ଥିରୁବନ୍ତପୁରମ୍: ଋଷରେ ଛଅ ବର୍ଷ ଧରି ଆୟୁର୍ବେଦ ଔଷଧ ଉପରେ ଅଭ୍ୟାସ କରୁଥିବା ଡାକ୍ତର ହେବେ ମନ୍ଦିର ପୂଜାରୀ। କେରଳସ୍ଥିତ ତ୍ରିଶୁରରେ ପ୍ରସିଦ୍ଧ ଗୁରୁଭାୟୁର ମନ୍ଦିରର ମୁଖ୍ୟ ପୁରୋହିତ ତଥା ‘ମେଲଶାନ୍ତୀ’ ହେବାକୁ ଯାଉଛନ୍ତି ଏହି ଆୟୁର୍ବେଦ ଡାକ୍ତର। ୩୪ ବର୍ଷିୟ ଡାକ୍ତର କିରଣ ଆନନ୍ଦ କକ୍କଡ଼ ଛଅ ବର୍ଷ ଧରି ମସ୍କୋର ଋଷି ଆୟୁର୍ବେଦିକ କ୍ଲିନିକରେ ଆୟୁର୍ବେଦିକ ଔଷଧ ସମ୍ବନ୍ଧୀୟ ଅଭ୍ୟାସ କରୁଥିଲେ।
ଗତ ସପ୍ତାହରେ ଡାକ୍ତର କିରଣ ଗୁରୁଭାୟୁର ମନ୍ଦିରର ପରବର୍ତ୍ତୀ ପୂଜାରୀ ଭାବେ ମନୋନୀତ ହୋଇଥିଲେ। ସେ ଆସନ୍ତା ମାସରୁ ଛଅ ମାସ ପାଇଁ ଦାୟିତ୍ୱ ଗ୍ରହଣ କରିଛନ୍ତି। ଏହା ପରେ ତାଙ୍କ ସ୍ଥାନରେ ଆଉ ଜେଣେ ନୂତନ ପୂଜାରୀ ମନୋନୀତ ହେବେ। ଏନେଇ ସେ କହିଛନ୍ତି, “ଇଶ୍ୱରଙ୍କ ଅନୁଗ୍ରହରେ, ତାଙ୍କ ଆଶୀର୍ବାଦ ଦ୍ୱାରା ମୁଁ ଏହି ଅଧିକାର ପାଇଛି।” ସେ କହିଛନ୍ତି ଯେ ଏହି ପଦବୀ ପାଇଁ ଆବେଦନ କରିବା ପୂର୍ବରୁ ତାଙ୍କୁ ଅନେକ ‘ପାରିହାର’ ଏବଂ ପୂଜାବିଧି କରିବାକୁ ପଡିଥିଲା। ଏହା କରିବା ଦ୍ୱାରା ତାଙ୍କ ଶରୀରରୁ ଖରାପ ପ୍ରଭାବ ଦୂର ହୋଇପାରିବ। ସେ କହିଛନ୍ତି ଯେ ରୀତିନୀତି ଅନୁଯାୟୀ ଯେଉଁମାନେ ବିଦେଶ ପରିଦର୍ଶନ କରନ୍ତି ସେମାନଙ୍କୁ ମନ୍ଦିରର ରୀତିନୀତି କିମ୍ବା କାର୍ଯ୍ୟରେ ଭାଗ ନେବାକୁ ଅନୁମତି ଦିଆଯାଇନଥାଏ। କୁହାଯାଏ ଯେ ବିଦେଶୀ ଯାତ୍ରୀ ଯିଏ କରନ୍ତୁ ତାଙ୍କ ଶରୀର ଉପରେ କିଛି ଖରାପ ପ୍ରଭାବ ପଡିଥାଇ ପାରେ। କାରଣ ବିଦେଶରେ ‘ନିତ୍ୟକର୍ମ’ କରିବା କଷ୍ଟକର। ‘ନିତ୍ୟକର୍ମ’ ହେଉଛି ଏକ ରୀତିନୀତି ଯାହା ହିନ୍ଦୁମାନଙ୍କୁ ପ୍ରତିଦିନ କରିବାକୁ ପଡେ।
ସେ କହିଛନ୍ତି, “ମୁଁ ଋଷରେ ଥିବାବେଳେ ମଧ୍ୟ ପୂଜା କରୁଥିଲି, କିନ୍ତୁ ଭାରତ ଫେରିବା ପରେ ମୁଁ ‘ପ୍ରତ୍ୟାହାର’ପୂଜା କରିଥିଲି। ସେ ଋଷରେ ଛଅ ବର୍ଷର ସଫଳ କ୍ୟାରିଅର୍ ଛାଡି ଭାରତ କାହିଁକି ଆସିଛନ୍ତି ପଚରାଯିବାରୁ ଡ. ଆନନ୍ଦ କହିଛନ୍ତି ଯେ ଏହା ତାଙ୍କ ପିତାଙ୍କ ଇଚ୍ଛା ଥିଲା। ସେ କହିଥିଲେ, “ମୁଁ ଜଣେ ବଂଶାନୁକ୍ରମିକ ପୁରୋହିତ। ମୋ ବାପା ମଧ୍ୟ ଜଣେ ପୁରୋହିତ। ଗୁରୁଭାୟୁର ମନ୍ଦିରରେ ଆମେ ଚାରିଟି ଓଥିକକାନ୍ ପରିବାର ମଧ୍ୟରୁ ଗୋଟିଏ, ତେଣୁ ମୋ ବାପା ବୃଦ୍ଧ ହୋଇଯାଉଥିବାରୁ ସେ ମୋତେ ଓଥିକକାନ୍ କର୍ତ୍ତବ୍ୟ ପରିଚାଳନା କରିବାକୁ ଫେରିବାକୁ କହିଥିଲେ। ତେଣୁ ମୁଁ ଫେରି ଆସିଲି। ” ସେ କହିଛନ୍ତି ଯେ ଓଥିକକାନ୍ ମାନେ ପୁରୋହିତମାନଙ୍କର ଏକ ବର୍ଗ, ଯେଉଁମାନେ ମନ୍ଦିରରେ ‘ଅଭିଷେକ’ କିମ୍ବା ପାନ୍ଥିରାଦି ପୂଜା ପରି ଦୈନନ୍ଦିନ ରୀତିନୀତି କରନ୍ତି।
ତାଙ୍କ ପିତାଙ୍କ ଦାୟିତ୍ୱ ଗ୍ରହଣ କରିବା ବ୍ୟତୀତ ଆୟୁର୍ବେଦିକ କ୍ଲିନିକ୍ ଖୋଲିବାକୁ ମଧ୍ୟ ଯୋଜନା କରିଥିଲେ। ତାଙ୍କୁ ମେଲଶାନ୍ତୀ ଭାବେ ନିଯୁକ୍ତ କରାଯିବା ପରେ ସେ ଏବେ ଏହି କ୍ଲିନିକ୍ ଖୋଲିବାର ଯୋଜନା ବର୍ତ୍ତମାନ ସ୍ଥଗିତ ରଖିଛନ୍ତି। ଯେହେତୁ ତାଙ୍କର ଛଅ ମାସର କାର୍ଯ୍ୟକାଳ ମଧ୍ୟରେ ସେ ସବୁବେଳେ ମନ୍ଦିର ଭିତରେ ରହିବେ। ଏ ବିଷୟରେ ସୂଚନା ଦେଇ ସେ କହିଥିଲେ ଯେ ‘ମୁଁ ଘରକୁ ମଧ୍ୟ ଯାଇପାରିବି ନାହିଁ।’ ନୂତନ ମେଲଶାନ୍ତୀ ଦାୟିତ୍ୱ ଗ୍ରହଣ କରିବା ପରେ ସେ ନିଜର ଦୈନନ୍ଦିନ କାର୍ଯ୍ୟ ଏବଂ ଆୟୁର୍ବେଦିକ ଅଭ୍ୟାସକୁ ପୁଣି ଫେରିପାରିବେ।