ବର୍ମିଂହାମ: ଚଳିତ ରାଜ୍ୟଗୋଷ୍ଠୀ କ୍ରୀଡାରେ ଭାରତର ମହିଳା ୪ ଗୁଣନ ୧୦୦ ରିଲେ ଟିମ ଆଶାନୁରୂପ ପ୍ରଦର୍ଶନ କରି ପାରି ନାହାନ୍ତି । ଫାଇନାଲରେ ୫ମ ସ୍ଥାନରେ ରହି ସେମାନେ ଅଭିଯାନ ଶେଷ କରିଛନ୍ତି । ଓଡିଶାର ଦୂତି ଚାନ୍ଦ ଓ ଶ୍ରାବଣୀ ନନ୍ଦଙ୍କ ବ୍ୟତୀତ ରିଲେ ଟିମରେ ହିମା ଦାସ ଓ ଜ୍ୟୋତି ରେସରେ ଭାଗ ନେଇଥିଲେ । ଓଭରାଲ ୪୩.୮୧ ସେକେଣ୍ଡ ସମୟ ନେଇ ଭାରତୀୟ ଟିମ ରେସ ସମ୍ପୂର୍ଣ୍ଣ କରିଥିଲେ । ଚଳିତ ସିଜନର ଶ୍ରେଷ୍ଠ ପ୍ରଦର୍ଶନ ୪୩.୫୫ ରହିଥିଲା । ଫାଇନାଲରେ ଏହାଠାରୁ ଖରାପ ପ୍ରଦର୍ଶନ କରିବା ନିଶ୍ଚିତ ଭାବେ କ୍ରୀଡାପ୍ରେମୀଙ୍କ ପାଇଁ ନିରାଶର କ୍ଷଣ ଥିଲା । ଅବଶ୍ୟ ଦୂତି ପ୍ରଥମ ୧୦୦ ମିଟରରେ ଆକର୍ଷଣୀୟ ପ୍ରଦର୍ଶନ କରିଥିଲେ । ତେବେ ନାଇଜେରିଆ ଆଥଲେଟମାନେ ୪୨.୧୦ ସେକେଣ୍ଡ ସମୟ ନେଇ ସ୍ୱର୍ଣ୍ଣ ପଦକ ଉପରେ କବଜା କରିଥିଲେ । ବ୍ରିଟେନ ୪୨.୪୧ ଓ ଜାମାଇକା ୪୩.୦୮ ସେକେଣ୍ଡ ସମୟ ସହ ଯଥାକ୍ରମେ ରୌପ୍ୟ ଓ ବ୍ରୋଞ୍ଜ ପଦକ ହାସଲ କରିଥିଲେ ।
Comments are closed.