ବେଙ୍ଗାଲୁରୁ: କର୍ଣ୍ଣାଟକର ଚିକ୍କାବଲ୍ଲାପୁରରୁ ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି। କଂଗ୍ରେସ ବିଧାୟକ ପ୍ରଦୀପ ଈଶ୍ୱରଙ୍କ ଉପରକୁ ଜୋତା ଫିଙ୍ଗାଯାଇଥିବାର ଦୃଶ୍ୟ ଏବବେ ସୋସିଆଲ ମିଡିଆରେ ଭାଇରାଲ ହେଉଛି । ବିଧାୟକ ତାଙ୍କ ଗାଡ଼ିରେ ରାସ୍ତାରେ ଯାଉଥିବା ସମୟରେ ଏବଂ ତାଙ୍କ ସମର୍ଥକଙ୍କ ଭିଡ଼ ଘେରି ରହିଥିବା ସମୟରେ ଏହି ଘଟଣା ଘଟିଥିଲା।
ଭାଇରାଲ ଭିଡିଓରେ ଦେଖିବାକୁ ମିଳୁଛି ଯେ, ବିଧାୟକ ତାଙ୍କ ଗାଡିର ରୁଫ ଟପ୍ ପଟେ ବାହାରି ସମର୍ଥକଙ୍କ ସହ ରାଲି କରିଲା ଭଳି ଯାଉଥିବା ବେଳେ ପଛ ପଟୁ ଦୁଇ ଜଣ ବ୍ୟକ୍ତି କଂଗ୍ରେସ ବିଧାୟକଙ୍କ ଉପରେ ଜୋତା ଫିଙ୍ଗୁଥିବାର ନଜର ଆସିଥିଲେ । ଉଭୟ ବ୍ୟକ୍ତି ବିଧାୟକଙ୍କୁ ଲକ୍ଷ୍ୟ କରି ଜୋତା ଫିଙ୍ଗିଥିଲେ । ଆଉ ସଙ୍ଗେ ସଙ୍ଗେ ବିଧାୟକ କାର୍ ଭିତରେ ବସିଯାଇଥିଲେ । ଏହା ପରେ ସେଠାରେ ଉପସ୍ଥିତ ପୋଲିସ୍ ତୁରନ୍ତ ଯାଇ ଦୁଇ ବ୍ୟକ୍ତିଙ୍କୁ କାବୁ କରିଥିଲେ ।
ତଥାପି ବ୍ୟକ୍ତିମାନେ କିଏ ଥିଲେ ଏବଂ କାହିଁକି ବିଧାୟକଙ୍କ ଉପରକୁ ଚପଲ ମାଡ କରିଥିଲେ ତାହାର ଜଣାପଡିନାହିଁ । ତଦନ୍ତ ପରେ ଏହା ପ୍ରକାଶ ପାଇବ। ଏହି ଘଟଣାରେ କ୍ରୋଧିତ ହୋଇ ପ୍ରଦୀପ ଈଶ୍ୱରଙ୍କ ସମର୍ଥକମାନେ ହଙ୍ଗାମା କରିଥିଲେ ଏବଂ ଚିକବଲ୍ଲାପୁର ଜିଲ୍ଲା ମାଜିଷ୍ଟ୍ରେଟଙ୍କ ବାସଭବନ ସମ୍ମୁଖରେ ଧାରଣା ଦେଇଥିଲେ।
ପ୍ରଦୀପ ଈଶ୍ୱରଙ୍କ ସମର୍ଥକ ଏବଂ କଂଗ୍ରେସ ନେତାମାନେ ଏହି ଘଟଣାକୁ ନେଇ ତୀବ୍ର ପ୍ରତିବାଦ କରିଥିଲେ, ବିଧାୟକଙ୍କୁ ଅପମାନିତ କରିଥିବା ଏବଂ ଜୋତା ଫିଙ୍ଗିଥିବା ଲୋକଙ୍କୁ ଗିରଫ କରିବା ଦାବି କରିଥିଲେ। କର୍ମୀମାନେ ଚିକବଲ୍ଲାପୁର ଏସପି କୁଶଲ ଚୌକସେଙ୍କୁ ଏହି ମାମଲା ସହିତ ଜଡିତ ଏକ ଆବେଦନପତ୍ର ପ୍ରଦାନ କରିଥିଲେ।
ତେବେ ଏହା ପ୍ରଥମ ନୁହେଁ, ଦେଶରେ ଅନେକ ଥର ପ୍ରମୁଖ ନେତାଙ୍କ ଉପରେ ଆକ୍ରମଣ ହୋଇଛି। କିଛି ଆକ୍ରମଣ ସେମାନଙ୍କୁ ଅପମାନିତ କରିବା ଉଦ୍ଦେଶ୍ୟରେ କରାଯାଇଥିଲା, ଅନ୍ୟଗୁଡ଼ିକ ଆକ୍ରମଣ ପାଇଁ ଲକ୍ଷ୍ୟ ରଖାଯାଇଥିଲା। ୨୦୧୬ରେ, ଉତ୍ତର ପ୍ରଦେଶର ସୀତାପୁରରେ ଏକ ରୋଡ୍ ଶୋ ସମୟରେ ରାହୁଲ ଗାନ୍ଧୀଙ୍କ ଉପରେ ଜୋତା ଫିଙ୍ଗାଯାଇଥିଲା। ଯଦିଓ ଜୋତା ତାଙ୍କୁ ଆଘାତ କରିନଥିଲା, ତାଙ୍କ ପାଖରେ ଠିଆ ହୋଇଥିବା ଜଣେ ବ୍ୟକ୍ତି ଆଘାତ ପାଇଥିଲେ।
ଜମ୍ମୁ ଏବଂ କାଶ୍ମୀରର ତତ୍କାଳୀନ ମୁଖ୍ୟମନ୍ତ୍ରୀ ଓମର ଅବଦୁଲ୍ଲାଙ୍କ ଉପରେ ମଧ୍ୟ ୨୦୧୦ରେ ଆକ୍ରମଣ ହୋଇଥିଲା। ଏହି ଘଟଣା ଜଣେ ପୋଲିସ ଦ୍ୱାରା କରାଯାଇଥିଲା।
ଅହମ୍ମଦାବାଦରେ ଏକ ନିର୍ବାଚନ ରାଲି ସମୟରେ ମନମୋହନ ସିଂହ (ତତ୍କାଳୀନ ପ୍ରଧାନମନ୍ତ୍ରୀ)ଙ୍କୁ ଜୋତା ମାଡ଼ ହୋଇଥିଲା।
ଆମ ଆଦମୀ ପାର୍ଟି ନେତା ଅରବିନ୍ଦ କେଜ୍ରିୱାଲଙ୍କୁ ମଧ୍ୟ ଅପମାନିତ କରିବା ଉଦ୍ଦେଶ୍ୟରେ ଅନେକ ଥର ଆକ୍ରମଣ କରାଯାଇଛି। ଏପ୍ରିଲ ୨୦୧୬ ରେ, ଦିଲ୍ଲୀ ସଚିବାଳୟରେ ଅଡ୍-ଇଭେନ୍ ଫର୍ମୁଲା ଉପରେ ଏକ ସାମ୍ବାଦିକ ସମ୍ମିଳନୀ ସମୟରେ ଜଣେ ବ୍ୟକ୍ତି (ଜଣେ ଆପ ସଦସ୍ୟ) ଜୋତା ଫିଙ୍ଗିଥିଲେ। ଜାନୁଆରୀ ୨୦୧୭ ରେ, ହରିୟାଣାର ରୋହତକରେ ଏକ ରାଲି ସମୟରେ ଜଣେ ଯୁବକ ତାଙ୍କ ଉପରକୁ ଜୋତା ଫିଙ୍ଗିଥିଲେ ଏବଂ ୨୦୧୧ ରେ, ଲକ୍ଷ୍ନୌରେ ଏକ କାର୍ଯ୍ୟକ୍ରମ ସମୟରେ ତାଙ୍କ ଉପରକୁ ଚପଲ ଫିଙ୍ଗିଥିଲେ। ସେହି ସମୟରେ, ସେ ଜଣେ ସାମାଜିକ କର୍ମୀ ଥିଲେ।
ଏହି ଘଟଣାଗୁଡ଼ିକ ଏହା ମଧ୍ୟ ପ୍ରକାଶ କରିଛି ଯେ ଅନେକ ସମୟରେ ଲୋକମାନେ ନେତାଙ୍କ କାର୍ଯ୍ୟରେ ଅସନ୍ତୁଷ୍ଟ ହୋଇ, କିମ୍ବା ରାଜନୀତିକ ଷଡଯନ୍ତ୍ର ଶିକାର ହୋଇ, ବେଳେ ବେଳେ ନିଜକୁ ହାଇଲାଇଟ୍ କରିବା ପାଇଁ ଏଭଳି ନେତାଙ୍କୁ ଆକ୍ରମଣ କରନ୍ତି ।
