ଜମି କହି ରାସ୍ତା ବିକିଦେଲେ ଦଲାଲ

ବ୍ରହ୍ମପୁର:ଜମି ନାହିଁ ହେଲେ ୧୫ ଲକ୍ଷରେ ବିକ୍ରି ହୋଇଛି ଜମି। କୁକୁଡାଖଣ୍ଡି ତହସିଲ ଅନ୍ତର୍ଗତ ରତ୍ନପୁର ଅଞ୍ଚଳରେ ଏଭଳି ଏକ ଜମି ଠକେଇ ସାମ୍ନାକୁ ଆସିଛି। ଜମି କିଣିଥିବା ବ୍ୟକ୍ତି ଟଙ୍କା ମାଗିବା ପରେ ମଧ୍ୟସ୍ଥି ତାଙ୍କୁ ହତ୍ୟା ଧମକ ଦେଉଥିବା ବ୍ରହ୍ମପୁର ସଦର ଥାନାରେ ଅଭିଯୋଗ ହୋଇଛି। ଏ ନେଇ ଥାନାରେ ନଂ ୪୬୫/୨୨ରେ ଏକ ମାମଲା ରୁଜୁ ହେବା ସହ ପୁଲିସ ଘଟଣାର ତଦନ୍ତ ଜାରି ରଖିଛି।
ମିଳିଥିବା ସୂଚନାପ୍ରକାରେ, ହଳଦିଆପଦର ନିକଟସ୍ଥ ନିବାସ ଗ୍ରାମର ମନୋରଞ୍ଜନ ବେହେରା ଆଜକୁ ବର୍ଷେ ତଳେ ବାଇଗଣବାଡି ଛକର ଟୁନା ଦାସଙ୍କ ଜରିଆରେ କୁକୁଡାଖଣ୍ଡି ତହସିଲ ଅନ୍ତର୍ଗତ ରତ୍ନପୁର ଗ୍ରାମରେ ୧୦ ଜଣ ବ୍ୟକ୍ତିଙ୍କ ନାମରେ ଥିବା ମୋଟ ୦.୮୫୦ ଏକର ଜମି କିଣିଥିଲେ। ଏଥିପାଇଁ ସେ ମଧ୍ୟସ୍ଥି ଟୁନାଙ୍କ ଜରିଆରେ ମୋଟ ୧୫ ଲକ୍ଷ ଟଙ୍କା ଦେଇଥିଲେ। ଜମି କିଣିବା ପରେ ତାହା ପଞ୍ଜୀକୃତ ମଧ୍ୟ ହୋଇଥିଲା। ହେଲେ କିଛିଦିନ ପରେ ସେ କିଣିଥିବା ଜମି ବାସ୍ତବରେ ଜମି ନୁହଁ, ବରଂ ଏକ ରାସ୍ତା ବୋଲି ମନୋରଞ୍ଜନ ଜାଣିବାକୁ ପାଇଥିଲେ। ମନୋରଞ୍ଜନ ଠକେଇର ଶିକାର ହୋଇଥିବା ଜାଣିବାକୁ ପାଇଥିଲେ। କେବଳ କାଗଜପତ୍ରରେ ତାଙ୍କୁ ଜମି ବିକ୍ରି କରାଯାଇଥିବା ସ୍ପଷ୍ଟ ହୋଇଥିଲା। ଏହାପରେ ଟଙ୍କା ଫେରାଇବାକୁ ସେ ଟୁନାଙ୍କୁ କହିଥିଲେ। ହେଲେ ଟୁନା ଟଙ୍କା ଫେରାଇବାକୁ ମନା କରିଦେଇଥିଲେ। ଏପରିକି ମନୋରଞ୍ଜନଙ୍କୁ ଗାଳିଗୁଲଜ କରି ଟଙ୍କା ମାଗିଲେ ଜୀବନରେ ମାରି ଦେବାକୁ ଧମକ ଦେଇଥିଲେ। ଏହାପରେ ଟୁନା ସଦର ଥାନାରେ ଅଭିଯୋଗ କରିଥିଲେ।