ଭୁବନେଶ୍ୱର: ସୈନିକ ସ୍କୁଲ ଭୁବନେଶ୍ୱରରେ ଅଖିଳ ଭାରତୀୟ ସୈନିକ ସ୍କୁଲ ଆନ୍ତଃଗ୍ରୁପ୍ ହକି ପ୍ରତିଯୋଗିତା–୨୦୨୬ର ଶୁଭାରମ୍ଭ ହୋଇଛି। ଦେଶର ବିଭିନ୍ନ ସୈନିକ ସ୍କୁଲରୁ ଆସିଥିବା ପ୍ରତିଭାଶାଳୀ ଯୁବ ହକି ଖେଳାଳିମାନଙ୍କୁ ଏହି ପ୍ରତିଯୋଗିତା ଏକାଠି କରିଛି।
ଉଦ୍ଘାଟନୀ ସମାରୋହରେ ସିଏସ୍ଆଇଆର୍–ଆଇଏମ୍ଏମ୍ଟି, ଭୁବନେଶ୍ୱରର ନିର୍ଦ୍ଦେଶକ ଡଃ ରାମାନୁଜ ନାରାୟଣ ମୁଖ୍ୟ ଅତିଥି ଭାବେ ଯୋଗଦେଇ ପ୍ରତିଯୋଗିତାର ଶୁଭ ଉଦ୍ଘାଟନ କରିଥିଲେ। ସେ ସମସ୍ତ ଅଂଶଗ୍ରହଣକାରୀ ଦଳକୁ କ୍ରୀଡ଼ା ମନୋଭାବ, ଶୃଙ୍ଖଳା ଓ ଉତ୍କର୍ଷ ପ୍ରଦର୍ଶନ ପାଇଁ ଶୁଭେଚ୍ଛା ଜଣାଇଥିଲେ।
ଦେଶର ବିଭିନ୍ନ ଅଞ୍ଚଳର ୮ଟି ଗ୍ରୁପ୍ରୁ ମୋଟ ୨୪ଟି ସୈନିକ ସ୍କୁଲ ଏହି ଜାତୀୟ ସ୍ତରର ପ୍ରତିଯୋଗିତାରେ ଅଂଶଗ୍ରହଣ କରୁଛନ୍ତି। ପ୍ରତିଯୋଗିତାଟି ତିନୋଟି ବର୍ଗରେ ଆୟୋଜିତ ହେଉଛି—ଅଣ୍ଡର–୧୭ ବାଳିକା, ଅଣ୍ଡର–୧୭ ବାଳକ ଏବଂ ଅଣ୍ଡର–୧୫ ବାଳକ। ଆନ୍ତଃଗ୍ରୁପ୍ ହକି ପ୍ରତିଯୋଗିତାରେ ଯୋଗ୍ୟତା ହାସଲ କରିବା ପରେ ଏହି ଦଳଗୁଡ଼ିକ ଜାତୀୟ ପ୍ରତିଯୋଗିତାରେ ସ୍ଥାନ ପାଇଛନ୍ତି।
ପ୍ରତିଯୋଗିତାର ପ୍ରଥମ ମ୍ୟାଚ୍ ଅଣ୍ଡର–୧୫ ବାଳକ ବର୍ଗରେ ସୈନିକ ସ୍କୁଲ କାଝାକୁଟ୍ଟମ ଓ ସୈନିକ ସ୍କୁଲ ପୁରୁଲିଆ ମଧ୍ୟରେ ଅନୁଷ୍ଠିତ ହୋଇଥିଲା। ଏହି ମ୍ୟାଚ୍ରେ ସୈନିକ ସ୍କୁଲ ପୁରୁଲିଆ ବିଜୟୀ ହୋଇ ପ୍ରତିଯୋଗିତାର ରୋମାଞ୍ଚକର ଆରମ୍ଭ କରିଥିଲା।
ଏହି ଆୟୋଜନ ସୈନିକ ସ୍କୁଲମାନଙ୍କର ଶାରୀରିକ ସୁସ୍ଥତା, ଦଳଗତ ଭାବନା, ଶୃଙ୍ଖଳା ଏବଂ ସୁସ୍ଥ ପ୍ରତିଯୋଗିତାର ମନୋଭାବକୁ ପ୍ରୋତ୍ସାହିତ କରିବା ପ୍ରତି ଥିବା ଦୃଢ଼ ପ୍ରତିବଦ୍ଧତାର ପ୍ରତିଫଳନ। ସୈନିକ ସ୍କୁଲ ଭୁବନେଶ୍ୱରର ପ୍ରଧାନାଚାର୍ଯ୍ୟ କର୍ଣ୍ଣେଲ ପଙ୍କଜ କୁମାର ଏହି ସମ୍ମାନଜନକ ଜାତୀୟ କ୍ରୀଡ଼ା ଆୟୋଜନର ଆୟୋଜକ ହୋଇପାରିଥିବାରେ ଗର୍ବ ପ୍ରକାଶ କରି ସମସ୍ତ ଅଂଶଗ୍ରହଣକାରୀ ଦଳ, ଅଧିକାରୀ ଓ ଅତିଥିମାନଙ୍କୁ ସ୍ୱାଗତ ଜଣାଇଥିଲେ।