ଓ୍ବାଶିଂଟନ: ବଡ ଅଡୁଆରେ ଆମେରିକାର ରାଷ୍ଟ୍ରପତି ଜୋ ବାଇଡେନ। ତାଙ୍କ ଡେଲାୱେରର ୱିଲମିଙ୍ଗଟନରେ ଥିବା ଘରୁ ପୂର୍ବରୁ ସାର୍ବଜନୀନ ହୋଇଥିବା ଡକ୍ୟୁମେଣ୍ଟ ତୁଳନାରେ ଅଧିକ ଡକ୍ୟୁମେଣ୍ଟ ମିଳିଛି। ଏହି ସବୁ ସରକାରୀ ଡକ୍ୟୁମେଣ୍ଟ ବାଇଡେନଙ୍କ ଘରୁ ମିଳିବା ପରେ ଅଡୁଆରେ ପଡିଛନ୍ତି ଆମେରିକାର ପ୍ରଥମ ନାଗରିକ।
ତେବେ ମେକ୍ସିକୋ ଗସ୍ତରେ ଥିବା ବାଇଡେନ କହିଛନ୍ତି, ଏ ବାବଦରେ ତାଙ୍କୁ ଜଣାନାହିଁ। ଏହି ସୂଚନା ପାଇବା ପରେ ତାଙ୍କ ଅଫିସ ସମସ୍ତ ପ୍ରକାର ସହଯୋଗ କରିବ ବୋଲି କହିଛନ୍ତି। ହେଲେ ମିଳିଥିବା ସରକାରୀ ଦସ୍ତାବିଜରେ କଣ ରହିଛି ସେ ଜାଣିନଥିବା କହିଛନ୍ତି। ସରକାରୀ ଦସ୍ତାବିଜ ଆମେରିକା ରାଷ୍ଚ୍ରପତିଙ୍କ ବ୍ୟକ୍ତିଗତ ଘରେ ମିଳିଥିବାରୁ ଏହାକୁ ନେଇ ସରଗରମ ହୋଇଛି ଆମେରିକା ରାଜନୀତି।
ଶନିବାର ହ୍ୱାଇଟ୍ ହାଉସର ପରାମର୍ଶଦାତା ରିଚାର୍ଡ ସାବେର ସୂଚନା ଦେଇ କହିଛନ୍ତି, ବାଇଡେନଙ୍କ ବ୍ୟକ୍ତିଗତ ଲାଇବ୍ରେରୀରେ ଖୋଜାଖୋଜି ବେଳେ ମୋଟ ୬ଟି ପୃଷ୍ଠାର ବର୍ଗୀକୃତ ଡକ୍ୟୁମେଣ୍ଟ ପାଇଛନ୍ତି। ହ୍ୱାଇଟ୍ ହାଉସ ପୂର୍ବରୁ କହିଥିଲା ଯେ ସେଠାରୁ କେବଳ ଗୋଟିଏ ବର୍ଗୀକୃତ ପୃଷ୍ଠା ଉଦ୍ଧାର ହୋଇଛି।
ଏହା ବ୍ୟତୀତ ଡିସେମ୍ବରରେ ବାଇଡେନଙ୍କ ଗ୍ୟାରେଜରୁ ଏବଂ ନଭେମ୍ବରରେ ୱାଶିଂଟନରେ ଥିବା ତାଙ୍କ ପୂର୍ବତନ କାର୍ଯ୍ୟାଳୟ ‘ପେନ୍ ବାଇଡେନ ସେଣ୍ଟର’ରୁ କିଛି ଡକ୍ୟୁମେଣ୍ଟ ମଧ୍ୟ ମିଳିଥିଲା, ଯାହା ତାଙ୍କ ଉପରାଷ୍ଟ୍ରପତି କାର୍ଯ୍ୟକାଳ ମଧ୍ୟରେ ଥିଲା। ହ୍ୱାଇଟ୍ ହାଉସର ପରାମର୍ଶଦାତା ରିଚାର୍ଡ ସୋବର ଶନିବାର ଏକ ବିବୃତ୍ତିରେ କହିଛନ୍ତି ଯେ ସୁରକ୍ଷା କ୍ଲିୟରାନ୍ସ ଅଭାବରୁ ବାଇଡେନଙ୍କ ବ୍ୟକ୍ତିଗତ ଓକିଲମାନେ ବୁଧବାର ସନ୍ଧ୍ୟାରେ ଏକ ପୃଷ୍ଠା ପାଇବା ପରେ ଖୋଜିବା ବନ୍ଦ କରିଦେଇଛନ୍ତି।
ଗୁରୁବାର ଦିନ ନ୍ୟାୟ ବିଭାଗର ଅଧିକାରୀଙ୍କ ସହ ରିଚାର୍ଡ ସାବର୍ ବାକି ସାମଗ୍ରୀ ଗ୍ରହଣ କରିଥିଲେ। ସେ କହିଛନ୍ତି ଯେ ତାଙ୍କ ସହ ଥିବା ବିଭାଗୀୟ ଅଧିକାରୀମାନେ ତୁରନ୍ତ ଏହି ଦଲିଲଗୁଡ଼ିକୁ ଜବତ କରିଛନ୍ତି।
ବାଇଡେନଙ୍କ ସହାୟକମାନେ ପାଇଥିବା ଗୋପନୀୟ ଡକ୍ୟୁମେଣ୍ଟଗୁଡିକ ବୋଧହୁଏ ୨୦୦୯ ରୁ ୨୦୧୬ ପର୍ଯ୍ୟନ୍ତ ତାଙ୍କ ଉପରାଷ୍ଟ୍ରପତି ସମୟର।
ହ୍ୱାଇଟ ହାଉସର ପ୍ରେସ ସଚିବ କହିଛନ୍ତି ଯେ ଡକ୍ୟୁମେଣ୍ଟରେ କଣ ଅଛି ରାଷ୍ଟ୍ରପତି ଜାଣି ନାହାଁନ୍ତି। ଏହି ଡକ୍ୟୁମେଣ୍ଟଗୁଡିକ ଏଠାରେ ଗ୍ରହଣ କରାଯିବା ପରେ ତୁରନ୍ତ ଆଇନ ବିଭାଗର ଅଭିଲେଖାଗାରକୁ ପଠାଯାଇଥିଲା। ଓବାମା ପ୍ରଶାସନର ସମୟରୁ ବିଶ୍ୱାସ କରାଯାଉଥିବା ଏହି ଗୋପନୀୟ ଡକ୍ୟୁମେଣ୍ଟଗୁଡିକ ବାଇଡେନଙ୍କୁ ନେଇ ରାଜନୈତିକ ଝଡ଼ ସୃଷ୍ଟି କରିଛି।
