ନଟିଂହାମ: ଇଂଲଣ୍ଡ ଓ ୱେଲ୍ସରେ ଚାଲିଥିବା ଆଇସିସି ବିଶ୍ୱକପ କ୍ରିକେଟ ଟୁର୍ଣ୍ଣାମେଣ୍ଟରେ ଆଜି ଏକ ରୋଚକପୂର୍ଣ୍ଣ ମ୍ୟାଚରେ ଭାରତ ଭେଟୁଛି ନ୍ୟୁଜିଲାଣ୍ଡକୁ । କେନ୍ ୱିଲିୟମସନଙ୍କ କିୱିଦଳ ଏବଂ ବିରାଟଙ୍କ ଟିମ୍ ଇଣ୍ଡିଆ ଏପର୍ଯ୍ୟନ୍ତ ଖେଳିଥିବା ସମସ୍ତ ମ୍ୟାଚରେ ବିଜୟ ହାସଲ କରି ଅପରାଜେୟର ରେକର୍ଡ଼ ଜାରି ରଖିଛନ୍ତି ।
ନ୍ୟୁଜିଲାଣ୍ଡ ୩ଟି ମ୍ୟାଚ ଖେଳି ୩ଟିରେ ବିଜୟ ହାସଲ କରି ପଏଣ୍ଟ ତାଲିକା ଶୀର୍ଷରେ ରହିଛି । ମାତ୍ର ଏଯାଏଁ କିୱି ଦଳ ସେପରି ଶକ୍ତିଶାଳୀ ଦଳକୁ ଭେଟିନାହିଁ । ଅନ୍ୟପକ୍ଷରେ ବିରାଟ କୋହଲୀଙ୍କ ଭାରତୀୟ ଦଳ ଦୁଇଟି ମ୍ୟାଚ ଖେଳି ୨ଟିରେ ବିଜୟ ହାସଲ କରିପାରିଛି । ଭାରତ ଯେଉଁ ଦୁଇଟି ଦଳକୁ ପରାସ୍ତ କରିପାରିଛି ସେହି ୨ଟି ଦଳ ବେଶ୍ ଶକ୍ତିଶାଳୀ ଦଳ । ଗୋଟିଏ ଟିମ୍ ଆରୋନ ଫିଞ୍ଚଙ୍କ ଦୁର୍ଦ୍ଧଶ ଅଷ୍ଟ୍ରେଲିଆ ଦଳ ଏବଂ ଅନ୍ୟଟି ଦକ୍ଷିଣ ଆଫ୍ରିକା ଦଳ ।
ତେବେ ଧୁଆଁଧାର ଓପନର୍ ଶିଖର ଧାୱନ ଆହତ ଜନିିତ କାରଣରୁ ମ୍ୟାଚ ଖେଳିପାରିବେ ନାହିଁ, ଏହା ହିଁ ଭାରତ ଲାଗି ସବୁଠାରୁ ଚିନ୍ତାର ବିଷୟ ଏବେ ପାଲଟିଛି । ଚଳିତ ବିଶ୍ୱକପରେ ଅଷ୍ଟ୍ରେଲିଆ ଓ ଇଂଲଣ୍ଡ ମୁଖ୍ୟ ଦାବିଦାର ହୋଇଥିଲେ ମଧ୍ୟ ଦେଖିବାକୁ ଗଲେ ଭାରତ ହିଁ ଏହି ଟୁର୍ଣ୍ଣାମେଣ୍ଟରେ ସବୁଠୁ ଉନ୍ନତ ଓ ସନ୍ତୁଳିତ ଦଳ ଭାବେ କ୍ରିକେଟ ବିଶାରଦମାନେ କହିଛନ୍ତି ।
ଆଜି ନଟିଂହାମଠାରେ ଏହି ମ୍ୟାଚ ଖେଳାଯାଉଛି, କିଛି ମ୍ୟାଚରେ ବର୍ଷା ଦାଉ ସାଧିଥିବାରୁ ମ୍ୟାଚକୁ ସମ୍ପୂର୍ଣ୍ଣ ଧୋଇଦେଇଛି । ତେବେ ଯଦି ପାଗ କୋହଲା ରହେ ତେବେ ସିମରଙ୍କୁ ଏହି ପିଚ୍ ସୁହାଇବ ବୋଲି ଜଣାପଡ଼ିଛି ।
ଭାରତୀୟ ଦଳର ଓପନିଂ ବିଭାଗ ଉପ-କପ୍ତାନ ରୋହିତ ଶର୍ମା ଏବଂ କେ ଏଲ ରାହୁଲ ସମ୍ଭାଳିପାରନ୍ତି । ବିରାଟ କୋହଲୀ ଶିଖର ଧାୱନଙ୍କ ଅନୁପସ୍ଥିତିକୁ ଲକ୍ଷ୍ୟ କରି ଅଭିଜ୍ଞ ଦୀନେଶ କାର୍ତ୍ତିକଙ୍କୁ ଦଳରେ ସ୍ଥାନ ଦେଇପାରନ୍ତି ।