କାମାକ୍ଷାନଗର: ପାରୋଲରେ ଆସିଥିବା ଜଣେ କଏଦୀଙ୍କୁ ସଂଘବଦ୍ଧ ଭାବେ ଗୁଳିକାଣ୍ଡ କରାଯାଇଛି । ଏଭଳି ଲୋମ ଟାଙ୍କୁରା ଗୁଳିକାଣ୍ଡ ଘଟିଛି ଢେଙ୍କାନାଳ ଜିଲ୍ଲା ପରଜଙ୍ଗ ଥାନା ଚାଉଳିଆଝରଣ ଗାଁରେ । ଗୁରୁତର କଏଦୀ ଜଣଙ୍କ ବାମ ପଞ୍ଚାୟତ ବାଉଁଶମୁଣ୍ଡା ଗାଁର ଅର୍ଜୁନ ସୋରେନ । ଅର୍ଜୁନ ଆଜି ଝିଲ୍ଲୀ ଗାଁ ସାପ୍ତାହିକ ହାଟରୁ ସଉଦା ନେଇ ଘରକୁ ଫେରୁଥିଲେ । ଚାଉଳିଆଝରଣ ଗାଁ ନିକଟରେ ୪ ଜଣ ବ୍ୟକ୍ତି ଅର୍ଜୁନଙ୍କୁ ଘେରି ଯାଇ ୩ ରାଉଣ୍ଡ ଗୁଳି କରିଥିଲେ ।
ଅର୍ଜୁନଙ୍କ ପିଠି, ଅଣ୍ଟା ଓ ହାତରେ ଗୁଳି ବାଜିଛି । ଗୁରୁତର ଅବସ୍ଥାରେ ତାଙ୍କୁ ୧୦୮ ଆମ୍ବୁଲାନ୍ସ ଯୋଗେ ପ୍ରଥମେ କାମାକ୍ଷାନଗର ଓ ପରେ ଢେଙ୍କାନାଳ ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତରିତ କରାଯାଇଛି । ପୂର୍ବ ଶତ୍ରୁତାକୁ ନେଇ ଗୁଳମାଡ଼ ହୋଇଥିବା ପୋଲିସର ପ୍ରାଥମିକ ତଦନ୍ତରୁ ଜଣାପଡ଼ିଛି ।
ସୂଚନାଯୋଗ୍ୟ, ୨୦୧୧ ମସିହା ଅଗଷ୍ଟ ମାସ ୧୫ ତାରିଖରେ ପରକୀୟା ପ୍ରୀତିକୁ ନେଇ ଚାଉଳିଆଝରଣ ଗାଁର ଜଣେ ବ୍ୟକ୍ତିଙ୍କୁ ହତ୍ୟା କରି ଜେଲ୍ ଯାଇଥିଲେ ଅର୍ଜୁନ । ପ୍ରାୟ ୧୦ ବର୍ଷ ଜେଲରେ ରହିବା ପରେ ଗତ ବର୍ଷ ଜୁନ୍ ୫ ତାରିଖ ଦିନ ପାରୋଲରେ ଆସିଥିଲେ । ଆଜି ତାଙ୍କୁ ଗୁଳି ମାରିବା ପରେ ଅଭିଯୁକ୍ତମାନେ ଫେରାର୍ ହୋଇ ଯାଇଥିବା ବେଳେ ପୋଲିସ ତଦନ୍ତ ଜାରି ରଖିଛି ।
Comments are closed.