ଭୁବନେଶ୍ୱର: ଆଗାମୀ ସାଧାରଣ ନିର୍ବାଚନ ସମୟରେ ଡିପଫେକ୍ ଭିଡିଓକୁ ନେଇ ଚିନ୍ତା ବଢ଼ୁଥିବା ବେଳେ ଏହାର ମୁକାବିଲା ପାଇଁ ଭୁବନେଶ୍ୱର-କଟକ କମିସନରେଟ୍ ପୁଲିସ ସକ୍ରିୟ ପଦକ୍ଷେପ ଗ୍ରହଣ କରିଛି। ଏହି ଭିଡିଓର ବିପଦର ମୁକାବିଲା ପାଇଁ ପୋଲିସ ବିଭାଗ ଅଧିକାରୀଙ୍କ ଏକ ସ୍ୱତନ୍ତ୍ର ଟିମ୍କୁ ତାଲିମ ଦେଇଛି।
ଭୁବନେଶ୍ୱର ଡିସିପି ପ୍ରତୀକ ସିଂହ ସାମ୍ବାଦିକମାନଙ୍କ ସହ କଥା ହୋଇ ଡିପଫେକ୍ ଦିଗରେ ହୋଇଥିବା ପ୍ରୟାସ ସମ୍ପର୍କରେ ଆଲୋକପାତ କରିଥିଲେ। ପୁଲିସ ଅଧିକାରୀଙ୍କ ପାଇଁ ଏକ କର୍ମଶାଳାର ଆୟୋଜନ କରିବା ସହ ଏକ ଫ୍ୟାକ୍ଟ ଚେକିଂ ୱେବସାଇଟରୁ ବିଶେଷଜ୍ଞମାନଙ୍କୁ ତାଲିମ ଦେବା ପାଇଁ ନିମନ୍ତ୍ରଣ କରିଥିଲା। ବିଶେଷଜ୍ଞମାନେ ନକଲି ଭିଡିଓଗୁଡିକୁ ଶୀଘ୍ର ଏବଂ ପ୍ରଭାବଶାଳୀ ଭାବରେ ଚିହ୍ନଟ କରିବାରେ ସେମାନଙ୍କର ଅଭିଜ୍ଞତା ବାଣ୍ଟିଥିଲେ।
ରାଜ୍ୟ ହେଉ ଅବା ରାଜ୍ୟ ବାହାରେ ଥିବା ରାଜନୈତିକ ଦଳର ସୋଶିଆଲ ମିଡିଆ ପେଜ କିମ୍ବା ତାଙ୍କ ସମର୍ଥନରେ ତିଆରି ହୋଇଥିବା ସୋଶିଆଲ ମିଡିଆ ପେଜରେ ଅପରପକ୍ଷ ନେତାଙ୍କୁ କଦର୍ଥ କରି ଭିଡିଓ କରି ସମାଲୋଚନା କରାଯାଉଛି। ନିକଟରେ ରାଜ୍ୟ ବିଜେପି ଅଭିଯୋଗ କରିଥିଲା ଯେ ତାଙ୍କ ଦଳର ଆଇଟି ସେଲର ଜଣେ ବ୍ୟକ୍ତିଙ୍କୁ ପୋଲିସ ଗିରଫ କରିଛି। ଶାସକ ଦଳ ପ୍ରଭାବରେ ଏପରି କରାଯାଇଛି। କିନ୍ତୁ ବିଜେପି ନେତାଙ୍କୁ କଟାକ୍ଷ କରାଯାଉଥିବା ବ୍ଯକ୍ତିଙ୍କ ବିରୋଧରେ ପୋଲିସ ସେଭଳି କାର୍ଯ୍ୟାନୁଷ୍ଠାନ ଗ୍ରହଣ କରାଯାଉନି। ଏପରି କହି ବିଜେପି ପୋଲିସର ତଦନ୍ତ ଉପରେ ପ୍ରଶ୍ନ ଉଠାଇଛି।
ଡିପଫେକ ଭିଡିଓ ଏପରି ଯେ ରାତିରାତି ଜଣଙ୍କୁ ବଦନାମ କରିବା ଅତ୍ୟନ୍ତ ସହଜ। ଏପରି ସ୍ଥିତିରେ ପୋଲିସ ଯଦି ପ୍ରଭାବଶାଳୀ ଗୋଷ୍ଠୀର ହାତବାରିସି ହୋଇ କାମ କରିବ ତାହେଲେ ସେହି ଗୋଷ୍ଠୀ ଡିପଫେକ ଭିଡିଓକୁ ନିଜର ଅସ୍ତ୍ର କରିଦେବ। ତେଣୁ ପୋଲିସ ମିଡିଆ ଆଗରେ ଆସି ଡିପଫେକ ଭିଡିଓ ବାବଦରେ ଚିନ୍ତାପ୍ରକଟ କରିଛି କିନ୍ତୁ ଅସଲରେ ପୋଲିସ କିଭଳି ଏହାକୁ ନେଇ ଆଗକୁ ବଢୁଛି ତାହା ଏବେ ଅପେକ୍ଷା କରିବାକୁ ବାକି ରହିଲା।
କ’ଣ କହୁଛନ୍ତି ସାଇବର ଏକ୍ସପୋର୍ଟ?
ବିଶେଷ କରି ନିର୍ବାଚନରେ ଡିପଫେକ୍ ଜ୍ଞାନକୌଶଳର ଅପବ୍ୟବହାରକୁ ସ୍ୱୀକାର କରି ସାଇବର ବିଶେଷଜ୍ଞ ପ୍ରଶାନ୍ତ ସାହୁ ଏହି ପଦକ୍ଷେପକୁ ସ୍ୱାଗତ କରିଛନ୍ତି। ଲୋକମାନେ ଅସଲି ଏବଂ ମନଗଢ଼ା ଭିଡିଓ ମଧ୍ୟରେ ପାର୍ଥକ୍ୟ କରିବାରେ ସକ୍ଷମ ହେବା ଉପରେ ସେ ଗୁରୁତ୍ୱାରୋପ କରିଛନ୍ତି ।
ଡିପଫେକ୍ ଜ୍ଞାନକୌଶଳ ପ୍ରଥମେ ସିନେମାରେ ବ୍ୟବହାର ପାଇଁ ବିକଶିତ କରାଯାଇଥିଲା, କିନ୍ତୁ ଏହାକୁ ମନ୍ଦ ଉଦ୍ଦେଶ୍ୟରେ ଅଧିକ ମାତ୍ରାରେ ବ୍ୟବହାର କରାଯାଉଛି । ବିଭ୍ରାନ୍ତିକର ଚେହେରା ଏବଂ ସ୍ୱର ସହିତ ଡିପଫେକ ଭିଡିଓ ତିଆରି କରିବାର କ୍ଷମତା ନିର୍ବାଚନ ଉପରେ ଏହାର ସମ୍ଭାବ୍ୟ ପ୍ରଭାବକୁ ନେଇ ଚିନ୍ତା ବଢାଇଛି।
ପ୍ରଧାନମନ୍ତ୍ରୀ ଚିନ୍ତାବ୍ୟକ୍ତ କରିସାରିଛନ୍ତି
ନିକଟରେ ମଧ୍ୟପ୍ରଦେଶ ନିର୍ବାଚନ ସମୟରେ ଅମିତାଭ ବଚ୍ଚନଙ୍କ ଚେହେରା ଥିବା ଏକ ଡିପଫେକ୍ ଭିଡିଓକୁ ଉଲ୍ଲେଖ କରି ସାଇବର ଏକ୍ସପର୍ଟ ଏହି ନକଲି ଭିଡିଓଗୁଡ଼ିକର ଅତ୍ୟାଧୁନିକତା ଉପରେ ନିଜର ଅଭିଜ୍ଞତା ବାଣ୍ଟିଛନ୍ତି। ସେ ଅଭିନେତ୍ରୀ କାଜୋଲ, ରଶ୍ମିକା ମନ୍ଦାନା ଏବଂ କ୍ୟାଟ୍ରିନା କୈଫଙ୍କ ସହ ଜଡିତ ଏହିପରି ମର୍ଫି ଭିଡିଓ ବିଷୟରେ ମଧ୍ୟ ଉଲ୍ଲେଖ କରିଥିଲେ, ଯାହା ସୋସିଆଲ ମିଡିଆରେ ଭାଇରାଲ ହୋଇଥିଲା।
ଡିପଫେକ୍ ଭିଡିଓ ତିଆରି କରିବାରେ ଆର୍ଟିଫିସିଆଲ ଇଣ୍ଟେଲିଜେନ୍ସର ଅପବ୍ୟବହାରକୁ ନେଇ ମଧ୍ୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଲୋଚନା କରିଛନ୍ତି । ଏହିପରି ଭିଡିଓର ବିପଦ ବିଷୟରେ ଜନସାଧାରଣଙ୍କୁ ସଚେତନ କରିବା ଏବଂ ସେମାନଙ୍କୁ ଚିହ୍ନଟ କରିବାରେ ସତର୍କ ରହିବାର ଆବଶ୍ୟକତା ବିଷୟରେ ସେ ଗଣମାଧ୍ୟମକୁ ଅନୁରୋଧ କରିଛନ୍ତି।