ଭୁବନେଶ୍ୱର: ମହାନ ବ୍ୟାଟ୍ସମ୍ୟାନ ରାହୁଲ ଦ୍ରାବିଡଙ୍କୁ ଭାରତୀୟ ସିନିୟର ପୁରୁଷ କ୍ରିକେଟ ଟିମର କୋଚ ଭାବେ ନିଯୁକ୍ତ କରାଯାଇଛି । ଏଥିସହ ବିଭିନ୍ନ କଳ୍ପନା ଜଳ୍ପନାର ଏକପ୍ରକାର ଅବସାନ ଘଟିଛି । ବିସିସିଆଇ ପକ୍ଷରୁ ଏ ନେଇ ବିଧିବଦ୍ଧ ଭାବେ ପ୍ରେସ ରିଲିଜ ଜାରୀ କରାଯାଇଛି । ନଭେମ୍ବର ୧୭ରୁ ଆରମ୍ଭ ହେବାକୁ ଯାଉଥିବା ନ୍ୟୁଜିଲାଣ୍ଡ ବିପକ୍ଷ ସିରିଜରୁ ସେ ବର୍ତମାନର କୋଚ ରବି ଶାସ୍ତ୍ରୀଙ୍କ ବଦଳରେ ଏହି ଦାୟିତ୍ୱ ତୁଲାଇବେ । ଭାରତୀୟ କ୍ରିକେଟ ଦଳର କୋଚ ହେବା ନିଶ୍ଚିତ ଭାବେ ମୋ ପାଇଁ ଗର୍ବର ବିଷୟ ବୋଲି ଦି ୱାଲ ଭାବେ ପରିଚିତ ଦ୍ରାବିଡ କହିଛନ୍ତି । ଶାସ୍ତ୍ରୀଙ୍କ ପ୍ରଶିକ୍ଷଣରେ ଦଳ ଚମତ୍କାର ପ୍ରଦର୍ଶନ କରି ଆସିଛି । ଆଗକୁ ଏହି ଧାରା ବଜାୟ ରଖିବା ପାଇଁ ଉଦ୍ୟମ କରିବି । ଏନସିଏ, ୧୯ ବର୍ଷରୁ କମ୍ ଏବଂ ଭାରତ ଏ ଦଳରେ ଅନେକ ଯୁବ ଖେଳାଳିଙ୍କ ସହ ପୂର୍ବରୁ କାମ କରିଥିବାରୁ ଏହା ମୋତେ ନିଶ୍ଚିତ ଭାବେ ଆଗକୁ ସହାୟ ହେବ ବୋଲି ସେ କହିଛନ୍ତି ।
ନ୍ୟୁଜିଲାଣ୍ଡ ଗସ୍ତରେ ଭାରତ ୩ଟି ଟି୨୦ ଯଥାକ୍ରମେ ନଭେମ୍ବର ୧୭, ୧୯ ଓ ୨୧ରେ ଖେଳିବ । ଏହା ପରେ ନଭେମ୍ବର ୨୫ରୁ ୨୯ ପ୍ରଥମ ଟେଷ୍ଟ ଏବଂ ଡିସେମ୍ବର ୩ରୁ ୭ ଦ୍ୱିତୀୟ ଟେଷ୍ଟ ଖେଳିବ । ବିରାଟ କୋହଲିଙ୍କ ସ୍ଥାନରେ ଟି୨୦ରେ ଭାରତର ନେତୃତ୍ୱ କିଏ ନେବ ସେ ନେଇ ବିସିସିଆଇ ଖୁବ୍ ଶୀଘ୍ର ଘୋଷଣା କରିବ । କୋହଲି ପୂର୍ବଭଳି ଦିନିକିଆ ଏବଂ ଟେଷ୍ଟରେ ଅଧିନାୟକ ଦାୟିତ୍ୱ ତୁଲାଇବେ ।
Comments are closed.