ମା’ ଉଠିଯା..ଏମିତି ରାସ୍ତା ଉପରେ କାହିିଁକି ଶୋଇଛୁ ? ଆଉ କେତେ ସମୟ ଶୋଇବୁ ମା’ ? ଉଠ ମା’… ତୁ ନ ଉଠିଲେ ମୋତେ କାନ୍ଦ ଲାଗୁଛି..ବୁଝି ନ ହେଲେ ବି ତାର ଭାବଭଙ୍ଗୀ ଠିକ ଏହା ହିଁ କହୁଥିଲା ଅନେକ ଲୋକ ତା ପାଖରେ ଛିଡା ହୋଇ ଦେଖୁଥିଲେ । ସମସ୍ତଙ୍କ ଆଖି ଓଦା ହୋଇ ଯାଉଥିଲା । ହେଲେ ଏ ୨ ମାସର ଏ ନୀରିହ ଶିଶୁକୁ କ’ଣ କହି ବା ପ୍ରବୋଧନ ଦେବେ ? ଏଥିପାଇଁ ଭାଷା କାହିଁ ?
ସୋସିଆଲ ମିଡିଆରେ ଏମିତି ଏକ ଭାଇରାଲ ଭିଡିଓ ସମସ୍ତଙ୍କ ମନକୁ ଭିଜେଇ ଦେଇଥିଲା । କୁହାଯାଉଛି ଭିଡିଓଟି ଆସାମର । ଭିିଡିଓରେ ଦୁଇ ମାସର ସୁନହର ମାଙ୍କଡ ଛୁଆଟିଏ ମା’ ପାଖରେ ବସିଛି । ମା’ଟି ଶୋଇପଡିଛି ରାସ୍ତା ଉପରେ । ଛୋଟ ଛୁଆଟି ମା’କୁ ତାର ଉଠାଇବାକୁ ଚେଷ୍ଟା କରୁଛି । ହେଲେ ସେ ଜାଣିନି ତା ମା’ ଆଉ କେବେ ଉଠିବନି ବୋଲି । ତା ଚାରିପାଖରେ ଲୋକ ରୁଣ୍ଡ ହୋଇଗଲେଣି । ହେଲେ ତାର ସେଥିକି ଖାତିର ନାହିଁ । କାରଣ ସେ ବୋଧହୁଏ ଭାବି ନେଇଛି, ତା ପାଖେ ତ ମା’ ତାର ଶୋଇଛି । ଏମାନେ ମୋର କ’ଣ କରିବେ ? ଲୋକଙ୍କ ମୁହଁକୁ ଚାହିଁ ଦେଇ କୁନି ମାଙ୍କଡଟି ଟିକିଏ ଦାନ୍ତ ଦେଖାଇ ଦେଉଛି । ପୁଣି ମା’ କୋଳରେ ନିଜ ମୁହଁ ଲୁଚାଇ ଦେଉଛି । ବିକଳ ଭାଷାରେ ମା’କୁ ତାର କିଛି କହୁଛି ।
ମା’ ମାଙ୍କଡଟି ଏକ ଗାଡି ଧକ୍କାରେ ରାସ୍ତା ଉପରେ ପଡି ଯାଇଛି । ସେ ସବୁଦିନ ପାଇଁ ସେଠାରେ ଶୋଇ ଯାଇଛି । ହେଲେ କୁନି ଛୁଆଟି ସେକଥା ଜାଣେନି । ମା’-ଛୁଆର ସମ୍ପର୍କ ସବୁବେଳେ ଏମିତି । ସେ ମଣିଷ ହେଉ ବା ହେଉ ପଶୁ । ମା’ ଛୁଆ ପାଇଁ ଗୋଟେ ବଳ, ଗୋଟେ ଆଶ୍:ାସନା । ମା’ ନ ଥିବା କଥା କେବେ ଭାବି ହୁଏନି । କୁନି ମାଙ୍କଡ ଛୁଆଟି ବି ଠିକ ସେମିତି ଭାବୁଛି । ମୃତ ମା’କୁ ସେ ଛାଡିବାକୁ ନାରାଜ । ମା’ ତାର ମରିଯାଇଛି ବୋଲି ଗ୍ରହଣ କରିବାକୁ ବି ସେ ଅମଙ୍ଗ । ସେ କାନ୍ଦୁଛି..ଆଉ ମା’କୁ ତାର ଉଠାଇବାକୁ ଚେଷ୍ଟା କରୁଛି ।
ଏଇ ସୁନହର ପ୍ରଜାତି ମାଙ୍କଡ ଏବେ ଲୁପ୍ତପ୍ରାୟ । ପଶ୍ଚିମ ଆସାମର ଏକ ଛୋଟ କ୍ଷେତ ଏବଂ ପଡୋଶୀ ଭୁଟାନର ସୀମାନ୍ତରେ ଏହି ମାଙ୍କଡଙ୍କୁ ଦେଖିବାକୁ ମିଳିଥାନ୍ତି । ଏଦୁଇ ମାଙ୍କଡ ଶୁକ୍ରବାର ଖାଦ୍ୟ ସନ୍ଧାନରେ ଗଛରୁ ଓହ୍ଲାଇ ଆସୁଥିଲେ । ସେତିକିବେଳେ ଦ୍ରୁତ ଗତରେ ଆସୁଥିବା ଏକ ଗାଡି ମା’ ମାଙ୍କଡକୁ ଧକ୍କା ଦେଇ ପଳାଇ ଯାଇଥିଲା । ରାସ୍ତା ଉପରେ ପ୍ରାୟ ଏକ ଘଣ୍ଟା ଧରି ଏହି ଦୃଶ୍ୟ ଦେଖିବାକୁ ମିଳିଥିଲା । ପରେ ସ୍ଥାନୀୟ ଲୋକେ ସେମାନଙ୍କୁ ସେଠାରୁ ହଟାଇ ଦେଇଥିଲେ ।
This will hunt me for a long long time💔💔
A Golden langur assassinated on the road in Assam. The baby still in its arm not knowing what has befallen him.I am informed that all steps are being taken to save the baby. pic.twitter.com/iMOcEHquZw
— Susanta Nanda (@susantananda3) February 24, 2023