ବ୍ୟୁରୋ: ଏଚଆଇଭି ଭାଇରସକୁ ମୂଳରୁ ଦମନ କରିବାର ନୂଆ ଅଧ୍ୟୟନ ସାମ୍ନାକୁ ଆସିଛିା ଏଣିକି ବଟିକା ନୁହେଁ ଏଚଆଇଭି ଇଂଜେକ୍ସନ ଭାଇରସକୁ ମୂଳୋତ୍ପାଟନ କରିବାରେ ହେବ ରାମ ବାଣ । ଦ ଲାନସେଟ୍ରେ ପ୍ରକାଶିତ ଏକ ଅଧ୍ୟୟନରୁ ଜଣାପଡିଛି ଯେ, ଇଂଜେକ୍ସନ ନେଉଥିବା ଗୋଟେ ପ୍ରତିଶତ ଲୋକଙ୍କ ମଧ୍ୟରେ ୯୬ ସପ୍ତାହ ଯାଏ ଭାଇରସ୍ ଦେଖାଯାଇନଥାଏ । ତାପରେ ପୁଣି ଭାଇରସ୍ ଜଣାପଡେ । ସେପଟେ କିନ୍ତୁ ବଟିକା ଖାଉଥିବା ୧୫ ଲୋକଙ୍କ ଶରୀରରେ ୬ପ୍ରତିଶତ ଭାଇରସ୍ ମିଳିଥାଏ । ଏକ ଆଫ୍ରିକୀୟ କ୍ଲିନିକାଲ ପରୀକ୍ଷଣରେ କିଶୋରମାନଙ୍କ ମଧ୍ୟରେ ପ୍ରତିଦିନ ଟାବଲେଟ୍ ଅପେକ୍ଷା ୮ ସପ୍ତାହରେ ଏଚଆଇଭି ଇଂଜେକ୍ସନ ଭାଇରସକୁ ଦମନ କରିବାରେ ସଫଳ ହୋଇଥିଲା । ସେପଟେ ୟୁରେକା ଆଲର୍ଟ ପ୍ରକାଶିତ ଅଧ୍ୟୟନରେ ୟୁନିଭର୍ସିଟି କଲେଜ ଲଣ୍ଡନର ଗବେଷକଙ୍କ ନେତୃତ୍ୱରେ ଏକ ଟିମ୍ ଏହା ଉପରେ ଅଧ୍ୟୟନ କରିଛି । ସେଥିରୁ ଜଣାପଡୁଛି ଯେ, ଏଚଆଇଭି ସଂକ୍ରମିତ ଯୁବକମାନେ ପ୍ରତିଦିନ ଆଣ୍ଟିରେଟ୍ରୋଭାଇରାଲ ଟାବଲେଟ୍ ଅପେକ୍ଷା ପ୍ରତି ୮ ସପ୍ତାହରେ ଇଂଜେକ୍ସନ ନେଇ ଚିକିତ୍ସାକୁ ଭଲରେ ପରିଚାଳନା କରିପାରିବେ । ସେପଟେ ଲାଟା ପରୀକ୍ଷଣରେ କେନିଆ, ଦକ୍ଷିଣଆଫ୍ରିକା, ଉଗାଣ୍ଡା ଓ ଜିମ୍ବାବେର ୫ଟି କ୍ଲିନିକରୁ ୧୨ରୁ ୧୯ ବର୍ଷୀୟ ବୟସ୍କ ୪୭୬ଜଣ ଯୁବକ-ଯୁବତୀଙ୍କୁ ଦୁଇଟି ଗୋଷ୍ଠୀରେ ବିଭକ୍ତ କରାଯାଇଥିଲା । ଗୋଟିଏ ଗୋଷ୍ଠୀ ବଟିକା ନେଉଥିବା ବେଳେ ଅନ୍ୟ ଗୋଷ୍ଠୀଙ୍କୁ “କ୍ୟାବୋଟେଗ୍ରାଭିର୍ ” ଓ “ ରିଲପିଭିରିନ୍ ” ନାମକ ଦୁଇଟି ଇଂଜେକ୍ସନ ଦିଆଯାଉଥିଲା । ପ୍ରାୟ ବର୍ଷେ ଧରି ବଟିକା ମାଧ୍ୟମରେ ଚିକିତ୍ସିତ ହୋଇ ଭାଇରସ୍ ପୁରା ନିୟନ୍ତ୍ରଣରେ ଥିଲା । ସେପଟେ ଇଂଜେକ୍ସନ ନେଇଥିବା ଗୋଷ୍ଠୀ ବଟିକା ଅପେକ୍ଷା ପ୍ରତି ୮ ସପ୍ତାହରେ ଇଂଜେକ୍ସନ ଚିକିତ୍ସା ନେବା ବହୁତ ସହଜ ଥିଲା ବୋଲି କହିଥିଲେ । ତେବେ ସାଧାରଣ ବଟିକା ତୁଳନାରେ ଏହି ବଟିକା ଅଧିକ ମୂଲ୍ୟ ବହନ କରେ । ବଟିକା ଅପେକ୍ଷା ଇକେକ୍ସନ ବି ଆହୁରି ମହଙ୍ଗା । କାରଣ ହେଉଛି ଏହାର ଉତ୍ପାଦନ, ସଂରକ୍ଷଣ ଏବଂ ଯୋଗାଣ । ବଟିକା ଚିକିତ୍ସା ନେଉଥିବା ବ୍ୟକ୍ତି ୩କିମ୍ବା ୬ ମାସରେ ବଟିକା ନିଅନ୍ତି । ଇଂଜେକ୍ସନ ନେବାର ବ୍ୟବଧାନ ୮ ମାସ । ହେଲେ ବତ୍ତ ର୍ମାନ ସୁଦ୍ଧା ଇଂଜେକ୍ସନ ନେଇ କୌଣସି ଚୁକ୍ତିନାମା ହୋଇନାହିଁ । ବଟିକା ନେଉଥିବା ସଂକ୍ରମିତ ବ୍ୟକ୍ତି ବଟିକା ଖାଇ ସଂକ୍ରମଣକୁ ନିୟନ୍ତ୍ରଣରେ ରଖିଥିବା ବେଳେ ଇଂଜେକ୍ସନ ବୟସ୍କ ଓ କିଶୋରଙ୍କ ପାଇଁ ଏକ ବିକଳ୍ପ ଭାବେ ସୁପାରିଶ କରୁଛି ବିଶ୍ୱ ସ୍ୱାସ୍ଥ୍ୟ ସଂଗଠନ । ଏହି ଅଧ୍ୟୟନରେ ଲଣ୍ଡନ ସ୍କୁଲ ଅଫ୍ ହାଇଜିନ୍ ଆଣ୍ଡ ଟ୍ରପିକାଲ ମେଡିସିନ୍, ରାଡବଉଡ ୟୁନିଭର୍ସିଟି ମେଡିକାଲ ସେଂଟର ଓ ୟର୍କ ବିଶ୍ୱବିଦ୍ୟାଳୟର ସାମାଜିକ ବିଜ୍ଞାନ , ଔଷଧ ବିଜ୍ଞାନ ଓ ସ୍ୱାସ୍ଥ୍ୟ ଅର୍ଥନୈତିକ ଗବେଷକମାନେ ସାମିଲ ଥିଲେ ।
