀ ୨-୩ ବର୍ଷରେ ଆସିପାରେ ଡେଙ୍ଗୁର ସ୍ୱତନ୍ତ୍ର ଚିକିତ୍ସା; କିନ୍ତୁ ଜଳବାୟୁ ପରିବର୍ତ୍ତନ ବଢ଼ାଇବ ସଂକ୍ରମଣ ବିପଦ

ନୂଆଦିଲ୍ଲୀ: ଡେଙ୍ଗୁ ମୁକାବିଲାକୁ ନେଇ ଭାରତ ପାଇଁ ଏକ ଆଶ୍ୱସ୍ତିକର ତଥା ଚିନ୍ତାଜନକ ଖବର ସାମ୍ନାକୁ ଆସିଛି। ଯଦି ବର୍ତ୍ତମାନ ଚାଲିଥିବା କ୍ଲିନିକାଲ୍ ଟ୍ରାଏଲ୍ ସଫଳ ହୁଏ, ତେବେ ଆଗାମୀ ୨ ରୁ ୩ ବର୍ଷ ମଧ୍ୟରେ ଡେଙ୍ଗୁ ପାଇଁ ସ୍ୱତନ୍ତ୍ର ଏବଂ ‘ଟାର୍ଗେଟେଡ୍’ ଚିକିତ୍ସା ବ୍ୟବସ୍ଥା ଭାରତୀୟ ଡାକ୍ତରଖାନାଗୁଡ଼ିକରେ ଉପଲବ୍ଧ ହେବାର ସମ୍ଭାବନା ରହିଛି। ତେବେ ଏହା ସହିତ ସ୍ୱାସ୍ଥ୍ୟ ବିଶେଷଜ୍ଞମାନେ ଚେତାବନୀ ଦେଇଛନ୍ତି ଯେ, ଜଳବାୟୁ ପରିବର୍ତ୍ତନ କାରଣରୁ ଆଗାମୀ ଦଶନ୍ଧିରେ ଡେଙ୍ଗୁ ସଂକ୍ରମଣ ଦ୍ରୁତ ଗତିରେ ବୃଦ୍ଧି ପାଇବାର ଆଶଙ୍କା ରହିଛି।

ବର୍ତ୍ତମାନ ସୁଦ୍ଧା ଡେଙ୍ଗୁ ପାଇଁ କୌଣସି ନିର୍ଦ୍ଦିଷ୍ଟ ବା ଅନୁମୋଦିତ ଔଷଧ ନାହିଁ। କେବଳ ଲକ୍ଷଣ ଭିତ୍ତିକ ସହାୟକ ଚିକିତ୍ସା ମାଧ୍ୟମରେ ରୋଗୀଙ୍କୁ ସୁସ୍ଥ କରାଯାଉଛି, ଯାହାକି ସ୍ୱାସ୍ଥ୍ୟସେବା କ୍ଷେତ୍ରରେ ଏକ ବଡ଼ ବ୍ୟବଧାନ ବୋଲି ବିବେଚନା କରାଯାଏ। ନିକଟରେ ନୂଆଦିଲ୍ଲୀଠାରେ ବିଶ୍ୱ ସ୍ୱାସ୍ଥ୍ୟ ସଂଗଠନ, ଆଇସିଏମଆର, ନୀତି ଆୟୋଗ ଏବଂ ବିଭିନ୍ନ ପ୍ରମୁଖ ଔଷଧ ନିର୍ମାତା କମ୍ପାନୀଙ୍କୁ ନେଇ ଏକ ଉଚ୍ଚସ୍ତରୀୟ ବୈଠକ ଅନୁଷ୍ଠିତ ହୋଇଥିଲା। ଏହି ବୈଠକରେ ଡେଙ୍ଗୁ ପାଇଁ ସଠିକ୍ ଥେରାପିର ବିକାଶ ଉପରେ ଗୁରୁତ୍ୱାରୋପ କରାଯାଇଛି।

ଭାରତ, ବ୍ରାଜିଲ, ମାଲେସିଆ ଏବଂ ଥାଇଲ୍ୟାଣ୍ଡକୁ ନେଇ ଗଠିତ ‘ଡେଙ୍ଗୁ ଆଲାଏନ୍ସ’ ଏବେ ଡେଙ୍ଗୁ ଔଷଧର ବିକାଶ ପ୍ରକ୍ରିୟାକୁ ତ୍ୱରାନ୍ୱିତ କରୁଛି। ଡିଏନଡିଆଇର ଦକ୍ଷିଣ ଏସିଆ ନିର୍ଦ୍ଦେଶକ ଡାକ୍ତର ସଞ୍ଜୟ ସରିନ୍ ସୂଚନା ଦେଇଛନ୍ତି ଯେ, ଆଣ୍ଟିଭାଇରାଲ୍ ଏବଂ ମୋନୋକ୍ଲୋନାଲ୍ ଆଣ୍ଟିବଡି ସମେତ ଅନେକ ନୂଆ ଔଷଧ ବର୍ତ୍ତମାନ କ୍ଲିନିକାଲ୍ ଟ୍ରାଏଲର ଏଡଭାନ୍ସ (ଉନ୍ନତ) ପର୍ଯ୍ୟାୟରେ ରହିଛି।

ଭାରତରେ ‘ଟ୍ରାନ୍ସଲେସନାଲ ହେଲ୍ଥ ସାଇନ୍ସ ଆଣ୍ଡ ଟେକ୍ନୋଲୋଜି ଇନଷ୍ଟିଚ୍ୟୁଟ୍’ (THSTI) ଏବଂ ଆଇସିଏମଆର ଏହି ଗବେଷଣାକୁ ସମର୍ଥନ କରୁଛନ୍ତି। ବିଶେଷ କରି, ‘ସେରମ୍ ଇନଷ୍ଟିଚ୍ୟୁଟ୍’ ପକ୍ଷରୁ ବର୍ତ୍ତମାନ ଏକ ଡେଙ୍ଗୁ ମୋନୋକ୍ଲୋନାଲ ଆଣ୍ଟିବଡି ଟ୍ରିଟମେଣ୍ଟର ଫେଜ୍-୩ (Phase-3) ଟ୍ରାଏଲ୍ ଚାଲିଛି।

ଏକ ନିର୍ଦ୍ଦିଷ୍ଟ ଟାର୍ଗେଟେଡ୍ ଚିକିତ୍ସା ଆସିବାକୁ ଥିଲେ ମଧ୍ୟ ବିପଦ ଟଳିନାହିଁ। ନୀତି ଆୟୋଗର ସଦସ୍ୟ ଭି.କେ. ପଲ୍ କହିଛନ୍ତି ଯେ, ଜଳବାୟୁ ପରିବର୍ତ୍ତନ ଏବଂ ଦ୍ରୁତ ସହରୀକରଣ ଯୋଗୁଁ ଡେଙ୍ଗୁ ଏବେ କେବଳ ଏକ ଋତୁକାଳୀନ ରୋଗ (ଯେପରିକି କେବଳ ବର୍ଷା ଦିନେ ହେଉଥିବା ବେମାରୀ) ହୋଇ ରହିନାହିଁ। ପରିବେଶରେ ଅସନ୍ତୁଳନ ଯୋଗୁଁ ଏହା ଭୌଗୋଳିକ ସୀମା ଅତିକ୍ରମ କରି ବର୍ଷ ସାରା ବ୍ୟାପିବାରେ ଲାଗିଛି।

ସୂଚନାଯୋଗ୍ୟ ଯେ, ୨୦୨୩ ମସିହାରେ ଭାରତରେ ୨.୮ ଲକ୍ଷରୁ ଅଧିକ ଡେଙ୍ଗୁ ମାମଲା ସରକାରୀ ଖାତାରେ ରେକର୍ଡ କରାଯାଇଥିଲା, ଯାହାକି ବାସ୍ତବିକ ସଂଖ୍ୟା ଠାରୁ କମ୍ ହୋଇପାରେ। ତେଣୁ ସମ୍ଭାବ୍ୟ ବିପଦକୁ ଦୃଷ୍ଟିରେ ରଖି ବର୍ତ୍ତମାନ କେନ୍ଦ୍ର ସରକାର ଜିଲ୍ଲାସ୍ତରୀୟ ଡାକ୍ତରଖାନା ଏବଂ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରଗୁଡ଼ିକରେ ଭିତ୍ତିଭୂମି ବିକାଶ ଓ ‘ଫିଭର୍ ସର୍ଭେଲାନ୍ସ’କୁ କଡ଼ାକଡ଼ି କରୁଛନ୍ତି। ଯଦି ଚାଲିଥିବା ଟ୍ରାଏଲଗୁଡ଼ିକ ସଫଳ ହୁଏ, ତେବେ ଖୁବ୍ ଶୀଘ୍ର ଡେଙ୍ଗୁକୁ ମୂଳରୁ ବିନାଶ କରିବାର ଅସ୍ତ୍ର ସ୍ୱାସ୍ଥ୍ୟ ବିଭାଗ ହାତରେ ଲାଗିବ।